Read Angguruk Yali YOHANES 13 Bible Online

YOHANES 13 - Angguruk Yali bible

YOHANES 13

¹Welatfagma suburu roti sig elehon Paskah naruk sambil uwan latfagma kinangma tuma embeselug Nikni ambeg lahuk pibag sambil horog aha ulug Yesus undaman oluk teg latfag. Oluk toho wereg lit otsi likiya hupmu indi enesug latfag hag toho war arik oho lir oho otsi indi enesug latfag.

²It suburu ambiyeg naruk lit weregma Simon Iskariot amloho Yudas ino ambeg siyahon Iblis watfareg isanggo kilabeg hiyag utuk lit At wabukag tohon huruwe lamihin ulug hiyag itfag.

³Nikniyen mun angge man angge ninggikmuwap tirisireg mon naptisimu waharikikteg nin suhuloho Allah ambeg lahuk ulug Yesus indimu oluk atfag.

⁴Oluk atfagma in atfareg sum ebemon nonggoloho imbisibareg sum siyahon eke alunggu ke pug tibareg

⁵ik hililoho kubag fam kilapfareg otsi unuyug ke umag enebil laruk latfag. Umag enebil laruk lit sum alunggu ke pug tibahon ino fam ho enebil laruk latfag.

⁶Ari til laruk lit Simon Petrus ambeg watfagma Petrusen Yesus fam ele uruk lit, ”Nowe, Haren an nuyug umag napmihin ano?” ibag.

⁷Ari ibagma Yesusen, ”Anden turuk lahi ane ari hat ketiya hapeleg angge famen fobik hindi anggar aruhu,” ibag.

⁸Ari ibagma Petrusen, ”We tem toho Haren nuyug umag nabuk fug,” ibag. Ari ibagma Yesusen te, ”Anden hat huyug umag hapmin fug halug An nubam werehon hat ngi aruhun fug,” ibag.

⁹Ari ibagma Simon Petrus inowen, ”Nowe, nuyug eneg umag napmihin fug, ninggiket nunggulet nebe abirangge umag napmihin,” ibag.

¹⁰Ari ibagma Yesusen te, ”Ap sa ebe abirangge umako werehon ino ebe puhun toho werehen we uyug amu eneg umabuk teg,” ibag. ”Hit henebe umako puhun toho welahep angge famen henebe obog toho umaho lahep fug,” ibag.

¹¹Henebe obog toho umaho lahep fug ibag ane ari wabukag ulug huruwe lamin pibag ahun ino undaman oluk teg lit hiyag isibag.

¹²Unuyug obog toho umag enepfareg asum wan tibareg welatfag ambeg suhuloho libareg otsi unubam ele uruk lit, ”Anden tihi ane fahet hinindi anggar aha ano?” ulug kapal isibag.

¹³”An hit Hinikni Honowe welahimu hiren An fahet Ninikni Nonowe uruk lahebon tem toho uruk lahep.

¹⁴An Hinikni Honowe welahiyon inowen hunuyug umag henebihimu hiren oho hit-hit hunuyug umag-umag atuk lamuhup.

¹⁵Anden hit hunubam tihi ane aru hiren oho aru hag toho turuk lamuhup ane fahet wirimangge hiyag hisihi.

¹⁶Ikni apma weregma amingmingangge palimu welam fug teg. Lalihip ulug mon eneptuk ahun apma weregma laruk inap palimu welam fug teg. Ari tem toho hiyag hisaruk lahi.

¹⁷Hiyag hisihi ane ari hinindimu honoluk toho welamuhup halug hininggik fam turuk lamuhupmu eneg fano welamuhup.

¹⁸Hit obog toho fahet uruk lahi fug, Anden mumal eneptikikon itano eneg noluk teg lahi. Tam haharoho imbibahon aru iminon hikit toho teko lahu, ’An nasuburu naruk ahun ino uyuhen sobit niyahu,’ ulug haharoho imbibag.

¹⁹Ihi ane ari teko lahu halug hiren Aren irisi ane tem toho puhuben uwan teko la fugmu hiyag hisaruk lahi.

