Read Angguruk Yali ULANGAN 32 Bible Online

ULANGAN 32 - Angguruk Yali bible

ULANGAN 32

¹”Anden iminon aru poholen oho kinangen oho holeg lamek!

²Osit inggilangge fene pilabik waharuk hag toho anden ap hiyag isaruk lahiyonen oho turuk lamag. Hibilil ino hoholangge fene wamburuk hag toho an nele ari welamag.

³NINIKNI Allah unuk anden suwap turuk lahi. At eneg suwon ulug wel turuk lamek!

⁴NINIKNI Allah helep suwon hag toho weregma alma sakoma heriyeg lahe. Aren we fano ane turuk lit ap obog toho let eneptuk. Ele si ane uk fug angge sali emberukon hikit toho eneg turuk.

⁵Hit hunubabut siyag toho wereg lit At olohotman hare ane eneg turuk lahep. At umalikisi hag toho welahep fug.

⁶NINIKNI Allahn fano ane nunubam turukon ino niren siyahon fam ayeg wabul peruk lahep? Hit hinindi anggat teg eleg hinap welahep! At inowen wal henepfareg hinikni yuhon hag toho fet henesug lit wereg eleg?

⁷Indam teko libag ane wenggel haruk lamek! Nangginfag ulug hiniknisi kapal isahupmu iren hiyag hisahup.

⁸Allah palimuwon inowen ap ununggul unuk obog toho wal enepfareg it arimanowen kinang seneg lamuhup ulug wal-wal og isaruk lit aben nunumbasi ulug wel eneptukon arimano wal tanehen ap ununggul unuk misig-misig fet enesug lamuhup ulug hiyag isibag.

⁹Yakub umalikisi arimano eneg Anden fet enesug laruhuk ulug NINIKNI Allahn mumal enepfag.

¹⁰It arimano lekma ap wereg lam fug teg ke larukmen hiyag enepfareg An nanggengge ulug wanggi waroho fet enesug latfag.

¹¹Suwe kut inowen numalik lam-lam lawag ulug milal eneptukmen malik misig ine elehen mako wamburuk halug aherabul wiriloho senetug aherabul apma walug laruk.

¹²Ari hag toho NINIKNI Allah inggarehen umalikisi og eneplug libag. Og eneplug larukmu aben nunumba ulug wel eneptukon arimano misig oho At iraham welatfag fug.

¹³Tom humon oho seneg lamuhup ulug Aren umalikisi hiyag isarisi. Ininggarehen yatuk angge men kin ahaluwe helep elman wamburukon men naruk latusa. Helep eneg wereg ke arimanowen oho e zaitun wilip atukmu ahaluwe anggolo walug waharuk latusa.

¹⁴Enembohom sapi, kambing, domba arimanowen ag owe anggolo atukmu enembohom umalik sei anggolo reg latisi. Roti anggen fanowon men anggur ahaluwe unduk fanowon men eneg naruk latusa.

¹⁵Allah umalikisi enehum ouk toho naruk lit enebe fit taruk latusareg wamen ap fam hag sururup turuk hag toho iren Allah wal enepfag ahun ino fahet inirimen let eneptuk latisi ahun ino embeserusa.

¹⁶Aben nunumba ulug wel eneptukon arimano iren oho wel eneptukmu Allahn indimu olok haruk latisi.

¹⁷Iren mungguwat Allah hag toho wereg elehon unubahet hubu lahaptuk latusa. Iniknisiyen enepeleg latfag angge famen unumalikisiyen we ket eneg onoluk atisimu enekol toho wereg.

¹⁸Allah indag enepfahon ino helep suwon hag toho weregma alma sakoma heriyeg latusa angge famen enepeleg atusa.

¹⁹NINIKNI Allahn yet isarukmen umalikisiyen indi siyahap turuk latuson ari fahet At inggik kobog isarisi.

²⁰At ele uruk lit, ’Let enepmin fug ulug norohole saloho wereg lit nangginuhup ulug yet enesug laruhuk. Ap arimano ununggul uwag ine anggolo reg lit inindi wirik toho wereg elehen An numbaharuk.

²¹Usangge Allah hag toho fuhon ino fahet tu Allah hag toho wereg ulug wirim turuk ane inowen An nindi siyag atisimu Anden ap yatmon mun ane man ane enepeleg inap numalikisiyap enebuhukon fahet it inindi siyag aruhu.

²²An nolok het-pet haruk lahiyon ino indok ambulpul hag toho wilip aruhureg kinangma wereg angge obog toho naruk lit kinang apma ap warehon wereg ambeg oho nil laruk lit tom humon alem oho obog toho nahu.

²³Tog minggin Anden tohon obog toho fam unusuruk lit alem angginon eke hag eke hag unubam emberuk laruhuk.

²⁴Suburu obok men inahan men ouk alem suwon eke oho unubam atukmu war atuk lamuhup. Anden olomeneyen senggel enebukag ulug mon enebuhukmu pisanggo olokonen oho fato eneptuk laruhu.

²⁵Selman tog fam unusurukmu olma werehon arimano enekolen war amuhup. Malik kabiniyonet hiyap tuhumonet malik fuwon oho ap sabalon oho war amuhup.

