Read Angguruk Yali YOHANES 1 Bible Online

YOHANES 1 - Angguruk Yali bible

YOHANES 1

¹Allahn pohol kinang uwan wal tuk fugmu wene aru tam welatfag. Wene aru Allah men ambiyeg welatfag. Wene aru oho Allah men ambi reg latfag.

²Pohol kinang uwanma wene oho Allah men ambiyeg welatfag.

³Allahn mun angge man angge wene famen eneg wal tibag. Mun angge man angge wene fam wal tibag fuhon te wereg eleg.

⁴Wene aru famen mun angge man angge onolukap eneptukmu fano wereg. Onolukap eneptukon inowen ap fahet o seleg fanowon unubam emberuk.

⁵Seleg ariyen hik teg ambeg umbagpag turukmu hik ariyen seleg atukon mapmu ruk fug teg.

⁶Ap eke Allahn monde fibahon ino watfag, unuk te Yohanes.

⁷Yohanesen seleg ino ilen hibareg hiyag isahukmu holuhupteg ap obog toho inindimu we tem toho puhup ulug watfag.

⁸Yohanes ino o seleg hag toho watfag fug, aren o seleg hibahon ino hiyag isamin ulug watfag.

⁹Seleg mondabi welaruhuwon ino kinangma waharuk lit ap obog toho unubam umbagpag tuhu.

¹⁰At tam welatfag. At ino himbisig Allahn pohol kinang wal tibag angge famen kinangen At haruk latfag fug.

¹¹At ino nangginang yugmu ulug watfag angge famen oriyen te angginang yuhon fam waha pibag fug.

¹²Angginang yuhon fam waha pibahon arimanowen At unuk fam tem toho wenggel haruk latfagma Allah umalikisi amuhup ulug unduhuk fisibag.

¹³It arimano indag atfahon ap enemep famen fug, ap enehaluwe famen fug, aben perukon fam fug, Allahn perukon fam eneg indag atfag.

¹⁴Wene ino famen ap atfareg At nit nenesehelimu wereg. Allahn unuk suwap tirisimu niren yet harukuk. Namloho misig eneg ulug Ikniyen unuk suwap tirisireg lehoma emberisireg At indi reg hag toho nir oho tik-tem toho indi nenesug.

¹⁵At fahet Yohanesen hiyag isaruk lit, ”At ino tu fahet tam hiyag hisaruk latikik. An nombolim waruhu irikikon ino naluke fil wereg. An uwanma At ino tam welatfag,” ulug hiyag isibag.

¹⁶Aren nit obog toho indi nenesug ane kobog toho umbusuk fug teg.

¹⁷Allahn komo neneptuk ane Musa famen holtukuk, Ninikni Allah inowen indi nenesug lit tem toho peruk ane Yesus Kristus famen nonoluk atisi.

¹⁸Ap misihen oho Allah harisi fug. Amloho misig enehon ino Ikni alukema werehon inowen fag toho hiyag nisarisi.[1]

¹⁹Yahudi inap o Yerusalem welatfahon arimanowen imam inap men Lewi inap men Yohanes ambeg lalihipteg hat sa ulug kapal halihip ulug mon enepfagma libareg kapal hibagma Yohanesen fag toho hiyag isibag.

²⁰Aren awiya wa fug angge hiyag isaruk lit, ”An te Mesias ap obog toho fanowap enebuhuwon ino fug,” ibag.

²¹Ari ibagma iren te, ”At fug halug hat te sa? Hat Elia ano?” ulug kapal hibagma, ”An Elia fug,” ibag. Ari ibagma iren te, ”Wene hiyag isaruk ahun nabi eke waruhu ulug hahatfahon ino har ano?” ulug kapal hibagma, ”Ari an fug,” ibag.

²²Yohanesen ari ibagma iren te, ”Ari ehenma hat sa? Nit mon nenebehesa inap arimanowen kapal nisa nowen hat hinggareg fahet fag toho hiyag nisimin,” ibag.

²³Iren ari ibagma aren te, ”Yesayan haharoho emberuk lit ap eke anggenma werehon inowen ele hi roho uruk lit Ninikni suwon waruhu abunggalem pikit toho yaho feruk lamek ulug Yesayan haharoho imbibahon hiyag isarukon ino an aru welahi,” ibag.

²⁴Ap mon enepfahon arimano Farisi inaben mon enepfahon welatfag.

²⁵It welatfahon arimanowen, ”Hat Mesias men Elia men wene hiyag isaruk ahun waruhu ibahon ino waharikin fug halug te haren nungge fahet ap ikma pilap eneptuk lahen?” ulug kapal hibag.

²⁶Kapal hibagma aren te, ”Anden ik fam eneg pilap eneptuk lahi. Ap misig aru hiren haruk lahep fuhon hit henesehelimu unduhuk lit wereg.

²⁷At ino alukema an larukmu At ino an nombolim waruhu. An siyag nahun nubam sepatu lole nubahin uhu fug,” ibag.

²⁸Enele ibag ambeg ari Yohanesen ap ikma pilap eneptuk latfag ambeg ino o Betania ik Yordan fumag filen enele ibag.

