Read Angguruk Yali ULANGAN 4 Bible Online

ULANGAN 4 - Angguruk Yali bible

ULANGAN 4

¹Musa inowen Israel inap hiyag isaruk lit, ”Allahn ari-ari turuk lamuhuben hiyag isahun irisiyon anden hiyag hisaruk lahi ane obog toho holtuk lit ari hikit toho turuk lamuhup halug hit honoluk weregman eneg nunumbasi INIKNI Allahn kinang og hisahuwon fam kuhupteg ngi roho welamuhup.

²Anden hiyag hisaruk lahiyon il misig oho umbusuk fug angge nin alem anden hiyag hisaruk lahi fuhon eke un ane milal eneptuk lamuhup fug. NINIKNI Allahn komo enebuhun irisi ane anden hiyag hisaruk lahiyon aru eneg holtuk lamuhup.

³Allah NINIKNI inowen punu Peor famen Baal fam nunumba ulug wel turuk inap hit sehelimuwen unusirisi ane hit hininggareg hinilen yet harikip.

⁴Hit Allah NINIKNI men hininggik ahandip toho welatikibon aruma ketiya oho honoluk welahep.

⁵Allah NINIKNI inowen ari-ari turuk lamuhup ulug hiyag nitisi ane hikit toho eneg anden hiyag hisaruk lahi. Anden uruk lahiyon aruma kinang kuhup ambeg wereg lir oho seneg lamuhup.

⁶Hininggik ine roho seneg lit turuk lamuhup halug ap winonen hol haruk lit Allahn komo eneptukon hikit toho turuk urukmu hol hahupteg, ’Israel inap arimano inindi anggat teg,’ ulug enele uruk lamuhup.

⁷Allah NINIKNI nit horog toho wereg lit let neneptukon ino hahon ap anggolo roho wereg ambeg o pumbuk eke fam wereg ano? Niren let nenebin ulug nenele urukmu Aren alpal nisaruk eleg.

⁸NINIKNI Allahn mun ane man ane haloho emberuk lamuhup ulug fano roho komo neneptisi ane anden o yoho hiyag hisaruk lahiyon hahon o pumbuk suwon eke fam wereg ano?

⁹Hit hinilen yet harikip ane mondabi henepeleg am fug angge honoluk toho foroho lit hunumalikisi hunumbusagsi men hiyag isaruk lamuhup.

¹⁰Hit tom Sinai alma Allah NINIKNI olohotma unduhuk latikibon ino henepeleg aruhu fug! O ino sambil At inowen an nubam hiyag nutuk lit, ’Israel inap palu enepmihinmu Anden hiyag isamin ane hol halusareg it onoluk wereg lit An nubahet enekol toho welamuhup ane fahet onoluk aruhumu iren oho unumalikisi hiyag isaruk lamuhup,’ irisimu

¹¹hit horog toho waharikipteg tom alma unduhukmu tom ino famen indok ambulpul suwon poholma laharikim hina singonen tom ino hililip tirisi.

¹²Hililip tegma itano NINIKNI Allahn indok sehelimuwen ele hiyag hisarukmu holtikip angge famen At ebe yet harikip fug.

¹³Ele uruk lit, ’An numalikisi roho wereg lit ari-ari turuk lamuhup,’ ulug sali emberisiyon alem numen itano helep piren fam haharoho emberisi.

¹⁴Wene ino fobik kuhup ambehen foroho lamuhuben haren milal eneptuk laruhun irisi,” ulug Musan hiyag isibag.

¹⁵Musan ele uruk lit, ”Tom Sinai famen NINIKNI Allahn indok sehelimuwen ele hiyag hisarukmu holtikip angge famen ebe yet harikip fuhon ino fahet henepeleg am fug angge welamok!

¹⁶Ari fahet tu Allah hag toho wereg ulug usangge hininggik fam wit taruk lit siyag ane turuk lamuhup fug. Usangge ap, hiyap,

¹⁷wam pak mene kinangma werehon, suwe pohol ke larukon, kinang ke lobul til larukon, ikan ikma werehon hag toho wit taruk lamuhup fug.

¹⁸

¹⁹Hit hinil leko mo pikalem suhal poholma werehon yet halug nunumbasi wereg ulug wel eneptuk lit un ane turuk lamuhup fug. Ap winonen mo pikalem suhal wel enebukag ulug Allah NINIKNI inowen imbibag angge famen

²⁰hit An numalikisi welamag ulug o Mesiren asengseng anggolo roho welatikip ambehen hondog heneplug wilip atisimu ketiya oho At umalikisi roho welahep.

²¹Hiren henele siyag toho uruk latikip ane ariyen Allah NINIKNI inowen an pet naptuk lit, ’Hat ik Yordan paloho kinang fanoma Anden Israel inap hiyag isahukon fam kuhun fug,’ ulug sali emberisi.

²²Sali emberisiyon hikit toho an tuma war aruhukmu hit eneg ik Yordan paloho kinang fanowon fam kuhup.

²³Allah NINIKNI inowen An numalikisi roho welamuhup ulug sali emberisiyon henepeleg aruhu fug! Poholma kinangma ikma werehon eke wirim toho usangge wit tahup fug ulug Aren irisi ane pisan isalug wibuk fug.

²⁴Tu Allah hag toho wereg ulug wirim turukon ino fahet Allah NINIKNI ino olok haruk lit indoken narukon hag toho turuk.

²⁵Hit kuhup ambehen amusun toho weregman hunumbusagsi welamuhup li oho usangge wibuk fug ihiyon wit taruk lamuhup fug. Wit taruk lamuhup halug Allah NINIKNI inowen siyag ane nolohotma turuk ulug olok hahu.

