Read Angguruk Yali ULANGAN 33 Bible Online

ULANGAN 33 - Angguruk Yali bible

ULANGAN 33

¹Allah amingmingangge Musa ino war atukon horog teg li Israel inap arimano Allah unuk fam hi eneptuk lit,

²”NINIKNI Allah tom Sinai famen waharuk lit mo lahik waharuk hag toho tom Edom feneyen asinandi pilabik libag. Tom Paran ino famen At umbagpag turukon seleg ino umalikisi unubam yarik watfag. Waharukmu otsi malaikat teng-teng angge winag isa fug toho walinggoho kilabegma At inggik pikit filen indok ambulpul turuk latfag.

³NINIKNI Allahn umalikisi tem toho indi isaruk lit An nindi pulmu welamag ulug inggiken sen enesug. It arimano At uyug alma heriyeg lit ele fuki roho holtuk.

⁴Allahn komo enebuhun ulug Musa hiyag utukmu aren nit milal neneptisiyon arimano niren ngi atukuk.

⁵Israel inap ununggul unuk obog toho onowesi men palu atusama NINIKNI Allahn it Inikni suwon raja atisi,” ibag.

⁶Musa inowen ununggul unuk Ruben inap unubahet uruk lit, ”Ruben inap enebe we tor angge wereg angge famen eleg amuhup fug,” ibag.

⁷Ununggul unuk Yehuda inap unubahet ele uruk lit, ”NIKNI Allah, Yehuda inaben enele uruk lit, ’Haren hondog neneplug nonori men misigmu palu nenebin,’ urukon hol himin! Haren it inibikit atuk lit unusul peruk inap men tog abik lahun,” ibag.

⁸Ununggul unuk Lewi inap unubahet Musan ele uruk lit, ”Allahn fobik tuhuk peruk ane nonoluk amag ulug enehangge hik isarukon Urim men Tumim men hiren foroho lamuhup ulug Hat Allahn Lewi inap Hat men ininggik ahandip toho werehon arimano unubam emberikin. An wenggel niyawag ulug o Masa inowen wal isaruk lit ik elerukmu Meriba suwahal unubam uruk latikin.

⁹Lewi inap arimanowen iniknisi inisingasi onori unumalikisi men inindi isanggoma teberuk lit we Hat eneg inindi pulmu emberuk latusa. Hat hele holtuk lit it unubam sali emberuk latikinon hikit toho turuk latusa.

¹⁰Numalikisiyen ari-ari turuk lamuhup ulug Haren komo eneptikin ane iren milal eneptuk lamuhup. Iren wam waroho yaltuk lit Hat hubahet hubu lahaptuk lamuhup.

¹¹NIKNI Allah, inine roho welamag ulug let enebuhun. Iren fano roho yabuk wituk ulug hahiyeg toho welaruhun. It unubahet inirim peruk inap arimano unuwag sombo roho lahap enebuhunmu in amuhup fug,” ibag.

¹²Ununggul unuk Benyamin inap unubahet Musan ele uruk lit, ”It arimano NINIKNI Allah indi pulmu wereg. Aren likiya hupmu fet enesugmu inindi yuwag toho tom honggoleg ke wereg,” ibag.

¹³Ununggul unuk Yusuf inap unubahet ele uruk lit, ”NINIKNI Allahn ap arimano enengginang fam osit pilabik waharukmu kinang apman oho ik anggolo wilibig waharuk laruhu.

¹⁴Mo men pikalem men fano yatukmu anggen yihik feruk li itano anggolo atuk laruhu.

¹⁵Tom amukasi wal tibahon arimano famen fano-fano angge anggolo wilip atukmu

¹⁶it enengginang ke arimano anggenen keleg aruhu. NINIKNI Allah e alog ahen sehelimuwen ele ibahon inowen Yusuf inap arimano indi enesug laruhu. Ori sehelimuwen Yusuf ino palimu atfag angge re aren ondohowonen ondohowon arimano oho Allahn let eneptuk laruhu.

