Read Angguruk Yali YOHANES 12 Bible Online

YOHANES 12 - Angguruk Yali bible

YOHANES 12

¹Suburu roti sig elehon naruk sul Paskah ino o falfalik nahuk ulug uwanma Yesus o Betania Lazarus war atfagma olukap tibag ambeg ino libag.

²O inowen Yesus fahet seni esetfareg Lazarus men it heriyeg lit weregma Marta suburu isag isaruk lit ler eneptuk latfag.

³Weregma Maria inowen ahaluwe amben fanowon kubag misig onggo anggolo reg angge famen walug watfareg Yesus uyugmu are ribareg oruk fam puhun turuk latfag. Ari turukmu o ino fam ahaluwe amben eneg turuk latfag.

⁴Ari turuk latfagma Yesus otsi itano misig Yudas Iskariot At wabukag ulug huruwe lahuk pibag ahun inowen ele uruk lit,

⁵”Ahaluwe amben fanowon ari ayeg waroho uang inggila teng-teng angge helelepteg uang ari ap enengge elehon og isawon famen nungge fahet tehek,” ibag.

⁶Ibag ane ari ap enengge elehon nindi ulug wenggel haruk eleg anggeyen ap enengge yoholiyangge waruk ahun wereg liren ibag. At ino uang emberuk angge seneg lit winon hirag taruk latfag.

⁷Yudas inowen ari ibagma Yesusen te, ”Aren tehek ane ari An helep elma kilap nabuhupmu tuhu hag toho tehekma imbisiyek.

⁸Ap enengge elehon likiya hupmu hit honolohotma welamuhup angge famen An mondabi hit min welaruhuk fug,” ibag.

⁹O pumbuk ino fam Yesus wereg urukon hol hibareg Yahudi inap anggolo roho watfag. Watfahon arimano Yesus fahet eneg pen hul ulug watfag fug. Hun Lazarus Yesusen olukap tibahon ino oho kim hul ulug watfag.

¹⁰Watfagma imam onowesi itanowen, ”Ap anggolo nit nenele holuk fug angge Yesusen Lazarus olukap tirisi ulug At ubam eneg wenggel haruken Lazarus oho ware fesuhuk,” ulug enele sahaltuk latfag.

¹¹

¹²Likiyamon ap anggolo Paskah nahuk ulug watfahon arimanowen Yesus o Yerusalem horogma waharuk urukmu hol hibareg

¹³palem ahen inggila angge kong toho wibareg Yesus waharukmu olohotma libareg enele uruk lit, ”Israel inap Onowe suwon Allahn monde ferisiyon ino waharuken At hi ruruk lit Allah wel tul,” ulug enele hi roho uruk latfag.

¹⁴Atam haharoho imbibahon ino hikit toho Yesus wam keledai kabiniyon eke yet hibareg emberimu lahibareg laruk latfag.

¹⁵Haharoho imbibahon te, ”Sion hinap henekol ha fug, honowe suwon wam keledai umalik kabiniyon emberimu heriyeg lit waharuken yet hemek,” ulug haharoho imbibag.

¹⁶Ari turuk latfag ane fahet Yesus otsi inindi anggar am fug angge welatfagma Allahn Yesus olukap tibagma eneg otsiyen te haharoho imbibahon ari Yesus fahet haharoho imbibahon hikit toho turusa ulug inindi anggar atfag.

¹⁷Yesusen Lazarus wareg angge kilapfag ambehen wol tibareg olukap turuk sambil ap anggolo libahon arimanowen, ”Hun aruwen ap warehon olukap tirisimu ninilen harukuk,” ulug ap hiyag isaruk lit At wel tibag.

¹⁸Ari tirisi ahun waharuk urukmu hol hibareg ap anggolo arimano olohotma laruk latfag.

¹⁹Laruk latfagma Farisi inap arimanowen it-it enele sahaltuk lit, ”Yet hemek, ap obog toho arimano At ele holtuk lit ombolim laruk. Hiren nungge-nungge tehep ha fug teg!” ibag.

²⁰Ap anggolowen wam Paskah naruk lit Allah wel tuhuk ulug Yerusalem libahon arimano Yunani inap tot welatfag.

²¹It welatfahon itano Filipus ambeg libag. Hun Filipus ino Galilea kinang fam o pumbuk misig unuk Betsaida ahun welatfag. Welatfahon ino ambeg libareg ubam enele uruk lit, ”Nonowe, nit Yesus men ambi amul peruk lahe,” ibag.

²²Filipus inowen Andreas fam ari ehesa ulug hiyag itfareg it enebe pirenen Yesus hiyag irik libag.

²³Hiyag irik libagma Yesusen it unubam ele uruk lit, ”At ap atik ibahon ino Allahn suwap tuhu sambil horog arik waha.

²⁴Aben suburu roti anggen kinangma fok turuk angge famen ahap selmon filik turuk eleg halug fahaluk fug angge saplangge amu welaruhu. Ahap selmon filik turuk halug fahaltuk lit inggila wilip atug anggen anggolo yihik feruk. Ari tem toho hiyag hisaruk lahi.

²⁵Ap san noluk welale perukon ino oluk welaruhu fug. Ap san kinangma tuma ilamna welahi perukon ino mondabi oluk welaruhu.

²⁶Ap san An let naptuk halug An nombolim lahureg An wereg ambeg namingmingangge roho welaruhu. Ap sa An let naptuk halug Nikniyen oho at ino wel tuhu.”

