Read Angguruk Yali ULANGAN 24 Bible Online

ULANGAN 24 - Angguruk Yali bible

ULANGAN 24

¹Musan ele uruk lit, ”Ap ekeyen hiyap hilahureg weregman hiyap ino ubabut siyahen umbusuhuk ulug suwesingga haharoho umbuhureg uhe og utuk lit lamihin uhu.

²Lahureg ap winon hilahureg weregman

³ap inowen oho irimen umbusuhuk ulug suwesingga haharoho umbuhureg hiyap ino og utuk lit wilip amin uhu halug ap tamon inowen hiyap ari fahet ap fobikonen siyahap tirisi he ulug nin wahu fug. Ap fobikon ino war aruhu halug oho ap tamonen hilahu fug. Hilahu halug Allah NINIKNI inowen amben siyag anggolowon peruk ane tuhu rohon. Alem siyahon ari hahon turuk lit kinang NINIKNI Allahn og hisahu ambeg siyahap turuk lamuhup fug,” ulug hiyag isibag.

⁵Musan ele hiyag isaruk lit, ”Ap ekeyen hiyap hilahureg we tot eneg welaruhumu hori winon sehen seneg inap tog aptukmu har oho lamihin ulug hiyag utuk lamuhup fug. Yabuk mingming toho witukmu oho la fug angge mo misig fam inggareg ibam wereg ane eneg haltuk lit uhe indi ahiyehap turuk laruhu.

⁶Hiren ilamna foroho lamuhup ulug nungge-nungge ap eke og utuk lit fobik hebeloho og nuruhuwen anden oho at anggengge misig foroho laruhuk ulug helep roti anggen lilibug turuk angge aren tohon hilaruk lamuhup fug. Lilibug turuk angge ino elegma ap inowen mun angge man angge na fug teg angge re helep ino hiren hilaruk lamuhup fug.

⁷Ap ekeyen are Israel ahun misig inggik lisoho wahureg an namingmingangge welaruhu ano, ap fam ayeg waruhuk ano peruk ahun ino war amag. At ino ware feseruk lit alem siyahon ino hit sehelimuwen elehap turuk lamuhup.

⁸Hit sehelimuwen ap eke ahap salukangge rohon welaruhu halug Allah amingmingangge imam Lewi inaben hiyag hisaruk ane fuki roho holtuk lit anden Lewi inap unubam hiyag isarikik ane hikit toho ap ino ubam turuk lamuhup.

⁹Hiyap Miryam ino o Mesiren wilip atug larukmen salukangge ubam atisimu Allah NINIKNI inowen ubam tirisi ane wenggel haruk lamuhup.

¹⁰Hiren ilamna foroho laruhun ulug nungge-nungge henere eke og utuk lit fobik hebeloho og nuruhuwen anden oho at anggengge misig foroho laruhukon wamin ulug at ibam kuruk lamuhup fug.

¹¹Kuruk lam fug angge selma unduhukmu aren og itmin perukon eneg walug watug og hisaruk laruhu.

¹²Ap ino anggengge winon elehen sum nohoruk angge og hisaruk halug hiren te hubanggo sum ino fam nohukag ulug mo uwan ubuk uk fugmu hebeloho og irik laruk lit hubanggo foroho lamuhup fug. Ari roho fano ane turuk lamuhup halug ap inowen hit fahet sembahyang urukmu Allah NINIKNI inowen oho hit fahet ahiyeg hahu.

¹⁴Ap anggengge elehon ekeyen yabuk wit hisaruk halug honolok ane ubam turuk lamuhup fug. At ino fahet Israel ahun ano pog ahun ano ulug wenggel ha fug angge

¹⁵mo uwan ubuk uk fugmu aren yabuk warukon ino fahet onggo og utuk lamuhup. Onggo ino fam suburu hilaminen og numag ulug ap ino indimuwen wenggel haruk lit weregma hiren og utuk lamuhup fug halug at inowen NINIKNI Allah ubam sembahyang uhumu Allahn hit fahet siyag ane turuk inap puhu rohon.

¹⁶Amlohowen siyag ane turukon fahet ikni ware fusuhup fug. Ikniyen oho siyag ane turukon fahet amloho ware fusuhup fug. Ap eke inggarehen siyag ane turukon ari famen eneg war aruhu.

¹⁷Ap pohon men malik suwarehon menen tohon hilaruk lamuhup fug. Hiyap yuwohon ilamna foroho laruhu ulug nungge-nungge og isaruk lit fobik hebeloho og nuruhuwen anden oho at anggengge misig foroho laruhuk ulug sum nohoruk angge waruk lamuhup fug.

¹⁸O Mesir inaben hininggik lisoho mingming heneptukmu Allah NINIKNI inowen henehap siye heneptisiyon ino henepeleg aruhu fug ulug nele aru hiyag hisaruk lahi.

¹⁹Hiren roti anggen paloho pug tebelug hit hinibam walug larukmen sehelimuwon misig henepeleg aruhuwon ino yabukmu welaruhumu nin hebeloho wak la fug! Ap pohon men malik suwarehon men hiyap yuwohon menen nawag ulug umbusuhup halug hiren yabuk witukmu Allah NINIKNI inowen let heneptuk laruhu.

²⁰E zaitun anggen men hele anggur anggen men tahantug hinibam walug laruk lamuhup halug nin werehon tahamin ulug hebeloho la fug! Werehon arimano ap pohon men malik suwarehon men hiyap yuwohon menen naruk lamuhuben umbusuhup.

²²O Mesir inaben hit hininggik lisoho hunumbaharuk latusa angge re honoluk toho welamuhup ulug an nele aru hiyag hisaruk lahi.