Read Angguruk Yali YOHANES 11 Bible Online

YOHANES 11 - Angguruk Yali bible

YOHANES 11

¹O Betania Maria men Marta men inibam ino hun unuk Lazarus ouk waruk lit welatfag.

²Maria inowen ahaluwe amben fanowon fam Yesus uyugmu hililfareg oruk fam puhun tibibag hiyap ino welatfag.

³Lazarus ouk waruk latfahon ino it piren enerek welatfag. Welatfagma hiyap itanowen, ”Nonowe, Haren hindi reg lahenon ino ouk waruk,” ulug ap misig Yesus ambeg monde fibag.

⁴Monde fibagma ap ino libareg ari ulug hiyag itfagma hol hibareg Yesusen te, ”Ouk ari famen war am fug teg, ouk ariyen Allah amloho tu ulug wel tuhuben Allah unuk palimu werehon ebenam aruhu,” ibag.

⁵Lazarus men ereki Marta men owe men indi enesug lit welatfag angge famen

⁶ouk waruk ulug hol hibareg At welatfag ambeg inggik pirenam welatfag.

⁷Welatfareg Yesusen otsi unubam, ”Nori, Yudea suhuloho lul,” ibag.

⁸Ari ibagma otsi arimanowen Onowe fam enele uruk lit, ”Yahudi inaben ketiya helep fam huwabul ulug turusa angge famen nin eke lul uruk lahen?” ibag.

⁹Ari ibagma Yesusen te, ”O misihim sambil eneg mo lahik watug nin ubuk uruk eleg? Ap san o sakan tegma laruk halug il seleg tehen ambilan wabuk fug teg.

¹⁰Ap san o hik tegma laruk halug ilmu seleg teg elehen ap ino ambilan wabuk teg,” ibag.

¹¹Ari ulug hiyag isibareg, ”Nenere Lazarus ino nohoruk lit werehen elel haminen lul,” ibag.

¹²Ari ibagma otsiyen, ”Nonowe, at ino nohoruk halug fobik fano aruhu,” ibag.

¹³Ibag ane ari Yesusen indimu war aha ulug ibag angge famen otsiyen te we tem toho nohorukon fahet ehek pibareg ari ibag.

¹⁴Ari ibagma Yesus inowen fag toho otsi hiyag isaruk lit, ”Lazarus war ahayon noluk ahama ihi.

¹⁵Hit An nubahet hinindi anggar aruhuwen An elegma at ino fano war aha. War ahama ketiya nit enembeg lulen maniyek,” ibag.

¹⁶Ari ibagma Tomas unuk eke Namiya Malik suwalfahon inowen ori unubam, ”Nir oho At men ambiyeg lulteg war amulen lul,” ibag.

¹⁷Lazarus war atfagma owikmu kilapfag sali ino hup uhanam atfagma o Betania libag.

¹⁸O Betania ino Yerusalem horogma kilometer hinahan welatfag.

¹⁹O ino Yahudi inap anggolo Maria men Marta men enerek war atfagma inindi yuwag toho welamul ulug enembeg watfareg welatfag.

²⁰Welatfagma Martan Yesus kema waharuk urukon hol hibareg Maria olma weregma embeselug Yesus kema hondohik libag.

²¹Hondohik libareg Yesus fam ele uruk lit, ”Nowe, Hat tuma wereg lalenma hahen nenerek war alep fug.

²²War atisi angge famen Haren ketiya oho Allah fam nungge-nungge heng timihinmu Aren og hitmisiyon an noluk,” ibag.

²³Ibagma Yesusen Marta fam, ”Herek oluk atmisi,” ibag.

²⁴Ibagma Martan, ”Ap war atukon arimano Allahn ap onolukap enebuhu sambil ino ar oho oluk aruhuwon an noluk,” ibag.

²⁵Ibagma Yesusen te, ”Warehon onolukap eneptukon men yinggigmu unduhuk feserukon men An welahi. Ap san An nubam wenggel niyaruk halug at ino war aruhu angge famen nin oluk aruhu.

²⁶Ap sa onoluk werehonen An nubam wenggel niyaruk halug at ino war am fug angge mondabi oluk welaruhu. Ihiyon aru fahet tem toho peruk lahen?” ulug kapal hibag.

²⁷Kapal hibagma Marta inowen, ”Nowe, Mesias Allah amloho kinangma wambik waruhu ibahon ino Hat welahen ulug tem toho peruk lahi,” ibag.

²⁸Yesus fam ari ibareg Marta ino Maria ambeg libareg isanggo kilabeg hiyag utuk lit, ”Nonoweyen hat watmisi ulug wol haptuk,” ibag.

²⁹Hiyag itfagma holfareg in atug folo-folo Yesus ambeg libag.

³⁰Yesus o pumbukmu uwan kuk fug angge Marta min enele ibag ambeg itano weregma libag.

³¹Yahudi inap inindi yuwag toho welamul ulug enembeg watfahon arimanowen Maria in atlug folo-folo wilip atukmu yet hibareg owikmu uba yatmisiyen laruk ulug ombolim mutug libag.

³²Maria Yesus ambeg libareg At yet hibareg uyug alma hur atfareg, ”Nowe, Hat tuma wereg lalenma hahen nenerek ino war alep fug,” ibag.

