Read Angguruk Yali ULANGAN 29 Bible Online

ULANGAN 29 - Angguruk Yali bible

ULANGAN 29

¹Israel inap o Moab kinangma weregma NINIKNI Allahn Musa fam ele uruk lit, ”Israel inaben tom Sinai alman An men nininggik ahandip toho welamuhuk ulug sali emberusa hag toho o tuman oho sali umbulusan hiyag isamihin,” ulug hiyag itfag. Hiyag itfag ane ino hikit toho Musan Israel inap obog toho wol enepfareg it unubam ele uruk lit, ”Nit o Mesir wereg lit NINIKNI Allahn o Mesir inap onowe suwon men otsi umalikisi obog toho men unusirisi ane yet haruk latukuk.

³Hit hiniline unusimin ulug enehangge aben tuk fug tehon anggolo wal haruk lit alem siyahon eke hag eke hag unubam emberuk latisi.

⁴Ari obog toho hinil fam yet haruk lit hinisanggo fam holtuk latikip angge famen hinindi anggar atisi fugmu we yoho tu fam eneg NINIKNI Allahn hinil hinisanggo husoho hinindi anggarap turukmu honoluk atmisi.

⁵NINIKNI Allahn hondog neneplug lekma larukmen eneg mo ilig am wirig am turukmu teng misigmen nubam hilag nuwalen atisi. Yat toho larukuk angge famen nenesum nenebemon men nunuyug hililip teg angge men tararag-tararag laruk latisi fug.

⁶Suburu roti men ik anggur ahaluwe men narukuk fug angge famen NINIKNI Allahn poholman suburu manna og nisaruk latisi. At eneg NINIKNI Allah wereg ulug honoluk toho welamuhuben ari hag toho hunubam turuk latisi.

⁷Ari roho turukmu nit tiya larukmen o Hesbon inap onowe suwon Sihon men o Basan inap onowe suwon Og menen nit men tog abul ulug waharusa angge famen niren it unusurukukteg

⁸enengginang ilmig tarukuk. Ilmig tarukukteg kinang ino Ruben inap, Gad inap, Manasye inap pul ke minggiroho winon men fibir eneptukuk.

⁹Ari fahet Allah men mangno roho welamuhuk ulug o yoho sali emberuk laheyon ari hinine roho seneg lamuhup. Sali emberuk laheyon ino hikit toho turuk lamuhup halug hiren mun ane man ane tul peruk lamuhubon fano teko laruk laruhu.

¹⁰O yoho hit Israel hinap hununggul unuk obog toho honowesi men hit fet henesug inap men milal heneptuk inap men ap angge welahebon obog toho NINIKNI Allah olohotma unduhuk lahep.

¹¹Hit hunuhesi men hunumalikisi men ap pohon hit sehelimu werehon men e kahaltuk inap oho ik hinangguruk inap oho tiya welahep.

¹²O yoho NINIKNI Allahn hit men nininggik ahandip welamuhuk ulug sali embemisimu hiren hebeloho nininggik ahandip toho wereg lit Hat hele eneg holtuk lamuhuk ilihip.

¹³NINIKNI Allahn nunumbasi Abraham, Ishak, Yakub men unubam sali imbibag ane hit hunubam irisi ane hikit toho o yoho tu fam ele tem toho urukon tu, ’An hit Hinikni welahi, hit An numalikisi welahep.’

¹⁴NINIKNI Allahn hit o yoho An nolohotma wahebon hunubam eneg sali emberuk lahi peruk eleg angge famen hit tiya welahebonet hiren endebuhubonen endebuhubonet hunubam sali ari emberuk.

¹⁶Nit o Mesir welatukuk ane men ap o winamon enengginang keyen laruk latukuk ane men hit honoluk.

¹⁷Ap arimano enengginang keyen laruk lit usangge ap inindimu siyahap eneptuk angge e helep emas perak men fam laltuson arimano yet haruk latikip.

¹⁸Hit ap angge hiyap angge hununggul unuk wal taneg welahebon misihen oho indimu peruk lit, ’An namuwen ano nori menen ano o yoho NINIKNI Allah embeselug usangge ap o winamon arimanowen tohon niren oho wel turuk lamuhuk ulug wenggel hahup tohon! Ari roho wenggel hahup halug anggen siyahon nalug war atuk ahen hag toho wereg lit ap obog toho siyahap henebuhup.

¹⁹Allahn Anden sali emberuk lahi ane ari embeserukon siyag amag urukmu hol halihipteg hit welahebon misihen undaman wenggel haruk lit, ’An namuwen peruk lahiyon hikit toho turuk laruhuk halug oho alem siyahon nubam aruhu fug,’ puhu rohon. Ari roho peruk ane ariyen ap fanowonet siyahonet mangno roho siyag amuhup.

²⁰Ari roho peruk ane NINIKNI Allahn ambolmaya fusuk fug angge An numbaharukon nirim ulug undama ahe lahakumu Allah ele sobir isarukon siyag amag ulug suwesingga tu fam hahareg ane obog toho ap ino fam aruhumu mondabi siyag aruhu.

²¹Suwesingga aru fam hahareg ane hikit toho NINIKNI Allahn ap ino war amag ulug hit Israel hinap hununggul unuk welahebon sehelimuwen yanggale fesehu.

²²Hiren Allah embeselug laruk lamuhup halug NINIKNI Allahn ouk men alem angginon eke hag eke hag men hit hunubam emberuk lit henengginang fam indok ambulpul men saho men mangno roho hik isa wambik waruhumu o Sodom, Gomora, Adma, Zeboim men NINIKNI Allahn olok haruk lit siyahap tibag ambeg hag aruhu. Ari hag aruhumu nungge-nungge yatukmu oho kinang siyahen itik-itik angge oho wilip aruhu fug. Ari reg laruhumu fobik hiren endebuhubonen endebuhubon men ap o winamon yatman henembeg waharuk lamuhubon menen henengginang ha wamuhupteg

²⁴enele uruk lit, ’NINIKNI Allahn alem nungge fahet oloken ahummu het-pet haruk lit kinang aru siyahap tirisi?’ ulug ap kapal isaruk lamuhup.

²⁵Kapal isarukmu aben hiyag isaruk lit, ’NINIKNI Allah Israel inap unumbasiyen wel turuk latfahon inowen umalikisi Israel inap arimano o Mesiren hondog eneplug wilip atfareg it unubam nininggik ahandip toho welamuhuk ulug sali imbibag angge famen iren INIKNI Allah enembol yig utuk latusa ane ariyen kinang aru siyag atisi.

²⁶NINIKNI Allahn usangge ap winonen wel eneptuk angge henepelehon hiren oho wel eneptuk lamuhup fug ibag angge famen iren At ele holuk fug angge usangge arimano fam sembahyang uruk latusa.

²⁷Ari roho turuk latusa ane fahet NINIKNI Allahn olok haruk lit alem siyahon suwesingga aru fam haharehon obog toho unubam emberuk latisi.

²⁸NINIKNI Allah indi inahan haruk lit al ke het-pet atisimu Israel inap arimano enengginang famen heneko o wina ke hik-hak isarisi ambeg ketiya oho wereg.

²⁹NINIKNI Allahn alem hirahowon undama foroho lit wereg angge famen alem nit fahet inamap tirisiyon arimano nit men niren endebuhukonen endebuhubon menen ninindimu foroho lamuhuk. Foroho lit Allahn komo neneptisi ane suwesingga aru fam haharehon ino hikit toho turukmen eneg welamuhuk,” ulug hiyag isibag.