²⁹Likiyamon te Yesus ino Yohanes ambeg waharukmu yet hibareg hiyag isaruk lit, ”Ap kinangmonen siyag ane turukon elehap tuhuwen Allah ambohom domba tu waharuk.

³⁰Anden hiyag hisarikikon At ino tu fahet tam hiyag hisaruk lit, ’An aluke fil weregma nombolim ap misig waruhuwon ino an uwanma At ino tam welatfahon waruhu,’ ulug hiyag hisarikik.

³¹An oho At napeleg anggeyen Israel inap At fahet onoluk aruhu ulug ik fam pilap enebik waharikik,” ibag.

³²Ibareg Yohanesen hiyag isaruk lit, ”Allah hime fanowon poholman suwe yalma hahon wambik waharisireg ubam weregma yet harikik.

³³An oho At napeleg angge famen ik fam pilap eneptuk laruhun ulug Allah an mon naptisiyon inowen nubam ele uruk lit, ’Hime fanowon wambik waruhureg ap misig ubam weregma yet hahunteg At inowen Allah hime fanowon ap og isahuwon tu puhun,’ ulug nubam irisi.

³⁴Allah amloho ino tu ulug nilen harikikteg fag toho hiyag hisarikik,” ulug hiyag isibag.

³⁵Likiyamon Yohanes otsi piren men enele tam ibag ambeg itano unduhuk lit weregman

³⁶Yesusen it pisan isalug larukmu yet hibag. Yet hibareg Yohanesen otsi unubam ele hiyag isaruk lit, ”Allah ambohom domba waharukon tu yet hemek,” ibag.

³⁷Ibag ane ino otsi pirenen hol hibareg Yesus ombolim libag.

³⁸Ombolim larukmen Yesusen hebeloho yer isibareg Aren, ”Nungge yami ril waharuk lahep?” ulug kapal isibagma iren te, ”Nonowe, Hat welahen ambeg kema welahen?” ulug umung hibag.

³⁹Umung hibagma Aren te, ”Kim halihiben maniyek,” ibagma watfareg iren kim hibareg o ari sambil At men ambiyeg weregman hupmu atfag. Yesus men libag sul ari mo haya rurukmu laruk latfag.

⁴⁰Yohanesen ibag ane hol hibareg Yesus ombolim libahon itano misig unuk te Andreas, at ino Simon Petrus are welatfag.

⁴¹Andreas ino are Simon men tam ambiyeg atfareg ubam hiyag utuk lit, ”Mesias fobik waruhu uruk latfahon ino ninilen hehe,” ulug hiyag itfag. Mesias ino Yunani inap enele roho Kristus nit fanowap nenebuhuwon fahet uruk.

⁴²Andreasen are Simon Yesus ambeg hondoholug libagma Yesusen at kim hibareg, ”Hat te Simon, Yohanes amloho, hat hunuk Kefas suwal haptuk lahi,” ibag. Kefas ari Yunani inap enele roho Petrus, nit nenele roho ”helep ineyon” fahet uruk.

⁴³Likiyamon Yesusen o Galilea lul ulug turukmen Filipus men ambi atfareg, ”An min ambiyeg lul,” ibag.

⁴⁴Filipus ino ibam Betsaida ahun, Andreas men Petrus men inibam ambimu welatfag ahun watfag.

⁴⁵Filipus ino kema laruk lit Natanael men ambi atfareg ubam ele uruk lit, ”Musa men ap wene tam hiyag isaruk latfag inap nabi menen ap misig fobik waruhu ulug tam haharoho imbibahon ino niren hehe, At ino Yesus Yusuf Nazaret ahun amloho ino,” ibag.

⁴⁶Ari ibagma Natanaelen te, ”O Nazaret inowen fanowon wilip am hag teg?” ulug ubam ibag.

⁴⁷Ari ibagma Filipusen te, ”Nare ma, ambiyeg lulteg yet hamihin,” ibagma hondoholug libagma Yesusen Natanael waharukmu yet hibareg, ”Israel ahun ele si uk fug angge inggik apmane laruk elehon tu waharuken yet hemek,” ibag.

⁴⁸Ari ibagma Natanael inowen te, ”Nangginoho an fahet holuk teg?” il larikim Yesusen te, ”Filipusen hat wol habuk fugmu Anden hat e ara alma weregma hiyarikik,” ibag.

⁴⁹Ari ibagma Natanaelen at ubam ele uruk lit, ”Nowe, Hat Allah amloho. Israel inap Onowe Hat welahen,” ibag.

⁵⁰Ibag ane fahet Yesusen hebeloho hiyag utuk lit, ”Anden hat e ara alma weregma hiyarikikon tu ihi ane fahet Allah amloho wereg ulug An fahet wenggel haruk lahen? Ari tot tohon hehen, fobik su ane tuhukon yet hahun,” ibag.

⁵¹Ari ibareg nin Yesusen, ”Pohol fo regma Allah amingmingangge malaikat At ap kinangmon atik ibahon ino wereg ambeg lahuk wambuk turukmu yet hahun ulug ari tem toho hiyag hutuk lahi,” ibag.