Read Angguruk Yali ULANGAN 5 Bible Online

ULANGAN 5 - Angguruk Yali bible

ULANGAN 5

¹Welatfareg Musa inowen Israel inap obog toho palu arik maniyek ulug wol enepfag. Wol enepfareg it unubam ele uruk lit, ”Israel hinap, nori, alem tuk teg ane eke hag eke hag o yoho tu fam hiyag hisaminon ari hiren milal taruk lit hinine roho seneg lamuhuben holeg lamok!

²Nit tom Sinai alma weregma NINIKNI Allahn An men hit men nininggik ahandip toho welamuhuk ulug sali emberisi.

³NINIKNI Allahn sali ari nit niniknisi war atuson unubam eneg emberisi puk fug! Nit nonoluk welaheyon o yoho palu arik waheyon aruma obog toho nunubam emberisi.

⁴NINIKNI Allahn tom ino famen indok ambulpul sehelimuwen ele uruk lit hit men nonorohole ambimu nenele ul ulug turukmen

⁵hit indok fahet henekolen tom ino fam laharikip fug. Laharikip fugmu an NINIKNI Allah men hit men honggolegma in arik larikikteg NINIKNI Allahn ele irisi ane hiyag hisarikik. Ele irisi ane anden hiyag hisarikikon tu:

⁶’Allah HINIKNI hit o Mesir inaben enemingminganggeyap heneptukmu hondog heneplug wilip atikikon An tu welahi.

⁷Aben wel turuk angge winon wel enebuk fug angge we An nubam eneg wenggel niyaruk laruhun.

⁸Poholma kinangma ikma wereg angge wirim toho hinggiken lale ferukon fahet, ’Tu Allah hag toho wereg,’ ulug wirim tuk fug.

⁹An HINIKNI Allah men mun angge man angge kinangma werehon men wirim naptukon fahet nirim peruk lahireg hinggiken laltuk angge wel eneptuk laruhun fug. An enembol yig nutuk inap arimano unumalikisi men unumbusagsi men unumbasi men Anden alem angginon unubam emberuk laruhuk.

¹⁰Aben An inindi nasug lit nele holtuk inap arimano Anden hebeloho nindi enesugmen eneg it arimanowen endebuhubonen endebuhubon arimanowen endetil lahubon oho let eneptuk laruhuk.

¹¹An nunuk saplangge uruk laruhun fug. Aben An HINIKNI Allah nunuk saplangge urukon arimano Anden alem angginon unubam emberuk laruhuk.

¹²O sabir angge An wel naptuk sambil fahet hindi holuk toho welaruhun ulug An HIKNI Allahn hiyag hutuk lahi.

¹³O falfalikenam o yabuk wituk laruhun.

¹⁴O sabir angge kel taruk lit An fahet wenggel niyaruk laruhun. O ino sambil hat humalikisi men hamingmingangge men hambohom oho ap pohon hat hibam werehon oho yabuk mun ane man ane wituk lamuhup fug. Hat kel taruk laruhun hag toho hat hamingmingangge oho kel taruk lamuhup.

¹⁵Indam o Mesir inaben hininggik lisoho mingming heneptukmu An HINIKNI Allah ninggik ineyon fam o Mesiren hondog heneplug wilip atikikon ino henepeleg aruhu fug. Ari fahet o sabir angge kel taruk lit An fahet wenggel niyaruk laruhun ulug An HIKNI Allahn hiyag hutuk lahi.

¹⁶ Hikni hisinga enele holtuk lit let eneptuk laruhun! Ari turuk laruhun halug hat fano wereg lit amusun toho kinang Anden og hisahukon fam weregman eneg sabal atuk laruhun.

¹⁷ Ap hiyap unusuruk laruhun fug.

¹⁸Hat ap welahenonen ap unuhesi hilaruk laruhun fug, hat hiyap welahenonen oho ap winon hilaruk laruhun fug.

¹⁹Aben tohon yoholiyangge hilaruk laruhun fug.

²⁰Hilen fum toho isa fug angge hori fahet un ane uruk laruhun fug.

²¹Ap unuhesi, inibam, enengginang, enemingmingangge, enembohom sapi men keledai men, ap enenggengge winon oho hilik ulug hilaruk laruhun fug,’ ulug Allahn hiyag hisarisi.

²² Irisi ane ari NINIKNI Allah hina anggulog singonen hililip tegma tom famen indok ambulpul sehelimuwen ele hum toho hit Israel hinap palu roho welatikibon obog toho hunubam hiyag hisarisi. We ita hiyag hisaruk lit alem winon fahet hiyag hisarisi fug. Hiyag hisarisiyon ari helep piren fam hahare ferisireg og nitisi,” ulug hiyag isibag.

²³Musan ele uruk lit, ”Tom ino indok ambulpul turuk lit weregma o hik sehelimuwen ele irikim holtikipmu hit hununggul unuk welahebon hiniknisi men honowesi men an niraham waharusareg

²⁴enele uruk lit, ’O yoho NINIKNI Allah suwon umbagpag turukon ino nit nonolohotman inam ahama At ele oho indok ambulpul sehelimuwen urukmu holehe. Holeheyon ariyen Allahn ap kinangmon unubam ele urukmu hol halug war atuk eleg ulug nonoluk aha angge famen

²⁵indok humon ariyen wiyaloho lin ila ulug nenekol toho welahe. Niren NINIKNI Allah ele nin holtuk lamul halug war amul.

²⁶Allah oluk werehonen indok ambulpul sehelimuwen ele urukmu hol hehe angge famen war ahe fug hag toho ap kinangmon winon sa ubam ari roho teko larisi?

²⁷Ari fahet hat aru At horogma lamihinteg NINIKNI Allahn ele imisiyon holmihinteg haren nit hiyag nisamihin. Hiyag nisamihinon niren holtulteg Allahn imisiyon hikit toho turuk lamuhuk,’ urusa.

²⁸Ari urusama NINIKNI Allahn an nubam ele uruk lit, ’An numalikisiyen eheson ari holihi. Iren hat hubam heng habehesa ane ari fano ehesa.

²⁹Heng habehesa ane ari An fahet inindi enekol toho wereg lit ehesa hag toho fobik oho ari roho welamuhup! It inindi An fahet enekol toho wereg lit Anden hiyag isaruk lahiyon inine roho seneg lamuhup halug it men iren endebuhubonen endebuhubon men fano roho weregman eneg welamuhup.

³⁰Lamihinteg it unubam, ’Hit hinibam o sabo wal taneg lalihip,’ ulug hiyag isamihin.

³¹Hat eneg An niraham unduhukmu alem tuk teg ane eke hag eke hag men aben tuk fug teg ane men hiyag hitmin. Hiyag hitmin ane alem arimano obog toho haren Israel inap aruma milal eneptuk laruhunmu kinang Anden og isahukon fam kuhupteg wereg lit Anden alem tuk teg ane fahet iminon hikit toho turuk lamuhup,’ ulug hiyag nitisi.

³²Ari fahet NINIKNI Allahn ari-ari turuk lamuhup ulug komo heneptuk ane obog toho hinine roho seneg lit ke hareyon la fug angge

³³ke pikiron NINIKNI Allahn hiyag hisarukon eneg laruk lamuhup. Ari roho laruk lamuhup halug hit fano wereg lit amusun toho kinang Anden og hisahukon fam weregman eneg sabal atuk lamuhup.