Read Angguruk Yali ULANGAN 28 Bible Online

ULANGAN 28 - Angguruk Yali bible

ULANGAN 28

¹Musan nin ele uruk lit, ”Hiren NINIKNI Allah ele fuki roho holtuk lit ari-ari turuk lamuhup ulug komo heneptisi ane anden o yoho hiyag hisaruk lahiyon obog toho hinine roho seneg lamuhup halug NINIKNI Allahn hit Israel hinap palimuwap henebuhumu o pumbuk kinangma werehon obog toho hit henepma welamuhup.

²At ele hiyag hisaruk ane hikit toho turuk lamuhup halug Allahn indi henesug lit fano ane eke hag eke hag anden iminon obog toho hunubam turuk laruhu.

³Allahn let haptukmu o pumbukmuwen oho yabukmuwen oho mun ane man ane fano teberuk laruhun.

⁴Allahn let haptukmu humalikisi anggolo indag taruk lit kinangman wilip atuk angge anggolo naruk lit wam sapi, kambing, domba anggolo endetuk laruhun.

⁵Allahn let haptukmu suburu hat hasum elma fani rurukon men naruk angge kou esetuk angge fam kilaptukon men eleg laruhu fug.

⁶Allahn let haptukmu hat o kema-kema laruk lir oho waharuk lir oho fano welaruhun.

⁷Ap seliyonen hunusul ulug turukmu NINIKNI Allahn hit honolohotman apmayap enebuhu. Hunusul ulug enebe mangno roho wamuhup angge famen Allahn apmayap enebuhumu hit fahet enekolen kalem sabiren keyen linggik-longgo uruk lamuhup.

⁸NINIKNI Allahn let heneptikim hiren mun ane man ane fano teberuk lamuhupmu hiren naruk lamuhubon eleg laruhu fug. Ari roho turukmu kinang NINIKNI Allahn og hisahuwon fam wereg lit fano eneg welamuhup.

⁹Hiren we tik-tem toho NINIKNI Allahn alem tu men ari men turuk lamuhup ulug komo heneptisi ane seneg lit kalem pikiron Aren hiyag hisarisiyon eneg laruk lamuhup halug NINIKNI Allahn hit An numalikisi welamuhup ulug sali emberisi ane hikit toho indi pulmu welamuhup.

¹⁰Ari roho welamuhupmu yet hisahupteg ap o pumbuk obog tohowen INIKNI Allah anggengge wereg ulug onoluk atuk lit hit fahet enekol haruk lamuhup.

¹¹Hit kinang NINIKNI Allahn hunumbasi unubam og hisahuk ulug sali imbibahon fam kuhupteg weregma NINIKNI Allahn malik men wam umalik men mun angge man angge kinangman wilip atuk angge men anggolo og hisaruk laruhu.

¹²Osit naruk li horog atukmu Aren poholman osit henengginang ino fam pilabik waharuk laruhu. Pilabik waharukmu hiren mun ane man ane tirikim let heneptuk laruhu. Let heneptukmu hiren mun angge man angge hininggikmu aruhu angge minggiroho winon o pumbuk winon og isaruk lamuhupmu o pumbuk arimanowen hiren angge palegma iren angge hiren paleg lamuhup fug.

¹³NINIKNI Allahn ap o pumbuk kinangma werehon obog toho fahet hit ahaye hag toho welam fug angge unggul welamuhup ulug hunumbahaku. Hunumbahakumu hit apma welam fug angge we palimu eneg welamuhup. Palimu eneg welamuhuben hiren NINIKNI Allahn komo heneptisi ane anden hiyag hisaruk lahiyon sobir isahup fug.

¹⁴Kalem anden o yoho hiyag hisaruk lahiyon embeselug ap winonen tu Allah hag toho wereg ulug wel eneptuk angge hiren oho wel tul ulug unubam sembahyang uruk lamuhup fug,” ulug hiyag isibag.

¹⁵Musan nin ele uruk lit, ”Hiren NINIKNI Allah ele sobir isalug Aren alem tu men ari men turuk lamuhup ulug komo heneptisi ane anden o yoho hiyag hisaruk lahiyon hikit toho turuk lamuhup fug halug alem siyahon anden iminon obog toho hit hunubam aruhu.