²⁶It ununuk mondabi eleg amag ulug obog toho unusele angge famen

²⁷Israel inap men seli roho werehon arimanowen enele hemet toho uruk lit, ’Nit nininggarehen unusurukuk,’ uhup tohon mondabi elehap enebuhuk fug. An Allah namuwen unusuhukon fahet ap seliyon arimano inindi sohu roho welamuhup fug,’ uruk.

²⁸Israel inap inindi anggat teg elehen fuki roho wenggeltuk eleg.

²⁹Inindi hebel alep halug nangginuhuk ulug fano roho wenggel haruk lalep.

³⁰Ap misihen Allah umalikisi teng-teng angge 1.000 nangginoho mug isa reg? Ap pirenen ap inggili-anggolo 10.000 ke roho yanggal enebuk teg? NINIKNI Allahn umalikisi ili og eneplep angge famen inggik kobog isarisimu ap seliyon ininggikmu amuhup.

³¹Allahn umalikisi Israel inap ili og eneptuk hag toho nit ili og neneptukon eke wereg eleg ulug ap seliyon arimanowen onoluk atisi.

³²O Sodom Gomora inap onolok toho welatfag hag toho ap seliyon arimano oho wereg. Hele anggur anggen sig anggolowon aben narukmu war atukon hag toho it unubabut wereg.

³³Pisanggo olokonen ap unusimin ulug fato eneptuk hag toho iren oho turuk.

³⁴Ap seliyonen Allah umalikisi unubam siyag ane turukon ino fahet NINIKNI Allahn apeleg am fug angge indimu wenggel haruk lit welaruhu.

³⁵ NINIKNI Allahn ir oho ayeg waroho unusurukmu mako wamburuk lit war amuhup. Siyag amuhup sambil ino horog teg.

³⁶ NINIKNI Allahn umalikisi inine mondabi eleg atukmu yet isahureg namingmingangge nindiyen ulug ili og enebik waruhu.

³⁷Waruhureg Aren umalikisi kapal isaruk lit, ’Hiren nunumbasi ili og neneptukon ulug wel eneptuk lahebon arimano kema wereg?

³⁸Hiren wam sei men anggur ahaluwe men emberuk lahebon iren naruk angge re ketiya wamusareg ili og henebik wamag!

³⁹We An namu eneg Hinikni Allah welahi. An hahon winon eke wereg eleg. Anden ap unusuruk lahi, ap onolukap eneptuk lahi. Anden ap yowil toho unusuruk lahi, ap hihir eneptuk lahi. Anden watmin perukon arimano ap misihen oho An ninggikmuwen teloho windat enebuhu fug.

⁴⁰An mondabi noluk welahiyonen ninggik leho lit nele tik-tem toho uruk lahiyon tu:

⁴¹Karog Anden tohon umbagpag turukon ino Anden umaho felug An fahet inirim teg lit nele ying naptuk inap arimano ayeg waroho unusuhuk.

⁴²Anden ap onoluk angge sen enebuhukon oho ap tog sinar unusuhukon oho pinggi unusuhukmu tog minggin Anden tohon arimano fene mep eneg aruhu. An men tog abul ulug waharukon arimano obog toho Anden karog fam unusuhuk,’ uruk.

⁴³Umalikisi unusuruk inap NINIKNI Allahn hebeloho unusurukon fahet hit kinang atogman atogma welahebon obog tohowen Allah umalikisi ununuk suwap eneptuk lamuhup. Allah ele ying turuk inap arimano Aren unusuruk lit umalikisiyen siyag ane turukon eleha feselug enengginang oho fanowap turuk,”

⁴⁴ulug Musa men hun Nun amloho Yosua menen Israel inap obog toho onolohotman sini aru uruk latfag.

⁴⁵Allahn hiyag itfag ane obog toho Musa inowen Israel inap hiyag isibareg

⁴⁶nin ele uruk lit, ”O yoho anden hiyag hisaruk lahiyon obog toho hinindimuwen wenggel haruk lit hunumalikisi hiyag isaruk lamuhupmu iren oho NINIKNI Allahn komo neneptuk ane hikit toho turuk lamuhup.

⁴⁷Aren komo neneptuk ane aru si-si ane uruk puk fug angge nonoluk welamuhuk ane hiyag nisaruk peruk lamuhup. Wene ari hikit toho turuk lamuhup halug hit kinang ik Yordan paloho kuhup ambeg ino amusun toho welamuhup,” ibag.

⁴⁸Ari ibag sambil ino NINIKNI Allahn Musa fam ele uruk lit,

⁴⁹”Moab kinangma o pumbuk Yerikho fuma fil tom wereg ke o Abarim lahunteg tom Nebo fam lahakun. Lahakunteg kinang Kanaan Israel inap og isahuk ambeg ino yet hahun.

⁵⁰Hot Harun ino tom Hor fam war atisi hag toho har oho tom lahakunon ino famen eneg war aruhunteg humbasi men mangno aruhun.

⁵¹Hit hunumalikisi Israel inap men Zin lekma o pumbuk Kades horogma ik elerukmu o Meriba wereg lit hit pirenen An fahet awiya waruk lit Israel inap onolohotman wel naptuk latikip fug.

⁵²Ari fahet kinang humalikisi hiyag isahuk ambeg ino hat kuk fug angge yatman eneg yet hahun,” ulug hiyag itfag.