¹⁷Yusuf inap arimano inine wam sapi uwaliyon hag toho wereg. Yusuf umalikisi Manasye inap enebe teng-teng angge men Efraim inap winag isa fug tohon men wam sapi farema werehon andimbuk ineyon hag toho unubabut wereg. Wam andimbuk fam ap unusimin ulug turuk hag toho it arimanowen ap o pumbuk winon-winon kinang atogma lawag ulug yanggal eneptuk lamuhup,” ibag.

¹⁸Ununggul unuk Zebulon inap men Isakhar inap men unubahet ele uruk lit, ”Zebulon inap arimano ik saho ahik paloho lalug fano-fano angge anggolo ayeg waroho walug waharuk lamuhupmu Isakhar inap oho inibam wereg lit fano welamuhup.

¹⁹Nenentom suwon ino fam nit men ambiyeg wam fanowon siyag teg elehon Allah fahet waroho yaltuk lamuhuk ulug ap o pumbuk winon oho wol eneptuk lamuhup. Ik saho ahik ayegma yinggi wereg ke men ik ahum ke men laruk lit tung inap atuk lamuhup,” ibag.

²⁰Ununggul unuk Gad inap unubahet ele uruk lit, ”Gad inap kinang hili yat toho hiyag isahuwon fahet Allah wel turuk lamek! Olomeneyen ap unusimin ulug kema sap teg hag toho wereg lit Gad inap arimanowen ap seliyon ininggiket ununggulet kong-kong hik isaruk lamuhup.

²¹Kinang mondabi fanowon hilahupmu ap suwon eke angginang oho it og isahup. Israel inap onowesi suwon arimanowen turuk hag toho NINIKNI Allahn ari-ari turuk lamuhup ulug emberisi ane hikit toho turuk lamuhup,” ibag.

²²Ununggul unuk Dan inap unubahet ele uruk lit, ”It arimano olomene kabiniyon o Basan fareman hik toho wilip atukon hag toho wereg,” ibag.

²³Ununggul unuk Naftali inap unubahet ele uruk lit, ”It enengginang ik Galilea yenggelehon famen tulug ik ambut fil weregma NINIKNI Allahn indi enesug lit anggen anggolo og isaruk laruhu,” ibag.

²⁴Ununggul unuk Asyer inap unubahet ele uruk lit, ”Allahn ap ununggul unuk winon indi uwalma teberuk lit Asyer inap eneg nindi pulmu wereg ulug fet enesug. Oriyen oho Asyer inap inindi enesug lamuhup. E zaitun anggen anggolo aruhumu ahaluwe arimano fam unuyug umatuk lamuhup.

²⁵Inibam walinggoho elehet oko kilabegma sok kurukon arimano ine angge besi fam wituk lit yuwag toho weregman eneg welamuhup,” ibag.

²⁶Musan nin ele uruk lit, ”Hit Israel hinap Hinikni Allah hahon winon eke wereg eleg. At palimuwon inowen numalikisi let enepmin ulug pohol keyen hina fene waharuk.

²⁷Indamen tulug ketiya oho inggiken leg henesug lit wanggi waroho fet henesugmen eneg welaruhu. Aren hit honolohotman ap seliyon yanggal eneptuk lit unusilihip ulug hiyag hisaruk latisi.

²⁸Yakub umalikisiyen ondohowon arimano welamuhup ambeg arimano poholman hibilil anggolo pilabik waharukmu roti anggen men anggur ahaluwe menen keleg aruhu. It ap winonen siyahap enebuk fug angge weregma enebe yuwag toho welamuhup.

²⁹NINIKNI Allahn nit windat neneptuk hag toho ap o pumbuk winon ap san oho let eneptuk eleg ulug henehiyeg toho welamek! NINIKNI Allah hit fahet karog men sing men hag toho wereg lit hinibil atukmu ap seliyon obog toho unusuruk lamuhup. Ap seliyon arimanowen hinindi nesemek ulug heng heneptuk lamuhup angge famen hiren hinindi isa fug angge hunuyuhen sobit-sabar isaruk lamuhup,” ibag.