Read Angguruk Yali ULANGAN 6 Bible Online

ULANGAN 6 - Angguruk Yali bible

ULANGAN 6

¹Musan ele uruk lit, ”Israel inap kuhup ambeg inowen ari-ari turuk lamuhuben hiyag isahun ulug Allah NINIKNI inowen hiyag nitisi ane anden hiyag hisaruk lahi.

²Hit men hunumalikisi fobikon men Allah NINIKNI fahet henekol toho weregman eneg At awene anden hiyag hisaruk lahiyon aruma hikit toho turuk lamuhup halug amusun toho welamuhup.

³Ari fahet, Israel hinap nori, fano roho holtukon hikit toho turuk lamuhup halug Allah nunumbasi INIKNI inowen sali imbibag ane hikit toho kinang ag owe men kin ahaluwe men eleg am fug angge mondabi wereg ambeg fano roho weregman eneg henebe anggolo atuk lamuhup.

⁴Iminon aru Israel hinap holeg lamok! NINIKNI Allah we misig, At ino eneg NINIKNI wereg.

⁵HINIKNI Allah hinindimuwen hinindi reg lamok. Henehime men henebe obog tohowen hinindi reg lit hinine roho turuk lamuhup.

⁶O yoho anden hiyag hisaruk lahiyon aru henepeleg am fug angge

⁷olman funggalman nohuk oho lir oho in atlug oho nenele ninirim ulug umbusuk fug angge hunumalikisi hiyag isaruk lamuhup.

⁸Wene ari nenepeleg aruhu fug ulug hininggikmu men hinilahuwagma men pug toho foroho lamuhup.

⁹Elehet o pumbuk walinggoho ohowon sok kurukon men hit hinibam kurukon sokole umbangguwag ke men haharoho umbuhup,” ibag.

¹⁰Musan ele hiyag isaruk lit, ”Allah NINIKNI inowen nunumbasi Abraham, Ishak, Yakub unubam hiyag isaruk lit, ’Kinang hit hunumalikisi fobikon og isahuk,’ ulug sali imbibahon fam ketiya hondog heneplug kuhu. O pumbuk suwon fanowon hiren wit tarikip fuhon fam hondog heneplug kuruk lit

¹¹o arimano undama fano angge keleg toho werehon hiren umbat tarikip fuhon hit og hisahu. Ik fahet hiren habultikip fuhon hit hiyag hisaruk lit anggur yabuk men e zaitun ahaluwe werehon hiren yatikip fuhon men og hisahu. Og hisahuwon arimano hit ngi amuhupteg honolombik yuwag atuk lit henehum ouk toho naruk lahe peruk lamuhup halug

¹²hit Mesir inaben hininggik lisoho emberukmu NINIKNI Allahn hondog heneplug wilip atisiyon ino henepeleg am nowen honoluk toho welamuhup.

¹³Allah NINIKNI fahet henekol toho wereg lit At ele eneg holtuk lamuhup. Aben tem toho ehek pukag ulug Allah unuk fam eneg henele wirik toho heneyeg fam uruk lamuhup.

¹⁴Ap hit walinggoho werehon arimanowen nunumba ulug wel eneptukon arimano hiren oho wel eneptuk lamuhup fug.

¹⁵Wel eneptuk lamuhup halug Allah NINIKNI inowen olok haruk lit kinangma tuman elehap henebuhu rohon! Allah NINIKNI nit sehelimu werehon inowen tu Allah hag toho wereg ulug wirim turukon fahet nirim peruk.

¹⁶Hiren o Masa inowen Allah NINIKNIYEN let nenepmisi ano ulug wal hul ulug ele ying turuk latikip hag toho eke wal haruk lamuhup fug.

¹⁷Ari-ari turuk lamuhup ulug komo heneptuk latisiyon arimano obog toho seneg lamuhup.

¹⁸NINIKNI inowen fano telep peruk ane ino hikit toho turuk lamuhup halug hit henebe fano weregman eneg kinang fanowon NINIKNI inowen nunumbasi fam sali imbibahon ino ngi atuk lit

¹⁹Aren ibag ane hikit toho ap seliyon yanggaloho wilip enebuhup.

²⁰Fobik hunumalikisi arimanowen, ’Nungge fahet Allah NINIKNI inowen, ’Anden komo heneptuk lahi ane hikit toho eneg turuk lamuhup,’ ulug hiyag nisarisi?’ ulug kapal hisaruk lamuhupmu

²¹hiren hebeloho hiyag isaruk lamuhubon te tu, ’Nit indam Mesir inap onowe inowen nininggik lisoho emberukmu NINIKNI inggik ineyon inowen teloho hondog neneplug wilip atisi.

²²NINIKNI inowen Mesir inap men onowe men amingmingangge men siyahap eneptuk lit enehangge aben tuk fug tehon anggolo tirisimu niren yet harukuk.

²³Kinang unumbasi unubam sali imbiyahon ino ngi amuhuben hondog eneplug lahuk ulug o Mesiren og neneplug wilip atisi.

²⁴Wilip atisireg Allah NINIKNI inowen An fahet henekol toho wereg lit Anden komo heneptuk lahi ane hikit toho turuk lamuhup ulug hiyag nisarisi. Hiyag nisarisi ane hikit toho welamuhuk halug Aren fet nenesugmen eneg ketiya fano welahe hag toho fobik oho welamuhuk.

²⁵Hiyag nisarisi ane ino ninindi wirik toho seneg lamuhuk halug Aren nit fahet fano peruk laruhu,’ ulug hunumalikisi hiyag isaruk lamuhup,” ibag.