Read Angguruk Yali YOHANES 19 Bible Online

YOHANES 19 - Angguruk Yali bible

YOHANES 19

¹Ari ibagma Pilatus inowen sehen seneg inap unubam, ”Yesus walihipteg yik angge eneg watlihip,” ulug hiyag isibag.

²Hiyag isibagma sehen seneg inap arimanowen hele alog ahele wibareg sul ahale hag angge Yesus unggul ke pug tibisibag. Sum huluwon ap suwonen wan turuk asum wan tibisibareg

³olohotma in atfareg ele ying turuk lit, ”Ninikni, Yahudi inap onowe suwon Hat welahenma hi haptuk lahe,” il laruk lit orohole sahaloho ware fisibag.

⁴Sahaloho ware fisibagma nin eke Pilatus wilip atfareg it arimano unubam ele uruk lit, ”Aren alem siyag ane tirisiyon misig oho hihi fureg hit honoluk atmisiyen wilip hisa watminmu yet halihip,” ibagma

⁵Yesus hele alog ahele unggulmu pug teg angge sum huluwon wan teg angge wilip atfagma Pilatusen it arimano unubam, ”Ap tu yet hemek,” ibag.

⁶Ibagma imam onowesi men enemingmingangge men At yet hibareg enele hum toho uruk lit, ”Tele fisiyek, tele fisiyek,” eneg uruk latfagma Pilatusen te, ”Aren alem siyag ane tirisiyon anden hihi fureg hilalug lalihipteg hiren tele feselihip,” ibag.

⁷Ibagma Yahudi inap arimanowen Pilatus fam, ”Musa wene haharoho imbibahon niren foroho lit nonoluk tohon ino hikit toho At war atmisi. At inggarehen An Allah amloho welahi uruken At tele fusul,” uruk latfag.

⁸Ari uruk latfagma Pilatusen hol hibareg akol anggolo atfagma

⁹nin unggum kong turuk ibam kibareg Yesus fam ele uruk lit, ”Hibam kema hahun welahen?” ulug kapal hibagma Yesus ele eleg angge welatfag.

¹⁰Ele eleg angge welatfagma Pilatusen Yesus fam, ”Haren an nubam hele imin fug peruk lahen? Anden lole fisiyek uruk halug lole hubahuk teg, ware fisiyek uruk halug huwabuk teg. Ari uk hag teg lahi ane ari Hat hapeleg?” ibag.

¹¹Ibagma Yesusen, ”Pali filen hineyap haplep fugmu haren timin peruk ane ari tuk fug teg lalen. Haren turuk lahenon seyon turuk lahenma An hondoko hat hambeg numbahik wahayon inowen eneg angginon tehek,” ibag.

¹²Yesusen ari ibag ane fahet Pilatus undaman Yesus lole fesemin peruk latfag angge famen Yahudi inaben enele hum toho uruk lit, ”Haren ap aru lole fesemihin halug ap suwon Kaisar inowen hat pilap habuhu. Ap ekeyen inggareg fahet palimu welahi peruk halug at ino Kaisar men seli roho wereg,” uruk latfag.

¹³Iren ari urukon Pilatusen hol hibareg Yesus hondoholug wilip amek ibareg unggum kong turuk ahun hur atuk ambeg lehoma ino at hur atfag. Hur atfag ambeg ari unuk te Litostrotos, Ibrani enele fam Gabata, nit nenele fam ”Helep fano roho tuwaleg ambeg” suwaleg latfag.

¹⁴Ari tibag sambil ino suburu roti sig elehon sono nahuk ulug tug tibag sambil ino mo anum pulmu weregma tibag. Pilatus ino hur atfareg Yahudi inap fam te, ”Hun aru honowe suwon wereg,” ibagma

¹⁵it arimanowen enele hum toho uruk lit, ”Il hiraho fisiyek, waroho e fam tele fisiyek,” uruk latfag. Uruk latfagma Pilatusen, ”Anden hit honowe e fam telminen uruk lahep?” ibagma imam onowesi arimanowen, ”Nit nonowe we misig eneg Kaisar amu apma welahe,” ibagma

¹⁶Pilatusen, ”Yesus hilalug lalihipteg e fam teltihip,” ulug og isibag. Og isibagma hilalug laruk lit

¹⁷Yesusen teltuk ahen ha rulug sili unuk ”Ap unggul uwag silimu” walug libag. Sili ino Ibrani inap enele roho Golgota suwaleg latfag.

¹⁸Yesus walug libareg pulmu e fam tele fisibareg ap piren itano eke inggik pikit fil eke inggik hare fil tel enepfag.

¹⁹Tel enepfagma Pilatusen hiyag isaruk lit, ”Yesus Nazaret ahun Yahudi inap onowe ino tu ulug hahare felihipteg unggul palimu e fam lombog tebelihip,” ulug hiyag isibag.

²⁰Yesus telfag ambeg ari o pumbuk horogma telfagma Yahudi inap anggolowen haharehon ari kim haruk latfag. Hahatfahon ari Ibrani enele fam, Latin enele fam, Yunani enele fam hahatfag.