¹⁶Hat pumbukmu oho yabukmu oho weregma alem siyahon hubam amag.

¹⁷Suburu hat hasum elma fani reg elegma naruk angge kou esetuk angge fam eleg laruhu.

¹⁸Humalikisi war atukmu kinangman wilip atuk angge eleg laruhu. Hambohom sapi, kambing, domba oho siyag amuhup.

¹⁹Hat larukmu oho waharukmu oho alem siyahon hubam aruhu.

²⁰Hiren NINIKNI Allah embeselug siyag ane eneg turuk lamuhup halug NINIKNI Allahn alem angginon eke hag eke hag hit sehelimu monde ferukmu hinindi nonghong uruken mun ane man ane tul peruk lamuhubon siyag aruhu. Ari roho weregman eneg hit obog toho eleg amuhup.

²¹NINIKNI Allahn ouk alem suwon fam hunusuhumu mulen men inahan men hunubam atikim hunuwag eneg angge welamuhup. Weregma NINIKNI Allahn ouk suburu inggila ilim atukon men folo hom ebe narukon men monde fuhumu suburu obok humon lahaku. Ari roho turukmen eneg hit obog toho kinang hiren ngi arik kuhup ambehen eleg amuhup.

²²

²³Osit poholman wambik waruhu fugmu hit henengginang helep ineyon hag toho haro aruhu.

²⁴Hiren osit nelep perukmen NINIKNI Allahn ul hag angge pilap hisa waharukmen eneg siyag amuhup.

²⁵NINIKNI Allahn ap seliyonen unusukag puhumu hiren tog abul ulug henebe mangno roho wilip amuhup angge famen ap seliyonen mug heneplug waharukmu hit henekolen kalem sabiren keyen linggik-longgo uruk lamuhup. Hit hunubam teko lahu ane fahet ap o pumbuk kinangma werehon obog tohowen hol hahupteg enekol haruk lamuhup.

²⁶Henebe wareg angge suwe pohol ke larukon men wam pak menen naruk lamuhupmu ap misihen oho yanggal enebuhu fug.

²⁷NINIKNI Allahn Mesir inap unubam pot imbibag hag toho hit hunubam oho pot men salukangge men yowilangge men emberuk lit hunusuhumu fano amuhup fug.

²⁸NINIKNI Allahn hinindi nonghonga fusuhumu hit nenek turuk lit inil hupnihon hag toho welamuhup.

²⁹Hinil hupnig hag toho wereg lit unukoho famen hubanggo hag toho fatil laruk lamuhup. Ari roho laruk lit lul peruk lamuhup ambeg la fug angge kalemma larukmen aben hiren angge yoholiyangge hilaruk lit siyahap heneptukmen eneg weregma ap misihen oho let heneptuk laruhu fug.

³⁰Haren hiyap hilamin ulug helenggen kuhunteg weregman ap ekeyen at men ambiyeg nohoku. Haren o eke wit tahun angge famen o ino fam welaruhun fug. Anggur yabuk wit tahun angge famen anggen yihikmu haren tahanuhun fug.

³¹Hambohom sapi ino hat holohotman ware fusuhup angge famen haren unu naruk laruhun fug. Hambohom keledai ino hat hiline yoholiyangge hilahupteg hebeloho og humuhup fug. Hambohom kambing domba arimano ap seliyonen hilarukmu ap misihen oho hat hibil aruhu fug.

³²Humalikisi ap angge hiyap angge men ap o pumbuk winamonen ininggik lisoho hondog eneplug larukmu yet isahunteg an nambeg suhuloho walep ulug hindi ouk toho wenggel harukmen eneg welaruhun angge famen hine elehen nungge-nungge tuk fug teg laruhun.

³³Haren lisag toho yabuk wit tarukmu anggen yihiruk laruhuwon arimano ap o pumbuk winon haren indam oho yet harikin fuhon arimanowen naruk lit hat unuyuhen sobir isaruk lit siyahap haptukmen eneg welamuhup.

