Read Angguruk Yali ULANGAN 7 Bible Online

ULANGAN 7 - Angguruk Yali bible

ULANGAN 7

¹ Musan ele hiyag isaruk lit, ”Allah NINIKNI inowen yug toho welamuhup ambeg hondog heneplug laruk lit ap o pumbuk anggolo honolohotman yanggal enebuhu. Yanggal enebuhuwon enebe anggolo inine werehon hit men wirim teg elehon arimano Het inap, Girgasi inap, Amori inap, Kanaan inap, Feris inap, Hewi inap, Yebus inap it ununggul unuk sabiren arimano yanggal enebuhu.

²Allah NINIKNI inowen ap arimano hit hininggikmu umbuhumu hiren apmayap eneptuk lit obog toho pinggi unusuhup.[1] Misig oho ninindi ulug umbusuk fug angge nonori welamuhup ulug sali unubam umbuk fug.

³Hit heneholani it unumalikisiyen hila fug angge hit hunumalikisiyen oho it eneholani hilahup fug.

⁴Hilahup halug it unumalikisiyen hit hunumalikisi inindi kahaloho iren nunumbasi urukon enepma lahupmu NINIKNI Allah enembol yig utuk lamuhup ane ariyen olok atuk lit folo-folo hit siyahap henebuhu.

⁵Ari fahet ap arimanowen nunumba ulug hubu lahaptuk ambeg arimano oluna feseruk lit usa ahalep witukon men e uwag Allah hiyap angge hag toho wereg perukon unuk Asyera fahet hutuk teberukon men arap toho ilkal tebeseruk lit usangge obog toho indokma yale fusuhup.

⁶O pumbuk kinang atogman atogma werehon arimano obog toho embeseruk lit we nit eneg An numalikisi nindi pulmu welamag ulug mumal neneptisi angge re NINIKNI Allah anggengge welahe ulug usangge arimano obog toho siyaha feseruk lamuhup.

⁷O pumbuk winon ap we tor angge weregma we nit eneg nenebe anggolo rehen NINIKNI Allahn indi nisaruk puk fug! O pumbuk winon ap anggolo weregma nit we tor angge welahe angge famen NINIKNI Allahn mumal neneptisi.

⁸Nunumbasi unubam sali imbibahon hikit toho indi nisaruk lit nit o Mesir inap enemingmingangge weregma Allahn inggik ineyon fam Mesir inap onowe inggikmuwen nenehap siye roho windat neneptisi.

⁹Allah NINIKNI we misig eneg wereg ulug honoluk toho welamuhup. Anden irikikon uwag oko hilahuk fug peruk lit Aren umalikisi unubam sali emberukon fahet apeleg am fug angge wereg. Ap san At fahet inindi haruk lit awene inine roho senehon arimano Aren hebeloho let eneptukmen eneg it arimanowen endebuhubonen endebuhubon arimanowen endetil lahubon oho let eneptuk eneg laruhu angge famen

¹⁰At fahet ninirim perukon arimano amusun toho nangno ha fug angge siyahap enebil lahu.

¹¹Ari fahet ari-ari turuk lamuhup ulug Allahn komo neneptukon anden o yoho hiyag hisaruk lahiyon obog toho aruma apma welamuhup,” ulug hiyag isibag.

¹² Musan ele hiyag isaruk lit, ”Allahn komo neneptuk ane hol halug hikit toho turuk lamuhupmu Allah NINIKNI inowen unumbasi fam sali imbiyahon ino pisan isamin fug ulug hit fahet indi hisarukmen eneg welaruhu.

¹³Aren indi henesug lit fano ane hunubam turukmen eneg hunumalikisi anggolo og hisaruk lit yabukmu yatuk angge anggolo, roti anggen, anggur ahaluwe, e zaitun ahaluwe men wam sapi, kambing, domba anggolo og hisaruk laruhu. Kinang Allahn nunumbasi fam ibag ane roho og hisahu ambeg hit kuhupteg weregma Allahn fano ane ari obog toho turukmen eneg welaruhu.

¹⁴O pumbuk winon Allahn fano ane unubam turukon tot tegma hit hunubam eneg fano ane su roho turukmu abet wamet ibili werehon eleg laruhu.

¹⁵NINIKNI Allahn hit fet henesugmen eneg ouk misig oho hunubam aruhu fug. O Mesiren ouk alem suwon hit yet harikibon oho hunubam umbuk fug angge ap seliyon unubam eneg umbuhu.

¹⁶Allah NINIKNI inowen ap o pumbuk obog toho hininggikmu umbuhuwon arimano ninindi ulug umbusuk fug angge obog toho unusuhup. Hit yebanggema kuhup tohon iren nunumba ulug wel eneptukon arimano hiren oho wel enebuk fug.

¹⁷Hiren te Kanaan inap enebe anggolo regma nit we tor angge welahereg yanggal enebuk fug teg lahe puk fug!

¹⁸It fahet henekol ha fug! Allah NINIKNI inowen Mesir inap onowe men unusirisi ane honoluk toho welamuhup.

¹⁹Alem angginon fam unusimin ulug At inggik ineyonen nit nonolohotman enehangge aben tuk fug tehon anggolo turuk lit nininggik loloho wilip neneptisi hag toho hit henekolap heneptukon Kanaan inap arimano oho Allah NINIKNI inowen unusuhu.

²⁰Unusimin ulug inindi nonghonga fusuhumu iren nonoluk welamuhuken hirag arik lul ulug enekol toho larukmen enemu war atuk lamuhup.

²¹Allah NINIKNI suwon fahet ap enekol toho wereg ahun ino hit sehelimu werehen ap arima fahet henekol toho welamuhup fug.

²²Allahn ap seliyon arimano hit honolohotman misig heheg yanggal enebuhu. Hiren we misihim waroho yanggal enepla puhup fug. Misihim yanggal enebuhup halug mene olokon farema werehon anggolo atuk lit hit hunusuhup tohon!

²³Allah NINIKNI inowen ap seliyon arimano onowesi suwon men inindi enekolap eneptuk lit hininggikmu umbuhumu hiren unusuhup halug ap misihen oho hit hunusuk fug tehen obog toho war atuk lamuhup. War atuk lamuhupmu it onowesi ununuk kinangman mondabi eleg aruhu.

²⁵Usangge iren wel eneptukon arimano indokma yale fusuhup. Umbagpag turuk angge emas perak usangge men lombog toho wirihon arimano ap misihen oho inggareg fahet tor angge oho hilahu fug. Allah NINIKNI inowen usangge witukon fahet irim teg lit werehen ap san ninggareg fahet umbat tamin ulug hilahu halug at ino war aruhu.

²⁶Usangge ino men mangno roho siyag amuhup tohon ap ekeyen oho ibam umbat tahu fug. Allahn usangge arimano siyaha fusuhup peruken hiren oho amben mondabi siyag peruk lamuhup,” ulug hiyag isibag.