Read Angguruk Yali ULANGAN 30 Bible Online

ULANGAN 30 - Angguruk Yali bible

ULANGAN 30

¹Musan ele hiyag isaruk lit, ”Hiren Allah ele holtuk lamuhup halug fano welamuhup, At ele sobir isaruk lamuhup halug siyag amuhubon fahet seleg toho hiyag hisihimu fanowon te ke ulug hinindimuwen wenggel hemek! Anden ihiyon hikit toho hunubam teko laruk lit Allah NINIKNI inowen hit o kema-kema hik-hak hisahu halug anden ihiyon fahet hinindimuwen wenggel haruk lamuhup.

²Wenggel haruk lit nit nunumalikisi menen nenembiken turukuk ulug Allah NINIKNI ambeg suhuloho wamuhuk puhupteg henebe abirangge anden o yoho hiyag hisaruk lahiyon aru turuk lamuhup.

³Ari roho turuk lamuhup halug Allah NINIKNI inowen hit fahet nindi ulug o kema-kema welamuhup ambeg arimanowen hondog heneplug suhuloho waruhumu hit tam fano welatikip hag toho welamuhup.

⁴Hit winon kinang atog fil hik-hak hisahu angge famen nin hebeloho palu henebik waruhu.

⁵Palu henebik waruhumu kinang indam hunumbasi ngi roho welatfag ambeg ino hiren ngi arik wamuhup. Hit hunumbasi enebe we tor angge wereg lit we tot fano welatfagma hit unumalikisi aruma henebe anggolo wereg lit fano anggolo welamuhup.

⁶An nele holukag ulug Allah NINIKNI inowen hit hunumalikisi men hinindi kerap henebuhumu hit henebe abir anggeyen At hinindi haruk lamuhup. Ari roho wereg lit honoluk eneg welamuhup.

⁷Allah NINIKNI inowen siyahap henebuhu ulug hiyag hisihiyon ari ap hit hunusul ulug mug heneplug larukon arimano unubam umbuhu.

⁸Hiren hebeloho NINIKNI Allah ele holtuk lit Aren komo heneptuk ane anden o yoho hiyag hisihiyon hikit toho turuk lamuhup.

⁹Allah NINIKNI inowen let heneptukmu hit hininggiken mun ane man ane turuk lamuhubon ariyen fano amuhup. Hunumalikisi oho henembohom oho anggolo amuhupmu yabuhup angge arimano anggen anggolo yihik feruk lamuhup. NINIKNI Allah nit nunumbasi fahet ahiyeg haruk latfag hag toho hit fahet oho ahiyehen let heneptukmu fano roho welamuhup.

¹⁰Ari fahet Allah NINIKNI ele holtuk lit Aren komo neneptuk ane suwesingga aru fam haharehon hikit toho turuk lamuhup. Henebeyet hinindiyet At ambeg hebeloho wamuhup,” ulug hiyag isibag.

¹¹Musan ele hiyag isaruk lit, ”Anden yoho komo heneptuk lahiyon aruma yatma wereg lit anggin tehen wa fug teg lahe puk fug.

¹²Wene ari poholma wereg eleg angge re hiren te ap sa poholma lahakureg wene ari walug wambik waruhureg hiyag nisahumu holuhuk peruk lam fug.

¹³Ik saho ahik fuma fil oho wereg eleg angge re ap sa ik paloho lahureg walug waruhureg hiyag nisahumu holuhuk puk fug.

¹⁴Wene ari hit horogma weregma hinindimuwen honoluk teg lit henembilik fam uruk lahep angge re hininggik fam oho ari hikit toho turuk lamuhup.

¹⁵Anden o yoho hiyag hisaruk lit, ’Fano ane turuk lamuhup halug fano welamuhup, siyag ane turuk lamuhup halug war amuhup,’ ihi ane hit hininggarehen fanowon te ke ulug wenggel haruk lamuhup.

¹⁶Hiren Allah NINIKNI hinindi reg lit Aren komo heneptukon anden o yoho hiyag hisaruk lahiyon hikit toho turuk lamuhup halug hit henebe anggolo atuk lit fano roho welamuhup. Hit kinang kuhup ambeg ino weregma Allah NINIKNI inowen fet henesug laruhu angge famen

¹⁷hiren Allah ele holtul fug ulug henembol yig utug ap winon onombolim laruk lit nunumba ulug wel eneptukon arimano hiren oho wel eneptuk lamuhup halug

¹⁸mondabi siyahap heneptukmu kinang ik Yordan paloho kuhup ambeg ino fam amusun toho welamuhup fug ulug anden yoho seleg toho hiyag hisaruk lahi.

¹⁹NINIKNI Allahn onoluk welamag ulug ap let eneptuk ane men war amag ulug siyahap eneptuk ane men fahet anden hiyag hisaruk lahimu hit henemuwen fanowon te ke, siyahon te ke ulug wenggel hemek! Pohol men kinang menen yet henesugmu fag toho ilihip. Nit nunumalikisi men nonoluk welamuhuk iyek!

²⁰Allah NINIKNI ino hinindi reg lit At men hininggik ahandip toho wereg lit ele holtuk lamuhup halug hit hunumalikisi men kinang NINIKNI Allahn nunumbasi Abraham, Ishak, Yakub unubam sali imbibag ambeg ino fam amusun toho welamuhup,” ulug hiyag isibag.