Read Angguruk Yali YOHANES 16 Bible Online

YOHANES 16 - Angguruk Yali bible

YOHANES 16

¹”Hinindi nin aruhumu An fahet ninirim uhup tohon obog toho aru Anden hit hunubam hiyag hisaruk lahi.

²Nit men sebe roho welamul fug ulug aben enele yeng hunubam umbuhup. Fobik tot welamuhupmu tuhup ane aru henebe pinggi hunusuhupteg Allahn perukon fam tehe ulug uruk lamuhup.

³Iren hit hunubam turuk lamuhup ane ari Nikni men An men fahet inindi anggat teg elehen turuk lamuhup.

⁴Anden hit hunubam ihi ane aru obog toho teko lahu sambil ino Nonoweyen nit nunubam tu fahet tem toho hiyag nisarisi ulug honoluk aruhuwen hiyag hisaruk lahi.” ”An hit men ambiyeg welahe ulug atam alem aru fahet hiyag hisarikik fug angge famen

⁵ketiya Nikni An mon naptisiyon ino ambeg lahukon horog tehen hiyag hisaruk lahi. Hat kema lahun ulug hit misihen oho kapal niyaruk lahep fug.

⁶Anden aru fahet hiyag hisaruk lahimu hinindi anggin toho welahep.

⁷Hinindi anggin toho welahep angge famen An lahukon fam hit fano welamuhuben Anden tem toho hiyag hisaruk lahi. An lele fugmu let heneptukon ino henembeg walep fug angge famen An lahukon ariyen let heneptukon ino hit henembeg monde fik waruhuk.

⁸Monde fik waruhukmu At inowen kinangman unggum kong turuk lit hit ap kinangmonen siyag ane ari turuk lit pikir ane tu embeserikip ulug ap inindi anggarap enebuhu.

⁹Ap kinangmonen An nubam inindi wenggel haruk elehon aru siyag ane turuk ulug hiyag hisahu.

¹⁰An fahet At Ikni ambeg larisiyon yet ha fug teg ulug ari tem toho uruk ane hiyag hisahu.

¹¹Kinangma ap suwon welahi perukon ino unggum angginon ubam werehon kong tirisi ulug hit hiyag hisahu.

¹²Hit fahet anggolo hiyag hisawon wereg angge famen ketiya hinindi anggar am fug tehen nin eke hiyag hisamin fug.

¹³Allah hime fanowon tem ane urukon ino hit henembeg waruhureg tem toho peruk ane arimano obog toho Aren hiyag hisaruk laruhu. At inggareg indimuwen peruk ane fahet hiyag hisahu fug. Allahn ubam urukmu tam holuhu ane ari eneg hunubam uruk laruhu. Fobik aruhu ane fahet Aren tam fag toho hiyag hisaruk laruhu.

¹⁴An nele At ubam umbuhukmu hit hiyag hisahuwon ari famen An nunuk palimuwap nabuhu.

¹⁵Mun angge man angge Nikniyen forohowon arimano An oho ngi reg lahi. Fahe ihi ane ari, ’An nele At ubam umbuhukmu hit hiyag hisahu,’ ihi ane ari An oho ngi reg lahi ulug ihi.”

¹⁶”Tot welamuhupteg hiren An niyahup fug angge famen nin tot welamuhupteg hiren An niyahup,” ibag.

¹⁷Yesus otsi welatfahon arimano winonen it-it enele sahaltuk lit, ”Nit nunubam ehek ane nungge fahet ehek? ’Tot welamuhupteg hiren An niyahup fug angge famen nin tot welamuhupteg hiren An niyahup,’ ehekon ari men, ’An Nikni ambeg lahuk,’ ehekon ari men nungge fahet ehek?” ibag.

¹⁸Ibareg nin enele sahaltuk lit, ”Tot welamuhupteg ehekon ari nungge fahet ehek, Aren pehek ane ari nit nenepelegman ehek,” ulug enele sahaltuk latfag.

¹⁹Yesusen te iren tot kapal niyalusa ulug undaman tam oluk atfagma it unubam kapal isaruk lit, ”Notsi, Anden fahe ihi ane aru, ’Tot welamuhupteg hiren An niyahup fug angge famen nin tot welamuhupteg hiren An niyahup,’ ihi ane ari fahet hit-hit henele sahaltuk lahep?

²⁰Fong watuk lit uba yatuk lamuhup angge famen ap kinangmonen enehiyeg hahup. Hit hinindi anggin toho welamuhup angge famen hinindi se aruhumu henehiyeg toho welamuhup. Ihi ane aru tem toho hiyag hisaruk lahi.

²¹Hiyap malik indag taruk lit war am hag toho welahi ulug indi anggin haruk angge famen malik indag atuk halug war ale perukon ino apeleg atukmu malik keron indag tihi ulug ahiyeg haruk lit wereg.

²²Ihiyon ari hag toho hit ketiya hinindimu anggin toho welahep angge famen Anden hit yet hisahukmu hinindimu henehiyeg toho welamuhup. Ap ekeyen oho henehiyeg toho welamuhubon ari elehap tuhu fug.

²³Teko lahu sambil ino hiren mun ane man ane fahet An nubam kapal niyahup fug. Mun ane man ane fahet hiren Nikni fam heng tuhupmu An nunuk fam Aren og hisahu. Ari tem toho hiyag hisaruk lahi.

²⁴Hit men ambiyeg welatukuk angge ketiya oho An nunuk fam misig oho heng tarikip fug. Heng tiyok, heng tuhupmu Nikniyen og hisahumu mondabi henehiyeg toho welamuhup.”

²⁵”Obog toho aru hit hunubam hiyag hisaruk latikikon indit toho hiyag hisaruk latikik, tot fobik welamuhukteg indit toho uk fug angge seleg toho Nikni fahet hiyag hisahuk.

²⁶Ari tuhup sambil ino hiren An nunuk fam sembahyang uruk lamuhupmu Anden hit hunubahet Nikni fam heng tuhuk ulug hunubam uruk lahi fug.

²⁷Hiren An hinindi nasug lit Allah famen waharisi ulug tem toho peruk lahepma Nikni inggarehen hit fahet indi henesug lit wereg.

²⁸An kinangma tuma waharikikon Nikni weregman waharikik angge re lik oho lir oho kinang aru embeselug Nikni ambeg suhuloho lahuk,” ibag.

²⁹Yesusen ari ibagma otsiyen te, ”Nonowe, ketiya indit toho hiyag nisa fug angge seleg toho ehenon holehe.

³⁰Mun ane man ane Hat holuk teg lit welahenma ap misihen oho Hat hubam kapal hiya fug teg ulug nonoluk aha. Nonoluk ahama Allah wereg ambehen waharisi ulug ari tem toho wenggel haruk lahe,” ibag.

³¹Ari ibagma Yesusen, ”Ketiya tem toho An nubam wenggel haruk lahep?

³²Nori, teko lahu irikik ane ari ketiya teko lamisimu hit An numbahalug hinibam wal taneg linggik-longgo ilihipmu An namu welatmin angge famen namu welaruhuk peruk lahi fug, Nikniyen An fet nasug lit welaruhu.

³³Hit An men mangno roho wereg lit hinindi se roho welamuhuben obog toho ari hiyag hisaruk lahi. Hit kinangma wereg lit hinindi henekol toho welahepma Anden kinang aru apmayap tirikikmu hinindi yuwag toho welamuhup,” ulug hiyag isibag.