²⁶Allah indi siyahap turuk lamuhup halug kinang kuhup ambeg inowen amusun toho welam fug angge folo-folo eleg amuhup. O yoho pohol men kinang menen yet nasugmu nele aru hiyag hisaruk lahi.

²⁷Fobik NINIKNI Allahn hit o pumbuk ap winon wereg ke arimano hik-hak hisahumu we tor angge honoluk welamuhup.

²⁸Hik-hak hisahu ambeg arimanowen usangge ap ininggiken e helep fam witukon arimano fam nunumbasi ulug wel eneptuk lamuhup. Wel eneptuk lamuhubon arimano inil hupnihon, henele holuk fug tehon, mun angge man angge na fug angge enemben pal isa fug tehon unubam nunumbasi uruk lit welamuhup.

²⁹Welamuhup li itano hiren Allah NINIKNI hinindi men henehur angge menen yami ruruk lamuhup halug hiyahakup.

³⁰Alem angginon anden ihiyon aruma hit hunubam aruhumu asengseng toho wereg lit Allah NINIKNI ambeg suhuloho wamuhupteg At ele eneg holtuk lamuhup.

³¹Allah NINIKNI ap indi enesug lit werehen it unumbasi unubam sali imbiyahon ino pisan isamin fug ulug inggik kobog hisa fug angge siyahap henebuhu fug.

³²Allahn hit hunubam turuk ane ari hahon amukasi hit uwanma ap kinangmon wal enepfag sambilen tulug ketiya oho teko larisi urukmu holtukon wereg ano ulug kinang atogman atogma kapal isil lahup!

³³Allahn indok sehelimuwen ele hiyag hisarukmu holtikip angge famen war atikip fug hag toho o winama eke ari roho teko larisiyon wereg ano?

³⁴Allah NINIKNI inowen hit o Mesiren wiliboho hondog heneplug umalikiyap heneptisi. Ari hag toho nunumba ulug wel eneptukon ekeyen ap winon ap seliyon ininggikmuwen teloho og eneptuk lit numalikisiyap enebuhuk ulug wal harisiyon wereg ano? Anden wal isamin ulug Allahn o Mesiren inggik ineyon fam ap seliyon unusuruk lit aben tuk fug teg ane alem eke hag eke hag turuk lit ap enekolap eneptisimu hinilen yet harikibon arimano henepeleg atisi?

³⁵NINIKNI Allah we misig werehon hahon winon eke wereg eleg peruk lamuhup ulug alem arimano obog toho hit honolohotman turuk latisi.

³⁶Komo enepmin ulug poholman ele hiyag hisarisi. Indok Aren kinangma monde ferisiyon hiren yet haruk lit indok seheli keyen ele hunubam irisiyon hol harikip.

³⁷It unumbasi Anden nindi enesug latik iyag inaben ondohowonen ondohowon werehen An numalikisi roho welamuhup ulug hit mumal heneptuk latisi. Mumal heneptuk lit inggareg inggik ineyonen o Mesiren hondog heneplug wilip atisi.

³⁸Kinang Kanaan ino hit ketiya ngi amuhuben Kanaan inap hit men wirim teg elehon enebe anggolowen inine roho wereg inap arimano hit honolohotman Allahn yanggal enebuhu.

³⁹Ari fahet NINIKNI Allah hahon poholma kinangma eke wereg eleg ulug ketiya famen honoluk toho welamuhup.

⁴⁰Allahn ari-ari turuk lamuhup irisi ane anden o yoho hiyag hisaruk lahiyon aru hiren hinine roho seneg lamuhup. Seneg lamuhup halug hit men hunumalikisi fobikon men kinang Allah NINIKNI inowen mondabi ngi amuhup ulug og hisahuwon fam fano roho weregman eneg welamuhup,” ulug hiyag isibag.

⁴¹Welatfareg Musa inowen o pumbuk hinahan ik Yordan yali fil werehon ap unusulug larukon ili og eneptuk ambeg umbuhup ulug hiyag isibag.

⁴²Ap ekeyen are fahet nirim puk fug anggeyen inggik fam tor angge kik harukmen war aruhu halug ap ino nuwabuhup tohon ulug o pumbuk itano eke larukmu ili waruk lamuhup ulug sali imbibag.

⁴³O pumbuk hinahan imbibahon itano ununuk tuma ul: Ununggul unuk Ruben inap fahet o Bezer tom atelma tonggo ke werehon ino imbibag. Gad inap fahet o Ramot kinang Gilead fam werehon ino imbibag. Manasye inap fahet o Golan kinang Basan fam werehon ino imbibag.

⁴⁴Israel inap arimano o Mesiren wilip atfagma Musan alem tuk teg ane eke hag eke hag hiyag isibag ane men ari-ari tuk fug ulug komo enepfag ane men apma ul.

⁴⁵

⁴⁶Musan hiyag isibag li itano Israel inap arimano ik Yordan yali fil o Bet-Peor horogma kinang Amori inap onowe suwon Sihon ibam o Hesbon welatfahonen seneg latfahon fam welatfag. Sihon ino Musa umalikisi Israel inap menen apmayap tibareg

⁴⁷at angginang ilmig tibag. Ilmig tibareg o Basan inap onowe suwon Og oho apmayap tibareg Basan kinang ino ngi arik kibag. Ari roho turuk lit Amori inap onowesi piren ik Yordan yali fil welatfahon itano enengginang obog toho ilmig tibareg

⁴⁸o Aroer ik Arnon ayegma werehon famen tulug tom Siryon unuk eke Hermon suwalehon men

⁴⁹kinang ik Yordan ilanma yali fil werehon men kinang ik Il Warehon ayegma tom Pisga alma werehon men fam Israel inap ngi atfag.