Read Angguruk Yali ULANGAN 31 Bible Online

ULANGAN 31 - Angguruk Yali bible

ULANGAN 31

¹Musan nin eke Israel inap unubam ele hiyag isaruk lit,

²”An indag atik iyag sali mo ilig am wirig am turukmen teng-teng angge 120 atisimu nebe yaman atikikteg hit fet henesug lam fug teg lahi. Nin NINIKNI Allahn hat ik Yordan paloho lema lahun fug ulug hiyag nitisi.

³Ari fahet Allah NINIKNI amu eneg hit henelukema laruk lit ap o pumbuk werehon arimano yanggal enebuhumu hit kinang ino fam welamuhup. Kinang ino fam kuhuben NINIKNI Allahn irisi ane hikit toho hun Yosua inowen fet henesug laruhu.

⁴NINIKNI Allahn Amori inap onowesi suwon Sihon men Og men waroho apmayap eneptuk lit enengginang harep pisako siyahap tirisi hag toho ap ik fuma fil werehon arimano oho mondabi siyahap enebuhu.

⁵Hiren unusuhup ulug hininggikmu umbusuhumu anden hiyag hisarikikon ino hikit toho mondabi elehap eneptuk lamuhup.

⁶Hinindi wirik toho wereg lit it unubahet henekol hahup fug! Allah NINIKNI amuwen eneg let enepmin ulug hit hinim ambiyeg laruk lit hunumbahaku fug,” ulug hiyag isibag.

⁷Ari ulug hiyag isibareg Musa inowen hun Yosua wol tibareg Israel inap obog toho onolohotman at ubam ele uruk lit, ”Hat hindi wirik toho wereg lit ap aruma fet enesug laruhun. Kinang NINIKNI Allahn nunumbasi unubam sali imbibag ambeg ngi amuhuben hondog eneplug lahun.

⁸NINIKNI Allahn ineyap timin ulug hat halukema laruk lit humbahaku fug. Ari fahet hakol hahun fug,” ibag.

⁹NINIKNI Allahn ari-ari turuk lamuhup ulug komo eneptukon Musa inowen suwesingga fam haharoho imbibareg peti e sali roho wirihon Allahn tohon foroho inap imam Lewi inap arimano men Israel inap onowesi men og isibag.

¹⁰Og isaruk lit it unubam te, ”Mo ilig am wirig am turukmu mo sabiron fam paleg angge werehon elehap turuk lamuhup li itano suwesingga aru Israel inap iniline henele hi roho uruk lamuhup. Nit lekma laruk lit o sabo wiroho nohil laruk latukuk ane fahet wenggel haruk lamuhup sambil ino Allah NINIKNI ubam sembahyang ul ulug Aren hiyag hisahu ambeg waharuk lamuhup.

¹²Wamuhupmu ap, hiyap, malik, ap pohon arimanowen holukag ulug palu eneptuk lit suwesingga aru hikit toho hiyag isaruk lamuhup halug it inindi anggar aruhumu Allah NINIKNI fahet enekol toho wereg lit haharehon aru hikit toho turuk lamuhup.

¹³Ari roho hiyag isaruk lamuhupmu hit hunumalikisi haharehon aru enepeleg tehon arimanowen holtuk lit inindi anggar aruhumu onoluk wereg li kinang ik Yordan paloho kuhupteg welamuhup ambehen oho NINIKNI Allah fahet enekol toho welamuhup,” ulug hiyag isibag.

¹⁴Hiyag isibagma NINIKNI Allahn Musa fam ele hiyag utuk lit, ”War aruhunon ketiya horog tehen hun Yosua wol timihinteg An men Ambi Atuk Ibam hondoholug watmihinmu tu men tu men turuk laruhun ulug hiyag itmin,” ibagma Musa men Yosua men Allah men Ambi Atuk Ibam ino watfag.

¹⁵Watfagma NINIKNI Allah hina anggulog fam o ino sokolma inam atfag.