²⁰Ap sa Anden monde ferukon ap ekeyen hondoko ibam kilaptuk halug at inowen An hondoko ibam kilap naptuk. Ap san An hondoko ibam kilap naptuk halug at inowen Nikni mon naptisiyon ino hondoko ibam kilap taruk. Ari tem toho hiyag hisaruk lahi,” ulug hiyag isibag.

²¹Hiyag isibareg Yesus indi anggin atfagma ele eke hiyag isaruk lit, ”Notsi, hit welahebon aruma henesehelimuwon misihen An nuwabukag ulug huruwe lamin peruk lit wereg. Ari we tem toho hiyag hisaruk lahi,” ibag.

²²Ibag ane ari fahet inindi su atfagma sa fahet ehek ulug it arimano yet-yer atuk latfag.

²³Yesus ot misig indi reg latfahon ino inggik pikit fil iraham hur atfag.

²⁴Iraham hur atfahon ino fam Simon Petrus inowen il humbur ibareg ele ahuri ha roho, ”Sa fahet ehen ulug kapal himin,” ibag.

²⁵Ibagma Yesus iraham heriyeg latfahon ino Yesus fil hebel atfareg kapal haruk lit, ”Nowe, ari sa fahet ehen?” ibag.

²⁶Ibagma Yesusen, ”Suburu ik yuhuloho tam og itminon ariyen tuhu ane fahet ihi,” ibag. Ari ulug hiyag itfareg suburu wibareg ik yuhuloho Simon Iskariot amloho Yudas ino og itfag.

²⁷Suburu og itfahon ino wibareg Yudas ino undama siyahon Iblis ino kibag. Kibagma Yesusen Yudas fam ele uruk lit, ”Haren timin pehen ane ari folo-folo timihin,” ibag.

²⁸Ari ibagma it Yesus men ambiyeg wereg lit suburu naruk latfahon arimano misihen oho nungge fahet ehek ulug inindi anggar atfag fug.

²⁹It arimanowen Yudas uang emberuk angge foroho latfag angge re uang ari fam nit tuma nul angge ayeg waroho wak lamihin ulug ehek ano, ap enengge elehon og isamihin ulug ehek ano peruk latfag.

³⁰Suburu Yesusen og itfahon ino wibareg Yudas ino hik tegma folo-folo wilip atug libag.

³¹Yudas ino wilip atug libagma Yesusen otsi hiyag isaruk lit, ”Ketiya At ap atik ibahon ino Allahn palimuwap turuk, At unuk fam Allah inggareg oho palimu atuk.

³²At unuk fam Allah inggareg oho palimu atuk halug At ino ambiyeg wereg lit At ino folo-folo palimuwap tuhu.

³³Numalikisi, we tot hit men ambiyeg welamulmu hiren An yami naptuk lamuhup. An lahuk ambeg hit lahep ha fug teg ulug Yahudi inap tam hiyag isarikik hag toho ketiya hit hunubam hiyag hisaruk lahi.

³⁴Aben hit komo henepfag fuhon Anden keron tu komo heneptuk lahi: Hit-hit hinindi roho welamuhup. Anden hit nindi henesug lahi hag toho hiren oho hit-hit hinindi roho welamuhup.

³⁵Hit-hit honori hinindi roho weregma yet hisahupteg ap obog tohowen Yesus otsi tuma wereg puhup,” ulug Yesusen hiyag isibag.

³⁶Hiyag isibagma Simon Petrus inowen, ”Nowe, Hat kema lahun?” ulug kapal hibagma Yesusen, ”Ketiya An lahuk ambeg hat nombolim lahen ha fug teg, fobik eneg hat An nombolim lahun,” ibag.

³⁷Yesusen ari ibagma Petrusen, ”Nowe, ketiya an nungge fahet Hat hombolim la fug teg lahi, an Hat fahet fano nuwabukag,” ibagma

³⁸Yesusen te, ”Hat An fahet fano nuwabukag peruk lahen? Suwe ayam ele uwan uk fugmu haren hinahanam An nubahet awiya wahun. Ari tem toho hiyag hutuk lahi,” ibag.