Read Angguruk Yali YOHANES 14 Bible Online

YOHANES 14 - Angguruk Yali bible

YOHANES 14

¹”Nori, hinindi yuk la fug, Allah ubam hinindimu wenggel hemek, An nubam oho hinindi wenggel hemek.

²Nikni wereg ambeg kolo regma anggolo wereg. Kolo regma eleg lalepman nangginoho hit hunubam Anden hiyag hesele. An tam lahukteg hit welamuhup ambeg kolowap turuk laruhuk.

³Hit welamuhup ambeg kolowa fuhukteg hit An men ambiyeg welamuhuk ulug suhuloho waruhukteg hondog henebik waruhuk.

⁴An lahuk abunggalem hit honoluk,” ibag.

⁵Ari ibagma Tomas inowen, ”Nowe, lahun ambeg nit nenepeleg angge famen kebunggalem honoluk ehenon kema lahunen ehen?” ulug kapal hibag.

⁶Kapal hibagma Yesusen, ”Kebunggalem fanowon men tem toho uruk ane men An welahi. Mondabi honoluk welamuhubon fahet An welahi. Ap san Nikni ambeg lamin peruk halug An fahet apelegma la fug teg.

⁷An fahet honoluk teg lalepma Nikni oho honoluk teg lalep. Ketiya famen At ino yet hehepteg hit honoluk aha,” ibag.

⁸Ibagma Filipus inowen, ”Nowe, Nikni tu wereg ulug hiyag nisimin. We tot ari fahet heng haptuk lahe,” ibag.

⁹Ibagma Yesusen at ubam, ”Indam angge hit men anggolo welatikik angge famen Filipus, haren niyaruk lahen fug? Ap san An niyaruk halug at inowen An Nikni oho haruk. Nikni tu wereg ulug hiyag nisimin ehenon ari nungge fahet ehen?

¹⁰An oho Nikni men welahi, Nikni oho An men werehon fahet tem toho wenggel haruk lahen fug? Anden hit hiyag hisaruk lahiyon aru An namu nindi wenggel harukon fam hiyag hisaruk lahi fug. Nikni An nubam werehon inowen yabuk fanowon Aren wiri feruk.

¹¹An oho Nikni men welahi, Nikni oho An men werehon fahet tem toho wenggel haruk lamek. Hinindi nonghong uruk halug yabuk fanowon Anden wiri feruk lahiyon tu fahet tem toho hinindi wenggel hemek.

¹²Ap sa An nubam wenggel haruk halug at inowen yabuk Anden ak teberuk lahiyon ari wituk laruhu. Anden ak teberikikon tor angge famen Nikni ambeg lahukmu at inowen su roho wituk laruhu, ari tem toho hiyag hisaruk lahi.

¹³Amloho unuk fam Ikni palimu aruhuwen hiren An nunuk fam heng nabuhubon Anden og hisahuk.

¹⁴Nungge-nungge An nunuk fam heng nabuhupmu Anden og hisahuk.”

¹⁵”Hiren An hinindi nasug lamuhup halug Anden komo heneptikikon hikit toho turuk lamuhup.

¹⁶Hit fahet Anden Nikni fam heng tuhukmu ap misig eke hit likiya hupmu let heneptuk laruhuwon ino og hisahu.

¹⁷Og hisahu ihiyon ari Allah hime fanowon tem toho perukon ino og hisahu. Ap kinangmon inindi anggat teg eleg lit yet haruk elehen At ino it unubam wambik wam fug teg. At ino hit men wereg lit fet henesuhon ino hiren yet haruk lahep.

¹⁸Hit malik suwarehon hag toho hunumbahalug lahuk fug, nin henembeg suhuloho waruhuk.

¹⁹We tot welamuhukmu ap kinangmonen An yet niyahup fug. An noluk weregma hir oho honoluk wereg lit yet niyahup.

²⁰An Nikni nim welaruhuk, hit An nim welamuhuk, An hit nim welamuhuk, ari roho welamuhukon ari o ino sambil honoluk aruhu.

²¹Ap sa Anden komo eneptikik ane roho turuk laruhu halug at inowen An indi nasug laruhu. Ap san An indi nasug laruhu halug at ino oho Nikniyen indi reg laruhu. Anden oho at nindi reg lit An fahet at indi anggarap tuhuk,” ulug hiyag isibag.

²²Ari ibagma ot misig Yudas, huruwe libahon inowen fug, Yudas winon ekeyen ele uruk lit, ”Nowe, ap kinangmon inindi anggarap enebuk fug anggeyen nungge fahet nit nunubam eneg hinindi anggarap henebuhuk ehen?” ulug kapal hibag.

²³Kapal hibagma Yesusen ele uruk lit, ”Ap ekeyen An indi nasug halug Anden hiyag isarikik ane roho turuk laruhu. Nikniyen at ino indi haruk lit nit at ambeg wamuhukteg at min ambiyeg welamuhuk.

²⁴Ap sa An indi nasug eleg halug Anden hiyag isarikik ane roho turuk laruhu fug. Wene hit holtikibon ino An nubamon fug, Nikni mon nabik waharisiyon ino famon hiyag hisarikik.

²⁵An hit min ambiyeg wereg lit obog toho aru hiyag hisarikik.

²⁶An nunuk fam Nikniyen let heneptukon Allah hime fanowon ino pilabik waruhu. Anden tam hiyag hisarikikon Aren eneg honolukap heneptuk lit mun ane man ane hiyag hisaruk laruhu.

²⁷Honori men mangno atuk ane An lik oho lit hit hunubam emberuk lahi. Mangno atuk ane An nubam werehon hit og hisaruk lahi. Anden hit hininggikmu emberuk lahiyon aru kinangmonen og hisarukon men wirim teg eleg. Hinindi yuk lalug henekol toho welam fug.

²⁸An lahuk angge famen nin suhuloho henembeg waruhuk ulug hiyag hisarikikon ari hiren holtikip. Hiren An hinindi nasug lalepma Nikni ambeg lahuk ane fahet henehiyeg toho welalep. Nikni ino palimu reg, An apma reg lahi.

²⁹Anden hit hunubam ihi ane ari teko lahu sambilen tu fahet irisi ulug hinindi wenggel haruk lamuhuben uwan teko la fugmu hiyag hisaruk lahi.

³⁰Ap kinangmon onowe welahi perukon ino horogma waharuken anden hit nim nenele anggolo uruk lamul fug. Ari peruk lit waharuk angge famen at inowen an palimu welahi ulug an apmayap napmisi fug.

³¹An Nikni nindi reg lit mun angge man angge aren hiyag nitisi ane hikit toho turuk laruhukon fahet ap kinangma werehon inindi anggar aruhu. Notsi, welahe ambeg tu embeselug lulen in atug maniyek,” ibag.