Read Angguruk Yali YOHANES 21 Bible Online

YOHANES 21 - Angguruk Yali bible

YOHANES 21

¹Welatfagma misihim Yesus ik Tiberias yenggelehon ayegma otsi weregma ebenam atfag ane aru:

²Ik yenggelehon ayegma welatfag inap arimano ununuk te Simon Petrus men, Tomas unuk eke Namiya Malik suwalfahon ino men, Natanael Galilea kinang famon o pumbuk Kana ahun ino men, Zebedeus umaliki men, otsi winon piren men welatfag.

³Welatfareg Simon Petrus inowen ori fam, ”An ikan warik lamin,” ibagma oriyen, ”Nir oho hat men ambiyeg lul,” ibag. Ari ibagma kou fam kibareg laruk latfag angge famen hup ino sambil ikan misig oho wat tibag fug.

⁴O sakan turukmu itano Yesus ik ayegma unduhuk latfag angge famen otsiyen tu nit Nonowe ulug onoluk atfag fug.

⁵Onoluk atfag fugmu Onoweyen te, ”Numalikisi, hiren naruk angge tot foroho lahep ano,” ibagma iren te, ”Eleg,” ibag.

⁶Eleg ibagma Yesusen it unubam, ”Ikan watuk asum hininggik pikit filen ik ahummu pilaplihipmu naruk angge hiyahalihip,” ibag. Ibagma ikan watuk asum ino pilapfagma ikan anggolo yuhar atfareg angginen sum lisuk fug teg latfag.

⁷Lisuk fug teg latfagma Yesus ot indi reg latfahon inowen Petrus fam, ”At tu nit Nonowe,” ibag. Nonowe tu urukmu hol hibareg Petrus ino abiye welatfag angge sum wan tibareg hik toho ik ahummu wambibag.

⁸Otsi winon arimano ik ayeg horog tegma 100 meter welatfag angge kou famen ik ilanma waharuk lit ikan anggolo yuhar atfag asum ino lisil waharuk latfag.

⁹Ik ilanma watfareg yet harukmen indok munggalegma ikan men suburu roti men sahali regma yet hibag.

¹⁰Yet hibagma Yesusen otsi hiyag isaruk lit, ”Ikan ket warehebon arimano tot ulug maniyek,” ibag.

¹¹Ibagma Simon Petrus ino kou fam lahibareg ikan yuhar atfag asum ino lisoho ilanma imbik libareg kim harukmen ikan suwon teng-teng angge 153 yuhar atfag angge famen sum ino tararag tibag fug.

¹²Yesusen otsi unubam ele uruk lit, ”Nori, suburu nulen maniyek,” ibag. Yesusen ari ibagma otsi itano inindimuwen tu Nonowe ulug onoluk atfag angge famen misihen oho ambong se roho Hat sa ulug kapal ha fug teg latfag.

¹³Kapal ha fug teg latfagma Yesus it enelukema in atfareg suburu roti kuroho og isibareg ikan oho kong toho og isaruk latfag.

¹⁴Yesus war atfareg oluk atfag sambilen ik Tiberias ayegma otsi weregma inam atfag ane aru inggik hinahaneg angge inam atfag.

¹⁵Suburu nibareg Yesusen Simon Petrus fam, ”Simon, hat Yohanes amloho, it winon arimanowen An fahet inindi we tot nasugmu haren eneg An fahet hindi anggen toho wenggel haruk lahen?” ulug kapal hibagma Petrusen te, ”Yu Nowe, anden Hat nindi anggen teg lahi ane Hat holuk,” ibagma Yesusen te, ”Nambohom domba fer enesug laruhun,” ibag.

¹⁶Ibareg Yesusen inggik pireneg angge eke kapal haruk lit, ”Simon, hat Yohanes amloho, haren An hindi nasug lahen?” ibagma Petrusen, ”Yu Nowe, anden nindi hasug lahi ane Hat holuk,” il larikim Yesusen te, ”Nambohom domba fer enesug laruhun,” ibag.

¹⁷Ibareg inggik hinahaneg angge kapal haruk lit, ”Simon, hat Yohanes amloho, An fahet haren hindi nasug lahen?” ibagma inggik hinahaneg angge hindi nasug lahen ulug kapal neyehek pibareg indi anggin atfagma Yesus fam ele uruk lit, ”Nowe, mun ane man ane Hat holuk teg lahenon anden Hat nindi hasug lahi ane Hat holuk,” ibag. Ibagma Yesusen, ”Nambohom domba fer enesug laruhun,” ibareg,

¹⁸”Hat kabini reg lit sum hamu wan talug lamin peruk latikin ambeg eneg laruk latikin angge re hat sabal aruhun li ap winonen sum wan habuhupteg hinggik seneko lamin fug puhun ambeg hondog haplug lahup. Ari tem toho hubam uruk lahi,” ibag.

¹⁹Ibag ane aru Petrus ke roho war atuk lit nangginoho Allah wel tuhu ulug hiyag itfag. Ari obog toho hiyag itfareg Petrus fam, ”An nombolim laruk lamin,” ibag.

²⁰Petrus ino ambol fil hebeloho yet harukmen Yesus ot indi reg latfahon ino onombolim waharukmu yet hibag. Ot ino it suburu ambiyeg naruk latfag sul ino Yesus iraham heriyeg latfahon inowen Yesus kapal haruk lit, ”Nowe, Hat huwabukag ulug huruwe lamisiyon ari sa fahet ehen?” ulug Yesus kapal hibahon ino waharukmu yet hibag.

²¹Waharukmu yet hibareg Petrusen Yesus kapal haruk lit, ”Nowe, at tu ubam aben nungge ane tuhup,” ibagma

²²Yesusen, ”An waruhuk li at oluk weregma waruhuk peruk lahi halug ari haren tuhun ane fug. Hat te we An nombolim laruk lamin,” ibag.

²³Yesusen ibag ane ari fahet otsi arimanowen ot aru war aruhu fuhon fahet ehek uruk latfag. Yesusen Petrus fam ibag ane ari, ”At aru war aruhu fug,” ulug Yesusen ibag fug. Yesusen ibag ane, ”An waruhuk li at oluk weregma waruhuk peruk lahi halug ari haren tuhun ane fug,” ibag.

²⁴Yesusen obog toho turuk latfag ane arimano ot aruwen ilen hibareg haharoho emberisimu tem toho haharoho emberisiyon ulug nit nonoluk atisi.

²⁵Yesusen mun ane man ane anggolo turuk latfahon wereg angge famen obog toho arimano tor aneyet su aneyet hahatlepman hahen kinang tu fam emberuk ambeg wirim alep fug, mondabi keleg alep.