Read Angguruk Yali ULANGAN 27 Bible Online

ULANGAN 27 - Angguruk Yali bible

ULANGAN 27

¹Welatfareg Musa men Israel inap onowesi men Israel inap onolohotma in arik libareg Musa inowen hiyag isaruk lit, ”Alem tuk teg ane eke hag eke hag anden o yoho hiyag hisaruk lahiyon obog toho hinine roho seneg lamuhup.

²Seneg lamuhuben hit kinang NINIKNI Allahn og hisahuwon fam kul ulug ik Yordan paloho nindig amuhup sambil ino helep piren hinahan hutuk tebelug kinang yanggowon lahabe fuhup.

³Lahabe felug helep itano fene Allahn ari-ari turuk lamuhup ulug hiyag nisarisi ane obog toho haharoho umbuhup. Haharoho umbuhupteg NINIKNI Allahn nunumbasi unubam kinang og hisahuk ulug sali imbibag ane hikit toho kinang ag owe men kin ahaluwe men eleg am fug angge mondabi anggolo wereg ambeg kuhup.

⁴Ik Yordan paloho kinang ino fam kulug tom Ebal fam lahakupteg anden hiyag hisihi ane hikit toho helep itano hutuk tebelug kinang yanggowon lahabuhup.

⁵Lahabuhupteg NINIKNI Allah olohotma hubu lahaptuk ambeg wibuhup. Wituk lit helep ine angge besi fam fele ruruk elehon eneg oko sengget wabuhup.

⁶Sengget wabuhupteg NINIKNI Allah fahet wam waroho hubu lahabuhup.

⁷Hubu lahabuhupteg NINIKNI Allah olohotman wam waroho osoho felug henehiyehen naruk lamuhup.

⁸Nahupteg helep hutuk tubuhubon itano fene Allahn ari-ari turuk lamuhup ulug hiyag nisarisi ane alem wal taneg seleg toho hahare fuhup,” ulug hiyag isibag.

⁹Ari ulug hiyag isibareg Allah amingmingangge imam Lewi inap arimano Musa iraham unduhukmu Musa inowen Israel inap obog toho unubam ele uruk lit, ”Henele uk fug angge holiyok! O yoho tu fam hit NINIKNI Allah umalikisi ahep.

¹⁰At umalikisi ahepteg NINIKNI Allah ele holtuk lit Aren alem tuk teg ane eke hag eke hag komo neneptukon anden o yoho hiyag hisaruk lahiyon obog toho hikit toho turuk lamuhup,” ulug hiyag isibag.

¹¹O ino sambil Musa inowen Israel inap unubam nin ele uruk lit,

¹²”Ik Yordan paloho nindig amuhupteg hit hununggul unuk Simeon, Lewi, Yehuda, Isakhar, Yusuf, Benyamin hinap welahebon tom Gerizim fam lahalug unduhukmu Ruben, Gad, Asyer, Zebulon, Dan, Naftali hinap welahebon tom Ebal fam lahalug unduhuk lamuhup. Tom Gerizim fam unduhuk lamuhubon arimanowen enele hi roho Allah ele holtuk lamuhubon fano welamuhup ulug hi enebuhup. Tom Ebal fam unduhuk lamuhubon arimanowen Allah ele embeseruk lamuhubon siyag amag ulug huluwap enebuhup.

¹⁴Huluwap enebul ulug Lewi inap arimanowen Israel inap obog toho unubam enele hum toho uruk lit,

¹⁵’Tu Allah hag toho wereg ulug e fam ano ine angge besi fam ano usangge wit talug hirahoma foroho laruhuwon ino siyag amag. NINIKNI Allahn ap inggiken laltuk angge fahet irim anggolo haruk,’ uhupmu Israel inap obog tohowen tem eheson ari teko lawag ulug, ’Amin!’ uhup.

¹⁶Ari uhupmu Lewi inaben, ’Ikni isinga men irimen pulup eneptukon ari siyag amag,’ uhupmu Israel inaben, ’Amin!’ uhup.

¹⁷Lewi inaben, ’Nare angginang hilamin ulug kinang hili hikip toho imbik larukon ari siyag amag,’ uhupmu Israel inaben, ’Amin!’ uhup.

¹⁸Lewi inaben, ’Ap il hupnihon un ke lawag ulug hondoholug larukon ari siyag amag,’ uhupmu Israel inap obog tohowen, ’Amin!’ uhup.

¹⁹Lewi inaben, ’Ap pohon men hiyap yuwohon men malik suwarehon menen tohon hilarukon ari siyag amag,’ uhupmu Israel inap obog tohowen, ’Amin!’ uhup.

²⁰Lewi inaben, ’Ikni uhe eke men ambiyeg nohoruk lit ikni apmayap turukon ari siyag amag,’ uhupmu Israel inap obog tohowen, ’Amin!’ uhup.

²¹Lewi inaben, ’Ap wam yarohorukon ari siyag amag,’ uhupmu Israel inap obog tohowen, ’Amin!’ uhup.

²²Lewi inaben, ’Inikni inisinga unumalikisi famen erek men nohorukon, ikni uhe ekeyen ondohowon men nohorukon, isingan ahun keron indag utukon men nohorukon ari siyag amag,’ uhupmu Israel inap obog tohowen, ’Amin!’ uhup.

²³Lewi inaben, ’Ap iyamalhe men ambiyeg nohorukon ari siyag amag,’ uhupmu Israel inap obog tohowen, ’Amin!’ uhup.

²⁴Lewi inaben, ’Ap eke hirahoman ware feserukon ari siyag amag,’ uhupmu Israel inap obog tohowen, ’Amin!’ uhup.

²⁵Lewi inaben, ’Onggo og numusa ulug ap siyag ane turuk elehon ware feserukon ari siyag amag,’ uhupmu Israel inap obog tohowen, ’Amin!’ uhup.

²⁶Lewi inaben, ’Ap san alem tuk fug teg ane eke hag eke hag eheyon arimano holtuk eleg halug siyag amag,’ uhupmu Israel inap obog tohowen, ’Amin!’ uhup,” ulug hiyag isibag.