Read Angguruk Yali ULANGAN 9 Bible Online

ULANGAN 9 - Angguruk Yali bible

ULANGAN 9

¹Musan ele uruk lit, ”Israel hinap nori, anden iminon holeg lamok! O yoho ik Yordan paloho nindig atlihipteg ap enebe anggolo inine werehon hit men wirim teg elehon enengginang hit ngi amuhuben kuhup. Inibam o pumbuk suwon arimano walinggoho elehet oko kilabehon pohol men hunduhuk hag tegma

²ap enebe oho inine wereg lit yat anggolo reg. Ap arimano ap misihen oho apmayap enebuk fug teg uruk ane ari hiren holtikip angge famen

³ketiya Allah NINIKNI inowen indoken naruk hag toho tam atmisireg sali imbibag ane hikit toho ap arimano hit honolohotman apmayap enebuhumu hiren folo-folo yanggal eneptuk lit elehap eneptuk lamuhup.

⁴Allah NINIKNI inowen ap seliyon arimano hit honolohotman yanggal eneptukmu itanowen nit ninindi fano wereg lit pikir ane eneg turuk laheyon ari fahet NINIKNI Allah inowen kinang tu fam hondog neneplug kik waharisimu ngi atukuk peruk lamuhup fug. Ap seliyon arimanowen Allah eleg ulug siyag ane eneg turukon ari fahet NINIKNI Allahn hit honolohotman yanggal enebuhu. Yanggal enebuhureg hunumbasi Abraham, Ishak, Yakub unubam sali imbiyag ane pisan isamin fug ulug enengginang og hisahu.

⁶Fano ane eneg turuk laheyon ari fahet Allah NINIKNI inowen kinang fanowon tu og nisarisi peruk lamuhup fug. Hit aruma hununggul uwag helep ineyon hag inap welahep,” ibag.

⁷Musan ele uruk lit, ”Hit lekma laruk lit siyag ane eneg turuk lahebon ariyen Allah NINIKNI indi olok harisiyon wenggel hemek! O Mesiren wilip atikip sambilen tulug NINIKNI Allah ele ying til eneg tuma waharikip.

⁸Tom Sinai alman At indi olokap tirikipmu Aren unusuhuk ulug ahummu het-pet harisi.

⁹Helep NINIKNI Allahn hit hunubam sali emberisiyon ino haharehon itano og numag ulug tom ino fam laharikikteg suburu ik men na fug angge weregman eneg hup hunduhuk unukoho hunduhuk teng misig nubam hilag nuwalen 40 atisimu

¹⁰NINIKNI Allahn helep piren inggareg inggiken haharehon itano og nitisi. Hit tom alma palu roho weregma Allahn indok sehelimuwen ele hiyag hisarisiyon arimano helep fam hahareg angge og nutuk lit

¹²an nubam te, ’Ap haren o Mesiren hondog eneplug waharikinon arimanowen siyag-siyag ane eneg turuk lit werehen folo-folo enembeg wambimihin. Anden ari roho laruk lamuhup ulug komo eneptikik ane tot amusun toho welam fug angge hik isarusareg usangge winon wit tarusa,’ ulug nin ele eke hiyag nutuk lit,

¹³’Ap arimano ununggul uwag helep ineyon hag teg lit eneg wereg angge re An noluk.

¹⁴It ununuk mondabi eleg amag ulug elehap enebuhuk peruk lahi angge re Haren unusuhun fug ulug sen nabuk fug. Hat humalikisi Anden anggolowap enebuhukmu Israel inap enebe we tor angge inine eleg toho weregma hat humalikisiyen endebuhubon arimano enebe anggolo inine roho welamuhup,’ ulug hiyag nitisi.

¹⁵Hiyag nitisimu hebel atikikteg helep piren itano ninggik piren fam walug tom ino indok ambulpul turuk lit weregma wambirikik.

¹⁶Wamburuk lit yet harukmen hiren kalem pikiron NINIKNI Allahn hiyag nisarisiyon ino embeselug At olohotman un ane turuk lit usangge wam sapi umalik hahon wit tarikipmu yet hisarikik.

¹⁷Yet hisaruk lit anden hit honolohotman helep piren itano hik isarikikmu lilibug toho ilkal urusa.

¹⁸NINIKNI Allahn tuk fug peruk ane turuk latikipmu indi siyag atisiyon ino fahet an tam tom ino fam laharikik hag toho nin lahalug NINIKNI Allah olohotma kinangma yinggig lit suburu ik na fug angge weregman eneg hup hunduhuk unukoho hunduhuk teng misig nubam hilag nuwalen atisi.

¹⁹NINIKNI Allah ahummu het-pet haruk lit elehap enebuhuk peruken an nakol harikik angge famen an nele ketiya irikikon oho Aren holtisi.

²⁰Hun Harun ino ware fusuhuk ulug NINIKNI Allahn olok toho perisi angge re ino sambil oho Harun fahet sembahyang irikik.

²¹Hiren siyag ane turuk lit usangge wam sapi hahon wit tarikibon ino anden lisoho indokma hik isarikikteg al sahaloho ula feserikik. Ul atisiyon ino warikikteg ik tom famen wamburukon ino ahummu hik isarikik.

²²O Tabera men o Masa men o Kibrot-Taawa men wereg lir oho NINIKNI Allah indi olokap turuk latikip.

²³Nit o Kades-Barnea weregma NINIKNI Allahn hiyag hisaruk lit, ’Lalihipteg kinang Anden hiyag hisahukon ngi amuhuben kuhup,’ ulug hiyag hisarisiyon ino embeserikip. Allah NINIKNI fam hinindi wenggel ha fug angge ele holtikip fug.

²⁴Anden tam yet hisarikik sambilen tulug ketiya oho NINIKNI Allah ele ying turuk lahep.

²⁵NINIKNI Allahn elehap enebuhuk perisi angge re hup teng misig nubam hilag nuwalenam an At olohotman kinangma yinggig lit

²⁶ubam sembahyang irikikon tu, ’NIKNI suwon Allah, ap An numalikisi welamuhup ulug hinggik ineyon fam enehap siye eneplug o Mesiren wiliboho hondog eneptikinon arimano unusuk fug.

²⁷It ununggul uwag ine anggolo wereg lit siyag-siyag ane eneg til-wil laruk ulug wenggel ha fug angge we hamingmingangge Abraham, Ishak, Yakub unubahet eneg wenggel haruk laruhun.

²⁸Humalikisi unusuhun halug Mesir inaben Hat fahet enele uruk lit, ’At umalikisi unubam kinang og hisahuk irisi angge famen ine elehen hondog eneplug la fug teg. Umalikisi fahet nirimen unusuhuk ulug hondog eneplug lekma larisi,’ uhup tohon.

²⁹An numalikisi nindi pulmuwon welamuhup ulug hinggik ineyon fam o Mesiren wiliboho hondog eneptikin angge re holuk toho welaruhun,’ irikik,” ulug hiyag isibag.