²¹Hahatfagma Yahudi inap imam onowesi arimanowen Pilatus fam, ”Yahudi inap onowe ino tu ulug hahabuk fug, Yahudi inap onowe welahi uruk latisi ulug haharin,” ibagma

²²Pilatusen, ”Haharihiyon ari mondabi hahareg lamag,” ibag.

²³Sehen seneg inap arimanowen Yesus e fam tele feselug asum hilibareg hat tu hilamihin, an tu hilamin ibareg enebe uhan itanowen wal taneg hilaruk latfag. Sum yaron eke hulul ulug turukmen sum ari ahandip teg eleg angge il eneg yihik latfagma it arimanowen,

²⁴”Kong tulteg wal taneg hulul fug, eneg atuk angge hik tulmu ubam lamisiyon inowen hilamisi,” ibag. Tibag ane ari suwesingga atam haharoho imbibahon aru, ”Nasum wal taneg hilarusareg sum yaron hulul ulug enehangge hik turusa,” ulug imbibahon hikir amag ulug turuk latfag. Turuk latfag ane ari sehen seneg inap arimanowen turuk latfag.

²⁵Ari roho turukmu Yesus isinga men umum men Maria Klopas uhe men Maria Magdala hiyap ino men Yesus telfag ambeg horogma unduhuk latfag.

²⁶Unduhukmu Yesusen isinga men ap eke Yesus indi reg latfahon ino men yer isibareg isinga fam ele uruk lit, ”Hina, hat hamloho ari wereg,” ibareg

²⁷ot ino fam, ”Hat hisinga ari wereg,” ibag. O ino sambilen ot inowen Yesus isinga ibam hondoko kilapfag.

²⁸Mun ane man ane obog teko laha ulug Yesusen oluk atfagma ele uruk lit, ”An ik obok teg lahi,” ibag. Ibag ane ari wene tam hahatfag ane roho amag ulug ibag.

²⁹Kubag eke ahaluwe sihon hinanggoho wereg latfag. Ap arimanowen nuruhum ik sihon fam yuhuli fibareg fili ambiyangma pug tibibareg namisi ulug Yesus ambilikmu tung tibik lahibag.

³⁰Yesus ahaluwe sihon ino nibareg ele uruk lit, ”Teko laha,” ibag. Ari ibareg sat eleg atuk lit unggul kunuk toho war atfag.

³¹Suburu roti sig elehon sono nahuk ulug wereg lit Yahudi inap Pilatus ambeg libareg hiyag utuk lit, ”Sono su ane tuhukon sakan toho lahu angge re ap wareg aruma e fam welamusa fuhen unuyug sengge heheg pilap enebusa,” ulug hiyag itfag.

³²Hiyag itfagma sehen seneg inap libareg Yesus men tel enepfag inap it piren itano unuyug sengge ribisibareg

³³Yesus uyug sengge rubul ulug kim harukmen Yesus mondabi wareg latfag.

³⁴Wareg latfagma uyug imbisibareg sehen seneg ahun misihen fit fam umbantumu hak tibisibagma mep men ik men wilip atfag.

³⁵At ubam ari tirikim yet hibag ahun inowen nilen hihi ane fahet tem toho uruk lahi ulug hiren oho tem toho peruk lamuhuben hiyag hisaruk.

³⁶Tibag ane ari tam haharoho imbibahon aru, ”At uwag misig oho sengge ruhup fug,” ulug imbibahon ino hikir amag ulug tibag.

³⁷Haharoho imbibahon eke tu, ”Umbantumu hak turusa ahun ino ebe hahup,” ulug imbibag.

³⁸Ap misig Arimatea ahun unuk Yusuf Yesus ot welatfag angge famen Yahudi inap akolen an At ot welahi fug ulug awiya oko welatfag ahun inowen Pilatus ambeg libareg Yesus ebe wareg angge e famen pilabe fik lamin ulug Pilatus fam heng tibag. Heng tibagma Pilatus inowen, ”Fano pilabe fik lamihin,” ibagma watfareg Yesus ebe wareg angge ino lisoho pilabe fibag.

³⁹Nikodemus atam Yesus ambeg hubanggo libag ahun ino oho watfareg inggila amben fanowon pingga amben hahon men kami amben hahon men sum misigmu anggin toho yunggaroho walug watfag.

⁴⁰Walug watfagma it pirenen Yesus wareg angge amben angge arimano tag teberuk lit sum yanggowon hililip toho Yahudi inaben ap warehon kilap eneptuk lit turuk ane roho kilabul ulug walug libag.

⁴¹Yesus telfag ambeg horogma itano elehet huk toho kilabeg latfag ambeg ari owik ket eneg fo ribahon ap warehon misig oho kilapfag fuhon wereg latfag.

⁴²Sono suburu roti sig elehon narukon fahet tug turuk sambil yoho welahe ulug owik ino horog tehen Yesus ebe wareg angge kilabul ulug kilapfag.