Read Angguruk Yali YOHANES 17 Bible Online

YOHANES 17 - Angguruk Yali bible

YOHANES 17

¹Yesusen ari ulug hiyag isibareg il poholma lahap hibareg ele uruk lit, ”Nikni, An nubam tulusa ane ino ketiya horog arik wahama hamlohowen Hat palimuwap habuhuwen Haren hamloho palimuwap timihin.

²Mun angge man angge hamloho uyug alma emberikinteg Haren At palimu unduhuk ferikin. Haren At og itikinon arimano obog toho Aren mondabi onolukap enebuhu.

³Mondabi onolukap enebuhu ane aru Hat misig eneg Allah tem toho welahenon men Yesus Kristus Haren monde ferikinon ino men fahet inindi anggar aruhumu mondabi onoluk welamuhup.

⁴Haren yabuk wiruhun ulug nubam emberikinon ino wiri feruk lit kinangma tuman Hat hunuk palimuwap tirikik.

⁵Pohol kinang wal tuk fugmu Hat min An lehoma welatukuk hag toho ketiya oho nunuk lehoma numbahamihin.

⁶Ap kinangmon Haren og nitikinon itano unubam Hat hunuk inamap tirikik. It arimano Hat ngi reg lit og nitikinmu iren Hat hawene fano senetusa.

⁷Haren An og nitikinon fahet obog toho Hat ngi reg lahen ulug ketiya it onoluk atisi.

⁸Hawene Haren An hiyag nitikinon ino Anden it hiyag isarikikmu holtusa. Haren An mon naptikinmu Hat wereg ambehen An waharikikon fahet tem toho ulug inindimu wenggel haruk.

⁹Anden it fahet sembahyang uruk lahiyon aru ap kinangmon obog toho fahet sembahyang uruk lahi fug, ap Haren og nitikinon arimano Hat ngi reg lahen ulug it unubahet uruk lahi.

¹⁰Mun angge man angge Anden seneg lahiyon Haren oho seneg lahen, Haren ngi reg lahenon Anden oho ngi reg lahi. It famen An nunuk palimu atisi.

¹¹An kinangma welahi fug, Hat hambeg watminon sali horog tehen it aruma eneg kinangma welamusa. Nikni, Hat suwon inowen An nunuk Haren suwal naptikinon ari fam it fer enesug laruhunmu nit Hat men mangno roho welahe hag toho it enebe misig mangno roho welamuhup.

¹²It men ambiyeg wereg lit An nunuk Haren suwal naptikinon ino fam Anden kul eneptuk latikik. Anden kul eneptuk lit fer enesugmu misig oho longgo irisi fug angge famen we Haren longgo uhu perikinon ino suwesingga tam haharoho imbibahon hikir amag ulug at misig eneg longgo uhu.

¹³An Hat hambeg waharuk ane horog tehen il misig kinangma tiya wereg lit hubam uruk lahi. It inindimu An fahet enehiyeg toho welamag ulug uruk lahi.

¹⁴Hat hawene Anden it hiyag isarikikmu ap kinangmonen it fahet ninirim peruk latusa. An oho kinangmon fug, notsi oho kinangmon fug, enemu inap aruma ulug ninirim peruk latusa.

¹⁵Anden hubam uruk lahiyon aru kinangman it lisoho og enebuhun ulug uruk lahi fug, we unubam siyag ane aruhu rohon Haren fer enesug laruhun ulug hiyag hutuk lahi.

¹⁶An oho kinangma nahun fug, ir oho kinangma inap fug.

¹⁷Wene fanowon ino fam tem toho peruk ane eneg werehen tem toho peruk ane ino unubam emberuk lit fanowap enebuhun.

¹⁸Haren An kinangma lamihin ulug mon naptikin hag toho Anden oho it kinangma lalihip ulug mon enebuhuk.

¹⁹It inindimu tem peruk lit Hat Allahn tohon amuhuben An ninggareg nebe oho Hat hubahet emberuk lahi.”

²⁰”An notsi fahet eneg sembahyang uruk lahi fug. Notsiyen wene hiyag isarukmu holtuk lit An nubam wenggel haruk lamuhup inap fahet oho nele uruk lahi.

²¹Nikni, An Hat men mangno roho welahimu Hat An men mangno roho welahe hag toho it obog toho enebe misig wereg lit nit men mangno roho welamuhuk. Welamuhukmu ap kinangmonen An Haren mon nabik waharikinon nubam inindi wenggel niyahup.

²²An men Hat men nenebe misig welahe hag toho ir oho enebe misig mangno roho welamuhup ulug Haren An palimuwap naptikin hag toho Anden it palimuwap eneptikik.

²³An it men weregma Hat An men welaruhunmu it enebe misig mangno roho welamuhup. Mangno roho welamuhupmu ap kinangmonen Haren An mon nabik waharikinon fahet inindi anggar aruhu. Inindi anggar aruhumu Haren An hindi nasug lahen hag toho notsi oho hindi enesug laruhun ane onoluk aruhu.

²⁴Nikni Allah, notsi Haren og nitikinon arimano An welaruhuk ambeg ir oho welamuhup peruk lahi. Ir oho An min wereg lit naliliyangge Haren lahap naptikinon ari notsiyen oho yet hahup. Pohol kinang uwan wal tuk fugmu Haren An hindi nasug latikin.

²⁵Nikni Hat fano hahun, ap kinangmonen Hat fahet enepeleg toho wereg. An ninggarehen Hat fahet noluk teg lahi hag toho notsiyen oho Haren An mon nabik waharikinon onoluk atisi.

²⁶Haren An hindi nasug lahen hag toho An it men ambiyeg weregma iren oho inindi nasug lamuhuben Anden Hat hunuk tam hiyag isaruk latikik hag toho fobik oho hiyag isaruk laruhuk,” ulug Yesusen Allah ubam sembahyang ibag.