³⁴Ari obog toho teko larukmu yet hahunteg hindi siyahen nenek turuk laruhun.

³⁵NINIKNI Allahn hunggulmuwen huyug anggul fam pot humon hubam umbuhumu ap misihen oho hihit habuhu fug.

³⁶NINIKNI Allahn hiret ap suwon hiren lahabe fuhubonet hondog heneplug o pumbuk winon hit hunumbasi menen yet harikip fuhon enembeg hunumbahik lahu. Hunumbahik lahumu ap winonen usangge e helep fam lale feruk angge hiren oho wel eneptuk lamuhup.

³⁷Alem arimano obog toho hunubam atukmu ap o pumbuk NINIKNI Allahn hik hisahu ambeg werehon obog tohowen yet hisahupteg enekol nim-nim hit fahet enele urukmen warukmen hininggaliyap heneptuk lamuhup.

³⁸Hiniyabukmu anggen anggolo fok turuk lamuhup angge famen heren puluweyen na waharuken anggen tor angge eneg tahantuk lamuhup.

³⁹Anggur yabuk wit taruk lamuhup angge famen tahiyen narukmu anggur anggen tahanoho ahaluwe naruk lamuhup fug.

⁴⁰Henengginang atogman atogma e zaitun anggolo welaruhu angge famen e zaitun anggen ket mungmung tegma loloho wamburukmu hiren e zaitun ahaluwe henebene lahaptuk lamuhup fug.

⁴¹Hiren ap umalik men hilani malik men indag eneptuk lamuhup angge famen ap seliyonen ininggik hele waroho hondog eneplug lahupmu hiren hunumalikisi fet enesug lamuhup fug.

⁴²E men henengginangman wilip atuk angge men obog toho heren sunggabiyen naruk lamuhup.

⁴³Ap pohon hit sehelimu welamuhubon arimano palimu amuhupmu hit mondabi apma welamuhup.

⁴⁴Ap pohon arimano unggul amuhupmu hit ahaye amuhup. Iren mun angge man angge ininggikmu aruhu angge minggiroho winon hit og hisaruk lamuhupmu hiren ap pohonen angge paleg angge reg lit nungge-nungge og isa fug teg lamuhup.

⁴⁵Hiren NINIKNI Allah ele sobir isaruk lit tuk teg ane fahet hiyag hisarisi ane hikit toho turuk lamuhup fug halug alem siyahon arimano obog toho hunubam atukmen eneg hit mondabi siyag amuhup.

⁴⁶NINIKNI Allahn ari roho turuk lit enehangge aben tuk fug tehon eke hag eke hag hunubam tuhu ane ari fahet hit famen ondoko laruk lamuhubonen oho hol hahupteg NINIKNI Allahn At ele embeserukon ari hag toho siyahap eneptuk ulug onoluk aruhu,” ulug hiyag isibag.

⁴⁷Musan nin ele uruk lit, ”NINIKNI Allahn mun angge man angge og hisarukon fahet hinindi henehiyehen At amingmingangge amuhup fug halug

⁴⁸NINIKNI Allahn ap seliyon henembeg mon enebuhumu it enemingmingangge amuhupteg sum eleg angge wereg lit suburu ik obok haruk lit mun angge man angge eleg toho welamuhup. Ari roho turuk lit NINIKNI Allahn e paleg angginon hunumaloma imbik lahakumu hiren ha roho walug larukmen eneg obog toho war amuhup.

⁴⁹NINIKNI Allahn ap o winamon kinang atogman wol enebuhumu suwe kut poholman wambik waharuk hag toho henembeg wamuhupteg it enele hiren holuk fug tehon fam hiyag hisaruk lamuhup.

⁵⁰Onorohole onolok teg lit hit kabiniyonet sabalonet inindi hisa fug angge

⁵¹henembohom sapi, kambing, domba men hiniyabukmu yatuk angge roti anggen, anggur anggen, e zaitun anggen men obog toho narukmen eneg hit obog toho suburu oboken war amuhup.

⁵²Ap arimanowen kinang NINIKNI Allahn og hisahuwon atogman atogma siyahap til laruk lit hit o pumbuk obog toho welamuhubon waling henesugmen eneg elehet yaron ineyon hinibam walinggoho ohowon hiren siyag aruhu fug peruk lahebon arimano halog toho lin-lan isahup.

