Read Angguruk Yali ULANGAN 26 Bible Online

ULANGAN 26 - Angguruk Yali bible

ULANGAN 26

¹Musan ele hiyag isaruk lit, ”Hit kinang Allah NINIKNI inowen og hisahu ambeg kuhupteg yuwag toho welamuhup halug

²yabuhup angge anggen tamon arimano sum fam fani roho walug Allah NINIKNI inowen hiyag hisahu ambeg ino imbik wamuhup.

³Imbik waharuk lit Allah amingmingangge imam welaruhuwon ambeg lahupteg henele hiyag utuk lit, ’Allah NINIKNI inowen nunumbasi fam hunumalikisi fobikon kinang og isahuk ulug sali imbibag ambeg kirikikteg welahi,’ ulug Allah NINIKNI olohotman fag toho uruk lamuhup.

⁴Ari uhupteg sum walug laruk lamuhubon imam og utukmu Allah NINIKNI fahet hubu lahaptuk ambeg olohotma emberuk laruhu.

⁵Umbuhumu hiren Allah NINIKNI olohotma henele uruk lamuhubon tu, ’Nit nunumba o Aram yug toho welam fug angge o eke la eke la turuk lit welatfareg misihim umalikisi og eneplug o Mesir libareg pog ahun hag toho welatfag. Libahon arimano enebe we tor angge libag angge famen fobik enebe anggolo atfareg inine atfag.

⁶Inine atfagma Mesir inaben onolok toho nunubam turuk lit yabuk angginon wiriyek ulug mingming neneptuk latusa.

⁷Mingming neneptukmu Hat Allah nunumbasi INIKNI welahenon hubam let nenebin ulug nenele ine roho urukmu Haren holtuk lit nininggik lisoho nunumbaharukmu asengseng toho turuk latukukon Haren yet nisarikin.

⁸Yet nisarikinteg hinggik ineyon fam o Mesiren hondog neneplug wilip atikin. Wilip atuk lit Mesir inap enekolap enepmin ulug alem ekeyon-ekeyon aben tuk fug tehon anggolo roho turuk latikin.

⁹Ari roho turuk lit hondog neneplug waharikinteg kinang fanoma wam sapi ag owe men kin ahaluwe men eleg am fug angge wereg ambeg og nisarikinmu

¹⁰anden yatikik angge tamon aruma Hat hubahet emberuk lahi,’ uruk lamuhup. Ari uhupteg yabuhup angge tamon arimano Allah NINIKNI olohotma emberuk lit At wel turuk lamuhup.

¹¹Allah NINIKNI inowen an nibam werehon men fano angge anggolo og nisaruk latisi ulug hit men Lewi inap men ap pohon hit hinibam werehon men henehiyeg toho welamuhup,” ulug hiyag isibag.

¹²Musan ele uruk lit, ”Mo ilig am wirig am turukmu hinahanehon fam yabuhup angge arimano minggiroho winon umbat talug numon ino Lewi inap men pog inap men malik suwarehon men hiyap yuwohon men hit wal-wal wereg ambeg werehonen naruk lamuhup ulug we tor oho umbat ta fug angge obog toho og isaruk lamuhup.

¹³Og isaruk lamuhupteg Allah NINIKNI fam henele uruk lamuhubon te tu, ’Hat hubahet emberuk latikikon an nibam tor angge oho umbat ta fug angge Haren hiyag nitikin ane hikit toho Lewi inap men ap pohon men malik suwarehon men hiyap yuwohon men obog toho og isarikik. Haren hiyag nitikin ane napeleg am fug angge suhan isaruk latikik fug.

¹⁴Emberuk latikikon arimano fong watikik li oho tor angge narikik fug. Nunumbasiyen ibag ane hikit toho nubam alem werehen Allahn tohon senebuk fug ulug nunumbaharusa li oho anden senetikik fug. Ap warehonen nawag ulug Hat hubahet emberuk latikikon arimano og isarikik fug. Hat hele an nubam irikin ane hikit toho tirikik.

¹⁵Poholma Hat hiraham ap la fug teg ambehen pilap nisaruk lit nit humalikisi Israel ninap hindi nisaruk latmihin. Kinang fanowon nunumbasi fam sali imbinahon hikit toho og nisarikin ambeg ino oho fanowap turuk latmihin,’ uruk lamuhup,” ulug hiyag isibag.

¹⁶Musan ele hiyag isaruk lit, ”Allah NINIKNI inowen ari-ari turuk lamuhup ulug komo heneptuk ane hikit toho welamuhup ulug o yoho ele tu hiyag hisaruk. Ari fahet komo neneptukon apma eneg welamul ulug hinindimuwen wenggel haruk lit hininggik fam turuk lamuhup.

¹⁷O yoho NINIKNI Allahn hit hunubam sali emberuk lit, ’An Hinikni Allah welaruhukmu hiren An nele eneg holtuk lit ari-ari turuk lamuhup ulug komo heneptuk ane seneg lamuhup,’ ulug sali embehekon holehep.

¹⁸Holehepteg hiren oho o yoho Allah ubam sali emberuk lit, ’Haren hiyag nisarikin ane hikit toho nit Hat humalikisi yuhon wereg lit komo neneptuk ane obog toho seneg lamuhuk,’ ehebon Aren holehek.

¹⁹Ari holehekteg ap o pumbuk Aren wal enepfahon winon palimu hit welamuhup ulug palimuwap henebuhumu ap obog tohowen Allah suwon umalikisi arimano palimu wereg ulug hit hununuk suwap heneptuk lamuhup. Aren sali embehek ane hikit toho hit At umalikisi indi pulmu welamuhup,” ulug hiyag isibag.