²⁷”Ketiya nindi anggin atuken Nikni fam nungge heng timin? Nikni, An nubam aruhu ane fahet Haren let nabuhun ulug heng tamin ano? An kinangma tuma waharikikon siyag ane ari nubam amag ulug waharikik angge re ari heng tamin fug.

²⁸Nikni, Hat hunuk su amag,” ulug Yesusen urukmu ele poholman uruk lit, ”An ninggarehen nunuk suwap tirikikteg fobik oho suwap tuhuk,” ibag.

²⁹Ap anggolo unduhuk latfahon arimanowen ele ari hol hibareg, ”O ululu turuk,” uruk latfag. It winonen, ”Ot malaikat misihen At ubam ele uruk,” uruk latfag.

³⁰Ari uruk latfagma Yesusen hiyag isaruk lit, ”Ele ehekon ari An nubahet ehek fug, hit aruma hunubahet ehek.

³¹Alem angginon ap kinangmon unubam welaruhuwon ketiya ak teberuk. Ari famen kinang aruma ngi roho seneg ahun ino lisoho hik isa wilip atuk.

³²An kinangma tuman lehoma numbahakupmu Anden oho ap obog toho nambeg wamag ulug lisoho og enebuhuk,” ibag.

³³Yesusen ibag ane ari nangginoho war aruhuk ulug ele ari roho hiyag isibag.

³⁴Aren hiyag isibag ane fahet ap anggolo arimanowen, ”Atam haharoho imbibahon fam Mesias ino mondabi oluk welaruhu ulug nonoluk teg latisi. Ap atik ibahon ino lehoma umbuhup ehenon ari nangginoho ehen? Ap atik ibahon ino sa fahet ehen?” ulug kapal hibag.

³⁵Kapal hibagma Yesusen hiyag isaruk lit, ”Hit henesehelimu seleg werehon ari we tot welaruhu. Hik atuk ambeg apma hit kuhup tohon seleg ino hit men ambiyeg weregma laruk lamek. Ap sa o hik tegma laruk halug lamin peruk ambeg ino o hik tehen indi anggar atuk eleg.

³⁶Seleg werehon ino umalikisi amuhuben seleg ino hit men ambiyeg weregma At ubam hinindi wenggel haruk lamek,” ulug hiyag isibag. Ari ulug hiyag isibareg it welatfag ambeg inowen Yesus longgo imin ulug hirag atfag.

³⁷Yesusen it onolohotman fano ane anggolo tibag angge famen iren ubam wenggel haruk latfag fug.

³⁸Wenggel haruk latfag fuhon ari Yesayan tam haharoho imbibahon ino men hikir atfag. Yesayan haharoho imbibahon tu, ”Nikni, niren hiyag isaruk ane ap san tem toho peruk? Allah inggik ineyon ino tu ulug ap san wenggel haruk?”

³⁹Yesayan nin eke hahatfahon hikit toho inindi wenggel haruk latfag fug. Eke hahatfahon tu,

⁴⁰”Inil fam yet hahupteg inindi anggar atuk lit fanowap nenebuhu ulug suhuloho nambeg wamuhup tohon inil hubun eneptisireg inindi ninap eneptisi.”

⁴¹Yesayan hahatfag ane tu Allahn mumal tarisiyon ino aliliyangge roho weregma yet hibareg tu At ino fahet haharoho imbibag.

⁴²Ari reg angge famen Yahudi inap onowesi arimano anggolowen Yesus fam wenggel haruk lit welatfag angge famen Farisi inaben yeng umbuhup tohon ulug fag toho hiyag isibag fug.

⁴³It arimanowen aben wel eneptuk ane enehiyeg toho wereg lit Allahn wel eneptuk ane fahet inirim teg latfag.

⁴⁴Yesusen ele hi roho hiyag isaruk lit, ”Ap san An nubam wenggel haruk halug at inowen An nubam eneg wenggel haruk eleg, Nikni An mon naptisiyon ino ubam oho wenggel haruk lit wereg.

⁴⁵Ap san An yet niyaruk halug at inowen Nikni mon naptisiyon ino yet haruk.

⁴⁶Ap kinangmon aruma unubam seleg amag ulug An iral fanowon waharikik. Ap obog toho An nubam wenggel harukon hik teg ambeg welamuhup fug.

⁴⁷Wene hiyag isaruk lahiyon aben holtuk angge famen Anden urukon hikit toho turuk eleg halug unggum ubam weregma Anden kong tuhuk fug. An kinangma waharikikon unggum kong tuhuk ulug waharikik fug, fanowap enebuhuk ulug waharikik.

⁴⁸Ap san nele holuk fug anggeyen hikip naptuk halug at ino fahet kong tuhu ahun winon eke wereg. Fobik aruhu sambil wene hiyag isaruk lahiyon ariyen it arimano unubam unggum werehon kong tuhu.

⁴⁹Anden hit hiyag hisaruk lahiyon namu wenggeltuk ane hiyag hisaruk lahi fug. Nikni An mon naptisiyon inowen ari roho hiyag isaruk laruhun ulug nubam irisimu Anden hit hiyag hisaruk lahi.

⁵⁰Nikni ele ap unubam emberisiyon ari fam mondabi onoluk amuhup ane An noluk. Anden nele uruk lahiyon aru Nikniyen hiyag isahun ulug nubam irisi ane hiyag hisaruk lahi,” ulug hiyag isibag.