Read Angguruk Yali YOHANES 10 Bible Online

YOHANES 10 - Angguruk Yali bible

YOHANES 10

¹Yesusen ele hiyag isaruk lit, ”Ap san wam domba elehet oko kilabeg ambeg lalug sok ele ke kuk fug anggeyen elehet fene lahalug kuruk halug at inowen ngi ahun ware feselug anggengge hilamin peruk ahun hag toho wereg. Ari tem toho hiyag hisaruk lahi.

²Ap san sok ele ke pikit kuruk halug at ino domba foroho ahun hag toho wereg.

³At ino fahet sok ngi ahun inowen husurukmu ambohom domba arimanowen oho inikni ele holtuk. Ambohom wal taneg ununuk uruk lit wol toho wilip eneptuk.

⁴Wol toho wilip eneptug at ino eneluke fil larukmu ambohom arimanowen ninikni ele holehe ulug ombolim laruk.

⁵Enemu inap fahet domba arimanowen ninikni ele hag toho uruk eleg ulug ombolim la fug angge embeselug linggik-longgo uruk,” ulug Yesusen hiyag isibag.

⁶Yesusen wam domba fam wirim haruk lit ibag ane indit toho hiyag isibagma it arimanowen At ibag ane aru fahet inindi anggar atfag fug.

⁷Yesusen nin eke hiyag isaruk lit, ”Wam domba elehet oko kilabeg ambeg sok wirihon ino An ninggareg fahet ihi. Ari tem toho hiyag hisaruk lahi.

⁸An kinangma uwan wam fugmu tam watfag inap arimanowen ngi inap unusuruk lit enengge hilaruk inap watfagma wam domba arimano enele holuk fug teg latfag.

⁹Sok wirihon ino An welahi. Ap sa An wereg keyen kuruk halug at ino fano wereg lit kuk wilip am turuk lit naruk angge fanowon hiyag tahu.

¹⁰Yoholiyangge hilaruk inaben domba enebe kong toho unusuruk lit winon hirag tamin ulug waharuk. An waharikikon ino it onoluk fano wereg lit enengge fano-fano angge sebe roho foroho lamuhup ulug An waharikik.

¹¹Wam domba ngi ahun fanowon ino An welahi. Ngi ahun fanowon inowen nambohom fahet fano nuwabukag peruk.

¹²Wam domba forohowon fahet onggo og utukon at amu ahun wereg lit ngi roho wereg elehen olomene olokon waharukmu akolen domba lin isalug laruk. Larukmu olomene olokon waharuk lit wam arimano senggel eneptuk lit yanggal eneptukmu linggik-longgo uruk.

¹³Wam domba foroho ahun ino ambohom fahet fano wenggel ha fug angge onggo fahet eneg wenggeltukon ariyen domba lin isalug laruk.

¹⁴Wam domba ngi ahun fanowon ino An welahi. An ninggarehen nambohom domba kim isaruk lahimu iren oho An onoluk teg lit wereg.

¹⁵Ari hag toho Nikniyen oho An niyarukmu Anden oho Nikni haruk lahi. Anden nambohom fahet fano nuwabukag peruk lahi.

¹⁶Wam domba elehet oko kilabeg ambeg aru welam fug tohon winon arimano oho Anden foroho lahi. Domba winon arimano oho Anden hondoko kilabik waruhukmu iren oho An nele holuhupmu domba arimano oho onori men mangno roho wereg lit inikni misig ambohom hag toho welamuhup.

¹⁷Nikniyen nolukap nabuhuwen Anden fano nuwabukag peruk lahiyon ariyen Nikniyen indi nasug.

¹⁸An nuwatuk ane ari aben peruk ane fug, ninggarehen nuwabukag peruk lahi. An nuwariyek ulug nebe unug isa reg lahi, nin noluk am teg lahi. Anden uruk lahi ane aru yabuk Nikniyen hiyag nitisiyon fahet uruk lahi,” ulug Yesusen hiyag isibag.

¹⁹Ari ulug hiyag isibag ane fahet Yahudi inaben it-it suwahal uruk latfag.

²⁰Yahudi inap winon welatfahon arimanowen, ”Ap aru undama siyag angge wereg lit nenek turuk. Nungge fahet At ele holtuk lahep?” ulug uruk latfag.

