Read Angguruk Yali ULANGAN 3 Bible Online

ULANGAN 3 - Angguruk Yali bible

ULANGAN 3

¹Musan nin ele uruk lit, ”Tot welatukukteg nit o Basan kinang fil lul ulug o pumbuk Edrei horogma larukmen Basan inap onowe suwon Og umalikisi sehen senehon obog toho menen nunusul ulug nenembeg waharusa.

²Waharusama NINIKNI Allahn an nubam ele uruk lit, ’At fahet hakol ha fug! Anden at umalikisi enebe men enengginang men obog toho hat hinggikmu embeminmu haren Amori inap onowe suwon Sihon o Hesbon welatisiyon fam tirikin hag toho at ubam oho timihin,’ irisi.

³Ari irisi ane hikit toho NINIKNI Allahn ap suwon Og ino umalikisi enebe men nininggikmu emberisimu niren it obog toho unusurukukmu ap misig oho oluk welatisi fug.

⁴O itano li niren o pumbuk Basan inap onowe Og inowen seneg latisiyon o Argob kinang fam werehon arimano misig oho pisan toho la fug angge obog toho pin kuruk latukuk. O pumbuk pin kuruk latukukon teng piren nubam hilag falfaliken 60 arimano obog toho nit ngi atukuk.

⁵O pumbuk nit ngi atukukon arimano obog toho walinggoho elehet yaron oko kilabegma sok lare ferukon weregma o pumbuk senerik larukukon winon elehet walinggoho oho fuhon anggolo roho wereg.

⁶O arimano obog toho pin kurukukteg o pumbuk ap suwon Sihon inowen seneg latisiyon arimano fam turukuk hag toho abet hiyabet maliket obog toho unusurukuk.

⁷We it enembohom men inibamen foroho angge men eneg huhulangge hilarukuk.

⁸Ari roho turuk lit kinang ik Yordan yali fil werehon Amori inap onowesi piren itanowen seneg latisiyon ino ik Arnon famen tulug tom Hermon fam nit ngi atukuk.

⁹(Tom Hermon unuk ino Sidon inaben Siryon urukmu Amori inaben Senir uruk.)

¹⁰Kinang ap suwon Og inowen seneg latisiyon obog toho ilmig til laruk lit o pumbuk tom atelma tonggo ke wirihon obog toho famen tulug Gilead kinang abirangge men Basan kinang abirangge men o Salkha men Edrei men fam senerik larukuk.

¹¹Basan inap onowe Og ino Refaim inap amukasi welatfahonen ondohowonen ondohowon welatisi. Refaim inap unuwag yaron arimano obog toho eleg atfagma at eneg welatisi. At war atisimu wareg angge kilaptuk ambeg besi ineyon fam wiri ferusa. Wiri feruk lit wirimangge yat toho wirim turukon il uhan, horog toho wirim turukon il piren wirim toho wituson ino ketiya oho Amon inap inibam o pumbuk suwon Raba wereg,” ulug hiyag isibag.

¹²Musan nin ele uruk lit, ”Kinang ik Yordan yali fil werehon ari ilmig tarukukteg o pumbuk Aroer ik Arnon ilanma werehon famen tulug kinang ik eleruk fil werehon fam ununggul unuk Ruben inap men Gad inap men og isaruk lit nin sebe roho o pumbuk tom Gilead fam werehon pul ke minggiroho winon it og isarikik.

¹³O Gilead kinang pul ke minggiroho winon men o Argob kinang Basan ap suwon Og inowen seneg latisiyon fam werehon abirangge men ununggul unuk Manasye inap pul ke minggiroho winon og isarikik. Basan kinang unuk eke Refaim inap enengginang suwaleg.

¹⁴Manasye ahun Yair inowen o Basan kinang hilaruk lit o Argob famen tulug Gesur inap enengginang men Maakha inap enengginang men hili fam kinang ari obog toho hilarisi. O Basan kinang hilarisiyon ari Yair inowen inggareg unuk hikit toho Hawot-Yair suwaltisiyon ketiya oho wereg.

