Read Angguruk Yali ULANGAN 8 Bible Online

ULANGAN 8 - Angguruk Yali bible

ULANGAN 8

¹Musan ele hiyag isaruk lit, ”Allahn ari-ari turuk lamuhup ulug komo neneptuk ane anden o yoho hiyag hisaruk lahiyon hikit toho turuk lamuhup halug kinang NINIKNI Allahn nunumbasi fam sali imbibahon fam kuhupteg fano roho weregman eneg hunumalikisi anggolo amuhup.

²NINIKNI Allahn kalem og neneplug yat toho mo teng misihen nubam hilag nuwalen fam 40 lekma larisiyon ino honoluk toho welamuhup! It inindimuwen wenggel haruk lit Allah ele holuhuk ano umbusuhuk ano perukon fahet wal isaruk laruhuk ulug lek ke hondog neneplug mase ril laruk latisi.

³It inindi wenggel hahuben suburu obok unubam eneg welamag ulug il nunumbaharisireg poholman suburu manna nit nunumbasiyen oho nibag fuhon og nisaruk latisi. Suburuwen eneg ap fano welam fug teg, NINIKNI Allah ambilik fam urukon ariyen eneg fano welam teg ulug onoluk welamuhuben ari hag toho hunubam turuk latisi.

⁴Mo teng misihen nubam hilag nuwalen fam lekma laruk latukukon arimano nenesum nenebemon oho tararag-tararag laruk latisi fugmu nunuyug oho fitisi fug.

⁵Ikniyen amloho kultuk lit milaltuk hag toho Allah NINIKNIYEN oho milal neneptuk angge re honoluk toho welamuhup.

⁶At fahet henekol toho wereg lit Aren ari hag toho laruk lamuhup ulug komo neneptuk ane hikit toho laruk lamuhup.

⁷Allah NINIKNI inowen kinang fanoma tonggo ke oho tom famen oho ik kinang apman lahik watug ik suwon anggolo wirig atuk ambeg hunumbahik lahu.

⁸Hunumbahik lahu ambeg ino roti anggen, anggur anggen, e ara anggen, e delima anggen, e zaitun anggen, kin ahaluwe men anggolo wereg ambeg ino wereg lit

⁹suburu anggolo werehen hinindi roho naruk lamuhup fug. Helep undaman ine angge besi weregma tom fam oho ili ruruk angge tembaga habuloho waruk lamuhup.

¹⁰Hit henehum ouk toho naruk lit Allah NINIKNI inowen kinang fanoma og nisarikin ulug wel turuk lamuhup,” ibag.

¹¹Musan ele uruk lit, ”Allah NINIKNI fahet henepeleg am fug angge At inowen ari-ari turuk lamuhup ulug komo neneptuk ane anden o yoho hiyag hisaruk lahiyon umbusuhup fug!

¹²Hit henehum ouk toho naruk lit o wit talug henebe yuwag toho weregman eneg

¹³henembohom sapi, kambing, domba men umbagpag turuk angge perak emas men henengge winon men anggolo amuhup.

¹⁴Anggolo amuhup halug henebe hemet toho wereg lit Allah NINIKNI inowen o Mesiren nininggik lisoho emberuk ambehen windat neneptisiyon ino fahet henepeleg aruhu fug.

¹⁵NINIKNI Allahn hondog neneplug ap enekol atuk ke lek anggolo regma pisanggo olokon men kirimbul men wereg ke yat toho laruk latisi. Kinang lilog teg ke laruk lit ik nalusan ik helep famen wilip amag perisimu wilip atisi.

¹⁶Lekma hondog neneplug laruk lit suburu manna nunumbasiyen oho nibag fuhon og nisarisi. Inindi wenggel hahup ulug wal nisarisireg fobikmu fano ane nunubam tirisi.

¹⁷Hiren te nit nininggarehen nininggik ineyon fam turuk laheyon ariyen tung ninap atukuk peruk lamuhup fug.

¹⁸Allah NINIKNI inowen nunumbasi fam sali imbibahon ino ketiya oho oluk toho wereg lit nit ninineyap neneptisimu tung ninap atukuk ulug honoluk toho welamuhup!

¹⁹At fahet henepeleg atuk lit aben nunumba ulug wel eneptukon hiren oho wel eneptuk lit onombolim laruk lamuhup fug. Ari eneg turuk lamuhup halug NINIKNI Allahn siyahap henebuhu ulug anden seleg toho hiyag hisaruk lahi.

²⁰NINIKNI Allahn ap o pumbuk winon hit honolohotman siyahap eneptuk laruhu hag toho hir oho An nele holtuk eleg ulug siyahap henebuhu rohon!” ulug hiyag isibag.