Read Angguruk Yali ULANGAN 25 Bible Online

ULANGAN 25 - Angguruk Yali bible

ULANGAN 25

¹Israel inap piren alem unubam werehon kim harukmen eke misig alem ubam weregman eke misig ino alem ubam eleg laruhu.

²Alem ubam werehon ino yik angge watlihip ulug umbuhup halug alem kong turuk ahun inowen ap ino fam tuma yinggig lamin ulug hiyag utuk laruhumu alem tuhu ane hikit toho yik angge watuk lamuhup.

³Alem suwon ulug yik watukmen eneg hininggik teng misihen nubam hilag nuwalen 40 atuk halug sebe roho wabuk fug. Hit henere alem tuhuwon ino ap onolohotman inggali hahu rohon.

⁴Wam sapi ekeyen roti anggen ahap lol amag ulug uyuhen sobir isil larukmu nahu rohon ulug ambilik hele fam pug tuk fug,” ibag.

⁵Musan ele uruk lit, ”Ot men owe men ambiyeg wereg lit at misig amloho misig oho indag ta fug angge war atuk halug uhe lin isahuwon inowen ap amuwon ahun are fuhon eke hila fug angge we are ambiyeg welaruhuwon ino hilaruk laruhu.

⁶Hilahureg enemloho tamon indag tahup halug war atisiyon unuk Israel inap enesehelimuwen eleg aruhu rohon ulug malik aru re war atisiyon inowen ondohowon peruk lamuhup.

⁷Are inowen te hiyap nareyen lin isarisiyon ino hilamin fug ulug embeseruk halug hiyap ino ap onowesi roho werehon enembeg lahureg ele hiyag isaruk lit, ’An numbarik inowen te an nare unuk Israel inap enesehelimuwen eleg aruhu rohon ubalmangge malik eke endebuhuken uhe lin isarisiyon ari anden hilamin puk fug angge numbaharuk,’ ulug hiyag isahu.

⁸Ari ulug hiyag isahumu ap suwon arimanowen hun ino wol tuhupteg hiyap ari hilamihin ulug hiyag utukmu enele holuk fug angge umbusuhu halug

⁹hiyap ino ap suwon onolohotman hun ino iraham laruk lit aren sepatu uyugmu wan tehon ino hog toho wahureg wasubag olohotma sup tebeseruk lit, ’Anden turuk lahiyon aru hag toho winonen oho nare ubalmangge malik eke endebuhuk peruk elehon unubam tebeseruk lamuhup,’ uhu.

¹⁰Ari roho turuk lamuhubon fahet ap arimano ununuk ’Sepatu Hog toho Warusa Inap’ ulug suwal eneptuk lamuhup,” ibag.

¹¹Musan ele uruk lit, ”Ap piren yik aptukmu ap misig uheyen nahun windatmin ulug ap eke uwali seneruhu halug

¹²hit hinindi reg lam fug angge uwali seneruhu ane fahet hiyap ino inggik kong tubusuhup.”

¹³”Nungge-nungge ayeg waroho waruk lit anggin wirim haruk angge hare rehon fam wirim tulug anggin eleg angge famen anggin ulug henele si uruk lamuhup fug.

¹⁵Wirim haruk angge fanowon fam eneg wirim turuk lamuhup. Ari roho turuk lamuhup halug hit fano wereg lit amusun toho kinang NINIKNI Allahn og hisahuwon fam weregman eneg sabal amuhup angge famen

¹⁶enele si uruk inap fahet NINIKNI Allahn enemben siyag turuk ulug irim anggolo haruk.”

¹⁷”Nit o Mesiren wilip atug larukmen Amalek inaben nit nunubam turuk latusa ane henepeleg aruhu fug.

¹⁸Nit kalemma larukmen ninine eleg atisimu Amalek inap arimanowen nit nenembol filen waharuk lit Allah fahet enekol ha fug angge nit nonori inine elehen fobik laruson arimano obog toho unusurusa.

¹⁹Ari fahet hit NINIKNI Allahn og hisahu ambeg kuhupteg weregman Allahn ap seliyon hit walinggoho welamuhubon obog toho apmayap enebuhumu hiren Amalek inap arimano mondabi elehap enebuhup. Elehap enebuhupmu kinang atogman atogma ap misihen oho it fahet wenggel haruk laruhu fug. Elehap enebuhup ihiyon ari henepeleg aruhu fug!” ulug hiyag isibag.