¹⁵Manasye amloho Makhir inowen ondohowonen ondohowon arimano anden kinang Gilead og isarikik.

¹⁶Ruben inap men Gad inap men kinang fibir isaruk lit Gilead kinang famen tulug ik ambut fil ik Arnon fam kinang obog toho og isarikik. It enengginang hili ik ambut filon Arnon ahik pulmu emberikik, yali filon Yabok ahik Amon inap enengginang hili-hilimu larukon fam emberikik.

¹⁷Nin sebe roho Ik Galilea yenggelehon famen tulug ik Il Warehon tom Pisga alma werehon fam kinang ik Yordan ilanma werehon men obog toho og isarikik.

¹⁸Og isarikikteg anden it unubam nele uruk lit, ’NINIKNI Allahn kinang ik Yordan yali fil werehon ari hiren ngi roho welamuhuben og hisarisi. Og hisarisimu hit honori Israel inap ununggul unuk winon ariya ik Yordan paloho la fugmu hit tog abukonen it men ambiyeg lul ulug henesehen seneko it onolohotman hit tam ik paloho nindig amuhup.

¹⁹Hit nindig amuhupmu hunuhesi hunumalikisi men henembohom anggolo foroho lahebon men eneg hinibam o pumbuk anden og hisarikikon arimano fam welamuhup.

²⁰NINIKNI Allahn hit honori oho ik Yordan fuma fil kinang og isahumu inindi yuwag toho welamuhup halug eneg hit suhuloho wamuhupteg henengginang anden wal taneg og hisarikikon fam yug toho welamuhup,’ ulug hiyag isarikik.

²¹Hiyag isarikikteg anden Yosua fam nele uruk lit, ’NINIKNI Allahn ap suwon piren itano unubam tirisi ane yet harikin. It unubam tirisi ane hikit toho NINIKNI Allahn ap suwon-suwon hat lahun ambeg werehon arimano unubam turuk laruhu.

²²It fahet hakol ha fug! NINIKNI Allahn hit fahet tog aptuk laruhu,’ irikik,” ulug hiyag isibag.

²³Musan nin ele uruk lit, ”O itano li anden NINIKNI Allah fam heng turuk lit,

²⁴’Allah NIKNI, an Hat hamingminganggeyen yet hawag ulug an nolohotman Hat hinggik ineyonen alem suwon turuk ane ak turuk latikin. Haren hine roho turuk lahen hag toho aben nunumba ulug wel eneptukon poholma kinangma werehon enesehelimuwon san tuk teg?

²⁵Ari fahet anden ik Yordan paloho nindig atug kinang fanowon men tom fanowon men yet hil laruk lit tom Libanon oho yet hahuken hiyag nimin,’ ulug heng tirikik.

²⁶Heng tirikikmu hiren NINIKNI Allah ele ying turuk latikip ane ariyen Aren an fahet olok haruk lit anden heng tirikik ane holtisi fug. Holtisi fureg an nubam ele uruk lit, ’Obog toho ehen! Alem ino fahet nin hele uhun fug!

²⁷Tom Pisga atelma lahakunteg yali fil, hubula fil, ik eleruk fil, ik ambut fil yet hahun. Kinang og hisahuk iyag ambeg ino haren ik Yordan paloho kuk fug angge we yatman yet hahun.

²⁸Hat hubalma Yosua inowen Israel inap fet enesug laruhuwen haren at milaltuk lit indi wirikap tuhun. Yosua ino Israel inap arimano enelukema laruk lit ik Yordan paloho nindig atug kinang haren yet hahunon ino fibir isahu,’ irisi.

²⁹Ari irisimu nit we tot amusun toho o pumbuk Bet-Peor fuma fil tonggoma welatukuk,” ulug hiyag isibag.