²¹It ap winon arimanowen, ”Siyag angge undama wereg ahunen ari hag toho uk fug teg. Ap siyag angge undama werehonen ap il hupnihon fenggenuk teg?” ulug umung-umung atuk latfag.

²²Welatfagma sun li lahibagma Allah ibam sok husibag sali yoho welahe ulug Yahudi inaben seni esetuk latfag.

²³Yesus ino Allah ibam wirigmu libareg o pumbuk hili-hili angge wirigmu hili misig unuk Salomo ino laruk latfag.

²⁴Larukmen Yahudi inap At walinggoho waharuk latfareg ubam enele uruk lit, ”Hat Mesias ap obog toho fanowap enebik waruhu ibahon ino ano, amuwon ano, nit ninindi nonghong uruken nungge fahet nit nunumbahalug lahen? Mesias ino Hat welahen halug nit nunubam seleg toho hiyag nisimin,” ibag.

²⁵Ari ibagma Yesusen te, ”Anden hiyag hisaruk latikik angge famen hiren An nubam wenggel harikip fug. Nikniyen yabuk hiyag nitisimu Anden wituk lahiyon ari ap inilmu eneg amag ulug turuk lahi.

²⁶Hit An nambohom hag toho welahep fuhon ariyen An nubam wenggel haruk lahep fug.

²⁷An nambohom nele holtukmu Anden isaruk lahiyon arimano nombolim waharuk.

²⁸It mondabi onoluk welamuhup ulug Anden og isaruk lahi, mondabi siyag am fug angge weregma ap misihen oho An ninggikmuwen taluk toho og enebuhu fug.

²⁹Nikniyen Hat hambohom ulug og nitisiyon ino ap kinangmon men wirim teg eleg. Ap misihen oho Nikni inggikmu werehon arimano taluk enebuk fug teg.

³⁰An oho Nikni oho nenebe we misig welahe,” ulug Yesusen hiyag isibag.

³¹Ari ulug hiyag isibagma Yahudi inap arimanowen helep wibareg Yesus wabul ulug turuk latfag.

³²Turuk latfagma Yesusen te, ”Fano ane anggolo Nikniyen turuk latisiyon hiren yet hawag ulug unug hisaruk latikik. Anden siyag ane nungge unug hisarikikmu nuwabul ulug turuk lahep?” ulug kapal isibag.

³³Kapal isibagma iren te, ”Fano ane tirikinmu huwabul ulug turuk lahe fug. Haren Allah abug uruk lit Hat ap kinangmon famen Allah men wirim taruk lahenma huwabul ulug turuk lahe,” ibag.

³⁴Ari ibagma Yesusen, ”Suwesingga atam haharoho imbibahon hiren tohon ino fam, ’Hit welahebon Allah hag toho welahep ulug Anden hiyag hisaruk lahi,’ ulug haharoho imbibag.

³⁵Ap atam welatfahon arimano unubam Allahn ele uruk lit hit Allah hag toho welahep ibag. Tam haharoho imbibahon ari elehap tuk fug teg.

³⁶Ari reg angge famen An Nikniyen mumal tarisireg kinangma monde ferisiyon ino famen hiren te, ’Allah abug uruk lahen,’ uruk lahep. Fahe Anden te, ’An Allah amloho welahi,’ ihiyon ari fahet uruk lahep?

³⁷Nikni iyabuk wituk lahi fug halug An nubam hinindi wenggel ha fug.

³⁸An Nikni iyabuk wituk lahi angge famen An nubam hinindi wenggel haruk lahep fugmu yabuk wituk lahi ane fahet hinindi wenggel haruk lamek. Hinindi wenggel haruk lamuhupteg An Nikni men welahi, Ar oho An men wereg ulug honoluk aruhumu hinindi anggar aruhu,” ibag.

³⁹Ari ibagma nin eke senebul ulug turukmen ininggik kobog isalug wilip atfag.

⁴⁰Wilip atfareg Yohanesen atam ap ikma pilap eneptuk latfag ambeg Yordan fumag fil libareg welatfag.

⁴¹Weregma ap anggolo At ambeg libareg it-it enele sahaltuk lit, ”Yohanes inowen enehangge poholmonen turuk ane misig oho tirisi fug. Tirisi fug angge famen hun tu fahet irisiyon ino obog toho tem toho irisimu haruk lahe,” ibag.

⁴²Ap anggolo o ino welatfahon arimanowen tem toho ehek ulug at ubam inindi wenggel haruk latfag.