Read Angguruk Yali YOHANES 18 Bible Online

YOHANES 18 - Angguruk Yali bible

YOHANES 18

¹Yesusen obog toho ari hiyag isibareg otsi men o inowen wilip atfareg ik Kidron fumag fil nindig atfag. It nindig atfag ambeg ari elehet walinggoho kilabegma o sabo wirig ambeg otsi men ambiyeg libag.

²Yesus otsi men wina sambil oho laruk latfag ambeg ino Yudas Yesus wabukag ulug huruwe libag ahun inowen oho oluk teg latfag.

³Oluk teg latfagma Yudas inowen sehen seneg inap men imam inap onowesi arimano enemingmingangge men Farisi inap mon enepfahon men iralet sehenet wibareg hondog eneplug waharuk latfag.

⁴Waharuk latfagma Yesus inowen An nubam tulusa ane ulug obog toho undaman oluk atfagma it onolohotma libareg kapal isaruk lit, ”Hiren ap sa yami ril waharuk lahep?” ibagma

⁵iren, ”Yesus Nazaret ahun ino yami ril waharuk lahe,” ibag. Ari ibagma Yesusen it unubam, ”An ino tu welahi,” ibag. Yudas Yesus wabukag ulug huruwe libag ahun ino oho it men ambiyeg unduhuk latfag.

⁶Yesusen it unubam ele uruk lit, ”An ino tu welahi,” ibagma enembol han suhuloho libareg kinangma ying atuk latfag.

⁷Ying atuk latfagma Yesusen nin kapal isaruk lit, ”Hit sa yami ril waharuk lahep?” ibagma iren, ”Yesus Nazaret ahun yami ril waharuk lahe,” ibag.

⁸Ibagma Yesusen, ”An ino tu welahi ulug fahe hiyag hisihi. An yami nabil waharuk lahep halug it ap aruma eneg te embeselihipmu lalusa,” ibag.

⁹Ari roho ibag ane aru tam Allah fam sembahyang uruk lit, ”Haren og nitikinon aruma misig oho longgo reberikik fug,” ibag ane hikir amag ulug ari roho ibag.

¹⁰Ari turuk latfagma Simon Petrus inowen karog lisoho wibareg imam onowe suwon amingmingangge misig unuk Malkus ino anggolop kong turuk lahi ulug turukmen isanggo inggik pikit filon eneg sa roho libag.

¹¹Sa roho libagma Yesusen Petrus fam, ”Karog ari ei fam kilabin. Nikniyen ik kubag fam hinang nitisiyon ino An namin fuhen turuk lahen?” ibag.

¹²Ari ibagma sehen seneg inap arimano onowe men Yahudi inap enemingmingangge arimano menen Yesus senetfareg inggik hele waroho

¹³hondoholug ap unuk Hanas ambeg tam walug libag. Kayafas imam onowe suwon mo ino fam lahapfahon iyamal Hanas ino ambeg walug libag.

¹⁴Kayafas inowen Yahudi inap enele sahaltuk latfahon arimano komo eneptuk lit, ”Ap obog toho siyag amuhup ari siyahen ap arimano fahet ap misig war atukon ari fano,” ulug komo enepfag.

¹⁵Yesus walug larikim Simon Petrus men Yesus ot misig eke men mug eneplug laruk latfag. Ot misig ino imam onowe suwon inowen haruk latfahon ino eneg Yesus men ambiyeg olma kibagma

¹⁶Petrus ino sok selma unduhuk latfag. Unduhuk latfagma Yesus ot tam kibahon ino imam onowe suwon inowen haruk latfahon ino nin suhuloho selma wilip atfareg sok foroho latfag hiyap fam ele ibareg Petrus hondoholug olma kibag.

¹⁷Kurukmen sok foroho latfag hiyap inowen Petrus fam, ”Har oho ap ari ot welahen fug?” ulug kapal hibagma Petrusen, ”An fug-a,” ibag.

¹⁸Ap suwon enemingmingangge men sehen seneg inap men arimanowen sun ulug indok munggalfareg indok yet taruk lit unduhuk latfagma Petrus oho indok yet tamin ulug it enesehelimu unduhuk latfag.

¹⁹Imam onowe suwon inowen Yesus kapal haruk lit, ”Haren hiyag isaruk latikin inap hotsi sa men? Ap hiyag isaruk latikin ane nungge ane hiyag isaruk latikin?” ulug kapal hibag.

²⁰Kapal hibagma Yesusen at ino fam hebeloho hiyag utuk lit, ”Ap obog toho weregma inam toho hiyag isaruk latikik. Wene uruk ibamen oho Allah ibamen oho Yahudi inap obog toho palu atuk ambehen likiya hupmu ebenam toho hiyag isaruk latikik. Hirag-hirag hiyag isaruk latikik fug.

