Read Angguruk Yali YOHANES 20 Bible Online

YOHANES 20 - Angguruk Yali bible

YOHANES 20

¹Yahudi inap wene uruk sambil sono welatukuk ulug likiyamon ket sakan tirikim hubet-habet Maria Magdala hiyap ino Yesus kilapfag ambeg libareg yet harukmen helep sok latfahon ino elegma yet hibag.

²Elegma yet hibareg Simon Petrus men ot Yesusen indi reg latfahon ino men enembeg folo-folo watfareg hiyag isaruk lit, ”Nonowe aben owikmuwen walug wilip atusareg kema emberusa ulug nit nenepeleg toho welahe,” ibag.

³Ari ibagma Petrus men ot eke ino men Yesus kilapfag ambeg ino libag.

⁴Libareg ambiyeg folo-folo libag angge famen Petrus ino kema embeselug ot eke ino Yesus kilapfag ambeg tam libag.

⁵Libareg kilap harukmen sum hililip tibahon ino nonggoloho kinangma weregma yet hibareg owik elma kibag fug.

⁶Kuk fug angge weregma Petrus ino ombolim watfareg owikmu kibag. Kibareg kim harukmen sum ino eneg kinangma weregma kim hibag.

⁷Kim harukmen sum unggulmu pug tibibahon ino yinggiloho weregma sum ebe hililip tibahon ino men ambimu welatfag fug, amumu welatfag.

⁸Ot eke tam libahon ino oho ombolim owik elma kibareg sum arimano amu-amu weregma yet hibareg indimu tem toho ulug wenggel haruk latfag.

⁹Atam haharoho emberuk lit At ap warehon wereg ambehen oluk aruhu ulug hahatfag ane Yesus watfag li itano oho wenggel haruk latfag fug anggeyen

¹⁰elegma yet hibareg tem oluk aha pibareg otsi piren itano inibam fil suhuloho libag.

¹¹It libagma Maria ino Yesus kilapfag ambeg horogma unduhuk lit uba yatuk latfag. Uba yatuk lit owik elma ino kunuk toho kilap harukmen

¹²ap piren sum yanggowon wan toho Yesus yinggi fibag ambeg itano misig unggul fil misig uyug fil heriyeg lit weregma kilap isibag.

¹³Kilap isarukmen ap piren itanowen, ”Nehe, hat nungge fahet uba yatuk lahen?” ibagma Maria inowen it unubam ele hiyag isaruk lit, ”Nowe tuma emberusa angge famen hilalug wilip atusareg kema emberusa ulug nindi su ahama uba yatuk lahi,” ibag.

¹⁴Ari ulug hiyag isibareg hebeloho ambol fil yet harukmen Yesus ino unduhuk latfag angge famen Yesus ino tu ulug indi anggar atfag fug.

¹⁵Indi anggar atfag fugmu Yesusen, ”Nehe, ap sa yami ril wahenteg uba yatuk lahen?” ibag. Ibagma Maria inowen owik foroho ahun wahareg kapal niyaruk pibareg ele ubam uruk lit, ”Nikni, haren At lisoho emberikin halug hilalug laminen emberikin ambeg hiyag nimin,” ibag.

¹⁶Ari ibagma Yesusen, ”Maria,” il larikim Marian hebeloho Yesus kilap hibareg Ibrani enele fam, ”Rabuni,” nit nenele roho, ”Nowe,” ibag.

¹⁷Ibagma Yesusen, ”An Nikni ambeg uwan la fugmu haren An sen niya fug,” il laruk lit, ”Hat nori enembeg lamihinteg unubam hiyag isaruk lit hir oho Hinikni Allah An oho Nikni Allah ambeg ketiya lamin ehek ulug hiyag isa lamihin,” ibag.

¹⁸Ari ibagma Maria Magdala hiyap ino Yesus otsi wereg ambeg libareg otsi hiyag isaruk lit, ”Nonowe Yesus oluk ahayon yet hihimu nubam ele uruk lit ari-ari ehekteg hiyag isa lamihin ehekma hiyag hisaruk lahi,” ibag.

¹⁹Yahudi inap wene uruk sambil likiyamon o hup atfagma Yesus otsi o misig fam palu atfareg Yahudi inaben nunusulusa ulug enekolen sok laroho kibareg welatfag. Welatfagma Yesus it sehelimu watfareg unduhuk lit, ”Notsi, hinindi se roho wereg lit yuwag toho welamek,” ulug hi enepfag.

²⁰Ari ulug hi enepfareg ninggik nuwatusa ambeg tu numbantumu nuwatusa ambeg tu kim hemek ulug otsi unug isibag. Unug isibagma otsiyen Nonowe tu tem toho waha ulug enehiyeg toho welatfag.

²¹Enehiyeg toho welatfagma Yesusen nin eke ele uruk lit, ”Hinindi se roho wereg lit yuwag toho welamek. Nikniyen An mon naptisi hag toho Anden oho ketiya hit mon heneptuk lahi,” ibag.

²²Ari ibareg otsi unubam ambilik ahe fu haruk lit, ”Hit hunubam Allah hime fanowon og hisamin,” ibag.

²³”Aben siyag ane turukon hiren elehap tuhupmu Allahn oho ambolma umbusuhu. Aben siyag ane turukon hiren unubam welamag puhupmu Allahn oho ambolma umbusuk fug angge mondabi welaruhu,” ulug hiyag isibag.

²⁴Yesus otsi enembeg watfag sambil ino Tomas unuk eke Namiya Malik suwalfahon ino elegma watfag.

²⁵Tomas it enembeg watfagma Yesus otsi winonen at hiyag utuk lit, ”Nonowe nit nenembeg waharisimu At yet harukuk,” ibag. Ari ibagma Tomas inowen, ”Yesus inggikmu posiyemanggen watusa ambeg anden nil fam kim hahuk fug halug, posiyemanggen watusa ambeg ninggik tumen tung hahuk fug halug, umbantumu fit fam watusa ambeg men ninggiken ki hahuk fug halug hiren ehebon ari fahet tem toho puhuk fug,” ibag.

²⁶Ari ibagma hup likinenam welatfareg Yesus otsi inibam welatfag ambeg ino palu roho weregma Tomas ino oho it men ambiyeg watfareg welatfag. Inibam sok laroho weregma Yesus ino watfareg it enesehelimu unduhuk lit, ”Notsi, hinindi se roho wereg lit yuwag toho welamek,” ulug hi enepfag.

²⁷Hi enepfareg Tomas fam ele uruk lit, ”Enele si ehesa puk fug angge tem toho nubam wenggel niyaruk latmihinen hinggik tiya emberuk lit An ninggik haren yet hamihinteg hinggiken numbantumu tung niyimin,” ibag.

²⁸Ari ibagma Tomas inowen Yesus fam, ”An Nikni Allah, an Nowe,” ibag.

²⁹Ari ibagma Yesusen, ”Haren An neyehenteg tem toho peruk lahen. It An niyaruk eleg angge famen tem toho peruk inap arimano fano,” ibag.

³⁰Poholmonen turuk ane Yesusen anggolo otsi iniline tibag angge famen wene aru fam hahareg eleg.

³¹Tuman hahareg lit werehon hiren tem toho hinindi wenggel haruk lit Allah amloho Yesus ino Mesias wereg ulug tem peruk lit At unuk fam honoluk welamuhup ulug hahatuk lahi.