Read Angguruk Yali ULANGAN 23 Bible Online

ULANGAN 23 - Angguruk Yali bible

ULANGAN 23

¹Musan ele uruk lit, ”Ap unuwali og eneptukon men eneye kong teg lit werehon men NINIKNI Allah wel turuk inap enesehelimu welamuhup fug.

²Pabi umalik men wanggik umalik men NINIKNI Allah wel turuk inap enesehelimu welamuhup fug. Iren endebuhubonen endebuhubon famen ondoko laruk lamuhubon oho NINIKNI Allah wel turuk inap enesehelimu welamuhup fug.

³O Amon inap men Moab inap men NINIKNI Allah wel turuk inap enesehelimu welamuhup fug. Iren endebuhubonen endebuhubon famen ondoko laruk lamuhubon oho NINIKNI Allah wel turuk inap enesehelimu welamuhup fug.

⁴Hit o Mesiren wilip atug o Moab kinang keyen lul ulug larukmu Moab inap arimanowen ik men suburu men walug hit honolohotma waharusa fug angge famen nit huluwap nenebukag ulug hun Beor amloho Bileam o Petor kinang Mesopotamia welatisiyon ino wol turusa.

⁵Bileam ino wol turusama huluwap enepmin ulug waharisi angge famen NINIKNI Allahn nit indi nenesug lit holmin fug perisimu Bileamen fano welamuhup ulug Allah unuk fam hi neneptisi.

⁶It arimanowen ari hag toho turuk latusa angge re hit honoluk wereg li it fano roho welamuhuben let enebuk fug angge weregman eneg hit famen ondoko laruk lamuhubon oho it men ininggik ahandip toho welamuhup fug.

⁷O Edom inap arimano hit honori wereg angge re nit Allah umalikisi welaheyon men welam fug teg lahe peruk lamuhup fug. Mesir inap enengginang fam ap pohon hag toho welatikip angge re it fahet oho nit men welam fug teg lahe peruk lamuhup fug.

⁸Edom inap men Mesir inap men hit Israel hinap sehelimu ap pohon welamuhubon unumbusagsi indag enebuhubon arimanowen NINIKNI Allah apma welamuhuk puhup halug hit At wel turuk hinap sehelimu kuk teg lamuhup,” ulug hiyag isibag.

⁹Musan ele uruk lit, ”Hiren ap seliyon men tog abuhuk ulug o sabo wiroho welamuhup halug hit hinindi henebe men siyahap tahup tohon ulug yet teg lamuhup.

¹⁰Ap eke hubanggo nohorukmen ayenggol wilip aruhu halug o sabo wirig ambehen wilip aruhureg selma weregman eneg o hup aruhu.

¹¹O hupmu arik ohoma ebe ik umaho fuhureg mo ubuk urukmu nin suhuloho o sabo wirig ambeg kik waruhu.

¹²Yog wituk ambeg o sabo wirig ambeg sel fil siye reberuk lamuhup.

¹³Hiren yog wibuk oho lit wanggun wep toho foroho lamuhubon eke oko walug selma lalug kinang fabuluhup ambeg yog wituk lamuhup. Yog witlug kinang fam saltuk lamuhup.

¹⁴NINIKNI Allahn ap seliyon hit hininggikmu emberuk lit windat henebuhuk ulug hit men ambiyeg laruk lit o sabo wirigmuwen oho henesehelimu welaruhu. Henesehelimu welaruhu angge re o sabo wiroho welamuhup ambeg mun angge man angge puhun teg laruhu. Puhun teg eleg angge hit henesehelimu weregma yet hahureg NINIKNI Allahn hit hunumbahalug lahu rohon!”

¹⁵”Amingmingangge eke ikni fahet akolen hit henembeg waharukon ino ikni hebeloho og umuhup fug angge famen

¹⁶at inowen fano welatmin puhu ambeg hit henesehelimu welaruhu. Hit henesehelimu weregma siyahap turuk lamuhup fug.”

¹⁷”Ap winonen tu Allah hag toho wereg perukon ununuk fam hit Israel hinap henesehelimuwon ap angge men hiyap angge menen yaying turuk lamuhup fug.

¹⁸Yaying turuk lit uang hilarukon fahet oho NINIKNI Allahn irim anggolo peruk. Ari fahet hiren, ’Allah fam sali emberikik ane hikirap turuk lit At fahet uang embemin,’ ulug yaying turukon fahet onggo og hisarukon Allah ambeg imbik lahup fug.”

¹⁹”Hit honori eke uang ano suburu ano nungge-nungge og utuk lit at ubam, ’Fobik hebeloho og nutuk lit nin winon sebe roho og nuruhun,’ ulug heng tuhup fug.

²⁰We ap o winamon unubam eneg sebe roho og hisahubon fahet heng eneptuk lamuhup angge famen honori Israel inap unubam ari hag toho heng enebuhup fug. Anden komo heneptuk lahiyon hikit toho turuk lamuhup halug NINIKNI Allahn hit kuhup ambeg wereg lit mun ane man ane turukmu let heneptuk laruhu.”

²¹”Haren NINIKNI Allah nungge-nungge og huruhuk ulug sali umbuhun halug haren musun tuk fug angge folo og uruhun. NINIKNI Allahn haren sali umbuhunon ino hikirap tuhunen yet hasug lit weregma haren musun turuk lit alem siyahon hubamap tahun tohon.

²²Haren nungge-nungge og huruhuk ulug sali uhun fug halug NINIKNI Allahn nirim puhu fug angge famen

²³hat hindiyen sali emberuk laruhunon haren elehap tuk fug teg laruhun.”

²⁴”Hat anggur yabuk hareyen tohon ilan ke laruk lit anggur anggen tahanoho narukmen eneg hahum ouk aruhu angge famen sum fam fani roho walug lahun fug.

²⁵Hat roti anggen yaho ambeg hareyen tohon ilan ke laruk lit hat hinggiken roti anggen we tor angge tahanoho naruk laruhun angge famen karog fam paluhun fug.”