⁵³Ap seliyon arimanowen hit waling henesugmu henesengseng toho wereg lit suburu oboken hunumalikisi ap angge hiyap angge NINIKNI Allahn og hisarukon famen waroho naruk lamuhup.

⁵⁴Henere tung ahun eke indi lombuk toho wereg angge famen naruk angge elehen aren oho umalikisi waroho naruk lit namu eneg naminen nori men nuhe nindi reg lahiyon men numalikisi winon menen nahup tohon ulug sap enesug laruhu.

⁵⁵

⁵⁶Hiyap suwon indi lombuk toho werehon kinang ke uyug fam laruk elehonen oho umalikisi indag tarukonet abu wamburukonet naruk lit namu eneg naminen numalikisi winon men nahun nindi reg lahiyon menen nahup tohon ulug sap enesug lit hirahoman naruk laruhu.

⁵⁷

⁵⁸NINIKNI Allahn alem su ane turuk lit At embeseruk inap enekolap eneptukon unuk fahet henekol toho welamuhup! Aren tuk teg ane fahet komo heneptisi ane suwesingga aru fam haharehon hikit toho turuk lamuhup!

⁵⁹Ari roho turuk lamuhup fug halug NINIKNI Allahn alem mondabi siyahon eleg atuk elehon men ouk ap misihen oho hihit enebuk fug tehon men hit men hiren endebuhubonen endebuhubon men hunubam emberuk laruhu.

⁶⁰Ouk alem suwon hit o Mesir kinang fam wereg lit henekol toho welatikibon arimano obog toho hunubam monde fik waruhumu ouk warukmen eneg welamuhup.

⁶¹Alem siyahon men ouk alem eke hag eke hag men suwesingga tu fam hahareg elehon oho NINIKNI Allahn hit hunubam monde fik waharukmen eneg hit obog toho siyag amuhup.

⁶²NINIKNI Allah ele sobir isaruk lamuhup halug hiren ondohowonen endebuhubon arimano suhal poholma mondeg hag toho anggolo atep angge famen we tor angge eneg honoluk welamuhup.

⁶³Indam NINIKNI Allahn ahiyehen fano ane hunubam turuk lit henebe anggolowap heneptuk latisi angge famen hiren At ele ying turuk lamuhup halug Allahn nahiyeg toho siyahap enepmin ulug hit mondabi elehap henebuhu. Kinang hiren ngi arik kuhup ambehen hit heneko

⁶⁴kinang atogman atogma o pumbuk ap winon wereg ke arimano hik-hak hisahu. Hik-hak hisahumu ap winonen usangge e helep fam wel eneptuk angge hit hunumbasi men henepeleg latikibon hiren oho wel eneptuk lamuhup.

⁶⁵Hik-hak hisahu ambeg yug toho wereg lam fug angge la wam turuk lit hinindi yuwag toho welamuhup fug. NINIKNI Allahn hinindi angginap henebuhumu hinindi elek-felek uruken hinil yanggowon inam atuk laruhu.

⁶⁶Likiya hupmu war atuk ane hunubam am hag teg laruhumu siyag amul ulug hinindi pong-pong angge eneg turuk laruhu.

⁶⁷Alem siyahon eke hag eke hag teko larukmu yet haruk lamuhup halug hinindi henekolen hirimuruk turuk lit likiya, ’Folo-folo hup alep,’ hup atug, ’Folo-folo o sakan telep,’ uruk lamuhup.

⁶⁸Welamuhupmu NINIKNI Allahn hit hondog heneplug kou fam ik saho ahik ahum keyen laruk lit o Mesir kinang fam anden o ino suhuloho lahup fug irikik ambeg hunumbahik lahu. Hunumbahik lahumu hiren o Mesir inap arimano nit men seli roho wereg angge famen suburu og nisawag ulug enemingmingangge amuhuk uruk lamuhup angge famen iren nit nenemingmingangge welamuhup fug ulug hunumbahakup,” ulug hiyag isibag.