²¹Nungge fahet an kapal niyaruk lahen? Anden ap hiyag isarukmu holtuson arimano unubam kapal isamihinmu iren onoluk teg angge hiyag humusa,” ibag.

²²Ibagma imam onowe amingmingangge horogma unduhuk latfahon inowen Yesus pet turuk lit, ”Imam onowe suwon fam ari roho uruk peruk lahen?” ulug orohole sahaloho ware fisibag.

²³Ware fisibagma Yesusen ap ino fam, ”Ele si ehek peruk lahen halug si ane ari ehen in, tem toho ihi halug nungge fahet An nuwatuk lahen?” ibag.

²⁴Ari ibagma Hanas inowen Yesus inggik hele wareg angge imam onowe suwon Kayafas ambeg walug lalihip ulug hiyag isibagma walug libag.

²⁵Simon Petrus ino indok munggalfag ambeg ino unduhuk lit indok yet taruk latfag. Yet tarukmu ap arimanowen yet hibareg ubam enele uruk lit, ”Har oho At ino ot welahen ano?” ulug kapal hibagma Petrusen awiya waruk lit, ”An fug-a,” ibag.

²⁶Ari ibagma imam onowe suwon amingmingangge misig isanggo kong tibag ahun ino areyen, ”At senerehesa ambeg ino At nim weregma hiyihi fug?” ibagma

²⁷Petrus awiya warukmen suwe ayam ele ibag.

²⁸Yesus ino Kayafas wereg ambehen hondoholug unggum kong turuk ibam ino hubet-habet hondoholug libag. Hondoholug libareg unggum kong turuk ibam kuk fug angge siyag angge nunubam atil larikim suburu roti sig elehon Paskah nengge ha fug lam nowen ulug selma welatfag.

²⁹It selma welatfagma Pilatus ino wilip atfareg unubam kapal isaruk lit, ”Ap tu alem nungge ubam embehepteg walug wahep?” ibagma

³⁰iren te, ”Ap aruwen siyag ane telep fugmu hat hambeg walug wala fug,” ibag.

³¹Ibagma Pilatusen it unubam, ”Ap aru walug lalihipteg suwesingga atam haharoho imbibahon ino kim halihibon hikit toho unggum kong tilihip,” ulug hiyag isibag. Hiyag isibagma Yahudi inap arimanowen, ”Nit nenemuwen ap pinggi wabuk fug teg lahe,” ibag.

³²Nangginoho war aruhuk ulug Yesusen wene ibag ane ino hikir amag ulug iren ari roho ibag.

³³Ari ibagma Pilatus unggum kong turuk ambeg kibareg Yesus wol tibareg kapal haruk lit, ”Yahudi inap onowe suwon Hat aru welahen?” ibagma

³⁴Yesusen te, ”Hat hamu hindiyen ari pehenteg uruk lahen ano, ap winonen An fahet hiyag herehesama ehen ano?” ibag.

³⁵Ibagma Pilatus inowen, ”An Yahudi nahun welahi? Hat hinggareg hori men imam onowesi menen hondog haplug an nambeg wahasa. Haren nungge tirikinmu og haplug wahasa?” ibagma Yesusen,

³⁶”An nibam ngi reg lahi ambeg kinangma tuma fug. An nibam ngi reg ambeg kinangma tuma lalepma hahen notsiyen nibil atuk lit tog aplepma An Yahudi inap ininggikmu ale fug angge famen An nibam yugmu kinangma tuma wereg eleg,” ibag.

³⁷Ari ibagma Pilatusen, ”Ari ehenma Hat ap suwon wereg lit ehen?” ulug kapal hibagma Yesusen te, ”Haren ehen ari, An ap suwon welahi. Tem toho peruk ane fahet ap hiyag isahuk ulug kinangma tuma waharikik. Ap sa indimuwen tem toho peruk halug at ino An nele holtuk laruhu,” ibag.

³⁸Ari ibagma Pilatusen, ”Ehen ane ari tem toho perukon ari nungge fahet ehen?” ibag. Ari ibareg Yahudi inap selma weregma enembeg wilip atfareg, ”At kapal hihimu alem siyag ane tirisiyon misig oho holihi fug,” ibag.

³⁹Pilatusen ari ibareg nin ele uruk lit, ”Mo eke fam eke fam suburu roti sig elehon naruk li ap misig hele warehon lol hisaruk latikik hag toho Yahudi hinap honowe suwon aru lol nisamisi peruk lahep?” ulug kapal isibag.

⁴⁰Kapal isibagma it arimanowen enele hi roho uruk lit, ”Hun aru fug, Barabas lol nisimin,” uruk latfag. Barabas ap unusuruk lit yoholiyangge hilaruk latfag ahun ino fahet lol nisimin ibag.