¹⁶Inam atfareg NINIKNI Allahn Musa fam ele uruk lit, ”We tot welamuhukteg war aruhunmu humalikisi Israel inap unubam An numalikisi welamuhup ulug sali emberikikon ino it arimanowen pisan isaruk lit An enembol yig nutuk lit kinang kuhup ambeg wereg inaben nunumba ulug wel eneptukon arimano iren oho wel eneptuk lamuhup.

¹⁷Ari eneg turuk lamuhup halug An nahummu het-pet haruk lit yet isamin fug ulug norohole saloho weregma it mondabi siyag amuhup. Alem angginon eke hag eke hag unubam atukmu Ninikni Allah nit sehelimu wereg elegma ari obog toho nunubam teko laruk ulug onoluk aruhu.

¹⁸An numbahalug aben nunumba ulug wel eneptukon arimano iren oho wel eneptuk lit siyag-siyag ane eneg turukon ari fahet Anden let enepmin fug ulug norohole saleg lit eneg welaruhuk.

¹⁹Sini fobik iminon ino[3] haren hahare femihinteg Israel inap enemuwen enembilik fam se roho uruk lamuhuben milal eneptuk lamihin. Fobik oho sini aru feneyen Israel inaben siyag ane turukon inam aruhu.

²⁰Anden kinang fanoma unumbasi fam hiyag isiyag ambeg hondog eneplug lahukmu enehum ouk toho naruk lit enebe oho fit taruk lamuhup. Ari roho eneg turuk lit An numbahalug aben nunumba ulug wel eneptukon iren oho wel eneptuk lamuhup. An fahet inirimen Anden sali unubam emberikik ane pisan isaruk lamuhupmu

²¹alem angginon ekeyon-ekeyon unubam atuk laruhu. Unubam atuk laruhumu sini fobik iminon ino it unumalikisiyen oho enepeleg am fug angge uruk lamuhubon ari feneyen iren siyag ane turukon inam aruhu. Ketiya oho Anden kinang hiyag isahuk ambeg uwan hondog eneplug la fugmu it inindimuwen siyag ane wenggeltukon ari An noluk,” ibag.

²²Allahn hiyag itfag sambil ino eneg Musan sini ino haharoho imbibareg Israel inap milal eneptuk latfag.

²³Milal enepfagma NINIKNI Allahn hun Nun amloho Yosua fam ele uruk lit, ”Hat hindi wirik toho wereg lit Israel inap kinang hiyag isahuk ambeg ngi amuhuben hondog eneplug lahun. An hat men welaruhuk,” ibag.

²⁴Allahn ari-ari turuk lamuhup ulug hiyag itfag ane Musa inowen il misig oho umbusuk fug angge suwesingga fam haharoho imbibareg

²⁵Lewi inap peti e sali roho wirihon Allahn tohon forohowon unubam hiyag isaruk lit,

²⁶”Suwesingga aru peti ino iraham imbik lalihip. Suwesingga haharoho werehon ari feneyen Israel inaben siyag ane turukon fag amag ulug imbik lalihip ambeg eneg welaruhu.

²⁷It ununggul uwag ine anggolo wereg lit Allah ele ying turukon ino an kim isaruk lahi. An noluk welahi li oho it arimanowen NINIKNI Allah ele holtuk eleg angge re an war aruhukmu At ele hum toho ying turukmen eneg welamuhup.

²⁸Ari fahet ketiya Israel inap onowesi men sehen seneg inap milal eneptukon men wol eneplihipmu nambeg wamusama pohol men kinang menen yet nenesugmu anden alem ihiyon fahet hiyag isamin.

²⁹An war aruhukmu ap arimanowen anden hiyag isarikik ane embeseruk lit unubabut siyag anggolo roho welamuhup angge re an noluk. NINIKNI Allahn telep fug peruk ane eneg turuk lit At indi siyahap turuk lamuhupmu alem angginon unubam aruhu,” ulug hiyag isibag.

³⁰Hiyag isibareg Musa inowen Israel inap obog toho onolohotman sini il misig oho umbusuk fug angge hiyag isibahon tu,