Read Angguruk Yali YOHANES 2 Bible Online

YOHANES 2 - Angguruk Yali bible

YOHANES 2

¹O hinahaneg sambil Galilea kinangon fam o Kana hiyap hilarukon fahet seni esetuk sul Yesus isinga oho welatfag.

²Yesus otsi men oho seni ino ambiyeg nul ulug wol enepfag.

³Wol enepfagma watfareg weregman anggur ahaluwe narukon eleg atfagma Yesus isingan amloho fam, ”Anggur ahaluwe eleg ahama welahe,” il larikim

⁴Yesusen uruk lit, ”Nisinga, Anden nungge ane hiyag hitmin,” ibareg, ”Anden tuk teg ane uwan lahi,” ibag.

⁵Yesusen ari ibagma isingan seni esetuk latfag inap arimano unubam te, ”Aren hiyag hisamisi ane roho eneg tilihip,” ibag.

⁶Seni esetfag ambeg horogma itano kubag falfaliken kinang fam lalfahon imbik watfag. Kubag arimano Yahudi inaben suburu nuk oho lit ininggik unuyug ik umatuk ane roho kubag humon imbik watfahon welatfag.

⁷Weregman Yesusen ap seni esetuk latfag inap hiyag isaruk lit, ”Kubag arima ik ololop tibil aliyek,” ibagma ololop toho hinanggo feruk latfag.

⁸Hinanggo fibagma Yesusen te, ”Ik tot hinanggoho walihipteg seni ngi roho eserehek ahun ino og irik lalihip,” ibagma hinanggoho walug libag.

⁹Walug libagma hun seni ngi roho esetfag ahun inowen nek harukmen anggur ahaluwe unduk turuk latfagma nunggeyen teg aha ulug apeleg toho weregman we amingmingangge ik hinanggo feruk latfag inap arimanowen eneg onoluk teg latfag. Hun ino apeleg toho hiyap hilibag ahun ino wol tibareg

¹⁰hiyag utuk lit, ”Ap winonen oho ahaluwe fanowon tam hinang isarukmu naruk halug tot nenek turukmu siyahon hinang isaruk angge famen haren fanowon foroho lit welahen,” ibag.

¹¹Ari tibag ane Yesusen enehangge eke uwan tuk fugmu enehangge tamon ari Galilea kinang fam o Kanaen tibag. Fobik fano ane tuhukon yet hahup ulug enehangge tibibag. Enehangge tibibag ane ino Yesus otsiyen yet hibareg Yesus fahet tem toho ulug inindi wenggel haruk latfag.

¹²Ari tibareg Yesus isinga men otsi men ori men ambiyeg o Kapernaum libareg hup pirenam hinahanam welatfag.

¹³Yahudi inaben suburu roti sig elehon naruk sul Paskah sambil ino horog atfagma Yesus o Yerusalem fil libag.

¹⁴Libareg Allah ibam kurukmen wam sapi men domba men suwe yalma men onggo paloho waruk lit uang men ayeg watuk inap oho heriyeg lit ayeg watukmu kim isibag.

¹⁵Ari turukmu kim isibareg hele fetnengge mase roho ki reg lit enembohomet enebeyet Allah ibam inowen yanggaloho wilip enepfag. E pila uang emberuk ambeg ino hebel isibareg uang arimano kinang ke hilil isibagma linggik-longgo ibag.

¹⁶Suwe yalma ayeg waroho waruk latfag inap arimano unubam, ”Hiren angge aruma obog toho o aruwen hilalug lalihip. An Nikni ibam hiren mun angge man angge ayeg waroho waruk ibamap tirikip,” ibag.

¹⁷Yesusen ari turukmu otsiyen yet hibareg wene haharehon te, ”Allah ibam aru nindi haruk lit indok olok turuk hag toho nundama nolok hihi,” ulug haharoho imbibag ane fahet wenggel hibag.

¹⁸Yahudi inap arimanowen Yesus pet turuk lit, ”Niren Hat fahet ari roho tuk teg ahun wereg pulen nungge fam wal himin, yet hulen,” ulug kapal hibag.

¹⁹Kapal hibagma Yesusen, ”O Allah ibam aru halog tibisiyek, we hinahanam ubalma wiri fesuhuken,” ibag.

²⁰Ari ulug hiyag isibagma Yahudi inaben, ”Allah ibam aru witikim mo ilig am wirig am turukmen teng misigmen nubam hilag soho fimahenam 46 larikim witfag angge famen Haren we o hinahanam wiruhuk ehen?” ibag.

²¹Yesusen Allah ibam fahet ibahon aru inggareg ebe fahet wenggel haruk lit ibag.

²²Fobik Yesus war atfareg oluk atfagma otsiyen Yesus ibag ane aru wenggel hibareg tam haharoho imbibag ane men Yesusen irisi ane men tem toho irisi ulug otsiyen peruk latfag.

²³Suburu roti sig elehon naruk sul hari Paskah Yesus o Yerusalem weregma ap anggolowen Aren fano ane turukmu yet hibareg Yesus aru tem toho ulug At unuk fahet fano peruk latfag.

²⁴Ap arimanowen wenggeltuk ane oluk tehen inggareg fahet fag toho hiyag isibag fug.

²⁵Aben unundaman peruk ane Yesusen oluk tehen, ”Ap tu ubabut fano, ap tu ubabut siyag ulug ap winonen hiyap numuhup fug,” peruk latfag.