³³Ari ibagma Yesusen yer isarukmen Maria men Yahudi inap watfahon arimano men uba yatukmu yer isibareg undaman olok hibag angge famen indi anggin atfareg,

³⁴”Ebe wareg angge kema imbik larikip,” ulug kapal isibag. Kapal isibagma it arimanowen, ”Nonowe, Hat yet hamihinen ma,” ibag.

³⁵Iren ari ibagma Yesus oho uba yatfag.

³⁶Uba yatukmu Yahudi inaben yet hibareg, ”Aren oho indi haruk lit wereg,” uruk latfag.

³⁷Ari uruk latfagma ap it sehelimu welatfahon arimanowen, ”Il hupnihon fenggenap tuk teg latisi angge famen ap tu uwan war am fugmu hihibuk fug teg latisi ano?” ulug umung-umung atuk latfag.

³⁸Ari ulug umung-umung atuk latfagma Yesus nin eke undaman olok hibareg kilapfag ambeg ino libag. Kilapfag ambeg ari owik elma kila fibareg helep fam sok laroho kila fisibag.

³⁹Libareg Yesusen, ”Helep ari miyaloho imbisik lalihip,” ibag. Yesusen ari ibagma Lazarus erek Marta inowen te, ”Nowe, war atisi sali yoho uhaneg welahe angge re amben tirisi lit teg,” ibag.

⁴⁰Ibagma Yesusen te, ”We tem toho ari peruk lahen halug Allah lehoma werehonen timisi ane yet hamihin ulug fahe hiyag hirihi fug?” ibagma

⁴¹helep ino miyaloho ilanma imbik libag. Imbik libagma Yesusen il poholma lahap haruk lit, ”Anden hubam heng tihiyon nele holehenma Nikni uruk lahi.

⁴²Haren likiya hupmu An nele holtuk lahenon An noluk. Ap An walinggoho werehon aruman Haren An mon naptikinon fahet tem toho pelusan nele hubam uruk lahi,” ibag.

⁴³Ari ibareg ele ine roho uruk lit, ”Lazarus, in atug wilibig ma,” ibag.

⁴⁴Ari ibagma ap warehon ino sum fam inggik uyug pug teg angge orohole oho sum yanggowon fam hililip teg angge wilip atfag. Wilip atfagma Yesusen it unubam te, ”Hele inggik pug tehon lole feselihipmu lamisi,” ibag.

⁴⁵Yahudi inap anggolo Maria ambeg watfahon arimano winonen Yesusen tibag ane ari yet hibareg ubam inindi wenggel haruk latfag.

⁴⁶It winonen Farisi inap enembeg libareg Yesusen tibag ane fahet hiyag isa libag.

⁴⁷Hiyag isibagma imam onowesi suwon men Farisi inap menen ap suwon obog toho wol eneptuk lit palu enepfareg enele sahaltuk lit, ”Ap ariyen poholman turuk ane fano ane eneg turuken nangginoho tuhuk?

⁴⁸Niren At senetuk ane umbusuhuk halug ap obog toho ubam wenggel haruk lamuhupmu Roma inap waharuk lit nit ninibamen yanggal neneptuk lit nenebe nunusuhup tohon,” ulug sahaltuk latfag.

⁴⁹Enele sahaltuk lit weregma hun Kayafas mo ino fam imam onowe suwon lahapfahon ino it sehelimu in atfareg it unubam ele uruk lit, ”Hit hinindimu henepeleg teg lit wenggel ha fug toho welahep.

⁵⁰Ap obog toho fahet ap misig war atuk halug ari fano, nit ap obog toho nunusuhup ari siyag ulug wenggel haruk lamek,” ibag.

⁵¹Ibag ane ari inggareg indi amuwen wenggel hibareg ibag fug, mo ino famen at imam onowe suwon unduhuk fibagma Allahn Yesus ap obog toho fahet war aruhu pibag ane hikit toho Kayafas inowen hiyag isibag.

⁵²Allahn pibag ane ari o pumbuk ino fahet eneg war aruhu pibag fug, Allah umalikisi linggik-longgo urusareg werehon arimano andog enebuhureg mangnowap enebuhu pibag.

⁵³Enele sahaltuk latfag sambil ino famen At ino wabuhuk ulug kong tibag.

⁵⁴Wabuhuk ulug kong tibagma Yahudi inap onorohole ke la fug angge Yesus otsi men o pumbuk misig unuk Efraim fare horog toho libareg welatfag.

⁵⁵Yahudi inap suburu roti sig elehon naruk sul Paskah horog atfagma ap anggolo o pumbuk obog toho arimano nenebe ik umag nenebukag ulug o Yerusalem libag.

⁵⁶Libareg Allah ibamen unduhuk lit, ”Hit nungge peruk lahep? At ino Paskah narukmu watmisi ano?” ulug it-it enele sahaltuk lit Yesus yami ruruk latfag.

⁵⁷Atam imam onowesi suwon men Farisi inap menen ap fam enele yonggo emberuk lit, ”Ap san Yesus wereg ambeg onoluk atuk halug nit hiyag nisa wamuhupmu niren senebuhuk,” ulug ap unubam enele yonggo imbibag.