Read Angguruk Yali YOHANES 3 Bible Online

YOHANES 3 - Angguruk Yali bible

YOHANES 3

¹Farisi ahun misig unuk te Nikodemus Yahudi inap onowe roho welatfag.

²At ino hubanggo Yesus ambeg watfareg ele uruk lit, ”Nowe, Allahn te Haren wene hiyag isaruk laruhun ulug mon haptisiyon ino nit nonoluk. Haren turuk lahen ane ari aben tuk fug tohon turuk lahen. Allah men ambiyeg werehonen eneg ari tuk hag teg,” ibag.

³Ari ibagma Yesusen Nikodemus fam ele uruk lit, ”Ap kinangmon keron eke indag atuk eleg halug Allah weregma pen ha fug teg ulug we tem toho hiyag hutuk lahi,” ibag.

⁴Yesusen ari ibagma Nikodemusen, ”Ap sabal angge famen nin fobik hebeloho nangginoho indag am teg? Isinga ahummu kulug nin suhuloho indag am teg?” ulug kapal hibag.

⁵Kapal hibagma Yesusen, ”Ap kinangmon ikman men Allah hime fanowon ino fam menen indag atuk eleg halug Allah suwon weregma kuk fug teg ulug tem toho hiyag hutuk lahi.

⁶Ap ahaluwe fam indag atukon ari ap ahaluwe aruhu. Allah hime fanowon famen indag atukon ari Allah hime fanowon ngi aruhu.

⁷Hit nin fobik indag amuhup hubam ihiyon ari fahet hindi anggin am fug.

⁸Siyelu fu ruruk halug aplohok holtuk lahen angge famen kema filen watlug kema fikit laruk, ari hat hapeleg. Siyelu ari hag toho ap Allah hime fanowon famen indag atukon ari hag toho wereg,” ibag.

⁹Yesusen ari ibagma hun Nikodemus inowen, ”Nangginoho ari teko la reg?” ulug kapal hibagma

¹⁰Yesusen te, ”Hat te Israel inap hiyag isarukon onowe hat welahen angge famen ari fahet hapeleg toho welahen?

¹¹Nit nonolukon te fag toho uruk lahe, ninil fam harukukon hiyag hisaruk lahe angge famen holtuk lahep fug ulug tem toho hubam uruk lahi.

¹²Kinangmon fahet hiyag hisaruk lahimu holtuk lahep fug angge re poholmon fahet hiyag hisarukmu nangginoho holehep ha reg?

¹³Ap misig oho poholma lahibag fug, At ap atik ibahon pohol filen wambik watfahon ino eneg lahuk teg lit wereg,” ibag.

¹⁴”Israel inap farema wereg lit Musan pisanggo e fam lehoma imbibag hag toho At ap atik ibahon ino oho lehoma umbuhupmu

¹⁵ap At ubam wenggel harukon arimano mondabi Allah wereg ambeg onoluk welamuhup.

¹⁶Allahn ap kinangmon indi isaruk lit amloho we misig eneg angge famen og isibag. Amloho fam wenggel harukon longgo uk fug angge Allah men mondabi onoluk welamuhup.

¹⁷Allahn amloho kinangma monde fibahon te unggum ap unubam umbuhu ulug monde fibag fug, fanowap enebuhu ulug monde fibag.

¹⁸Ap sa At ubam wenggel haruk halug Allahn alem angginon at ubam umbuhu fug. Ap sa At ubam wenggel haruk eleg halug at ino Allah amloho misig enehon ino unuk fam wenggel haruk elehen alem angginon apma wereg.

¹⁹Alem angginon ino tu: Kinangma seleg ino waharisi angge famen ap kinangmonen siyag ane turuk latuson arimano iren te hik fahet eneg inindi reg lit wereg.

²⁰Ap san siyag ane turuk halug siyag angge ino hirako welamag peruk lit seleg teg ambeg laruk ane nirim peruk.

²¹Ap san fano ane turuk halug Allahn let naptukmu turuk lahi ane ari inam amag peruk lit seleg teg ambeg waharuk,” ulug hiyag isibag.

²²Yesusen wene ari hiyag isibareg otsi men Yudea kinang keyen libareg otsi men ambiyeg wereg lit ap ikma pilap eneptuk latfag.

²³Yohanes inowen oho o Ainon ino o Salim horogma ik anggolo werehen aren ap ikma pilap eneptuk latfagma ap anggolo pilap nenebukag ulug waharuk latfag.

²⁴Yohanes ino penjara uwan kilabuk fugmu ari turuk latfag.

²⁵Turuk latfagma Yohanes otsi men Yahudi ahun misig men ap ikma pilap eneptuk ane fahet suwahal uruk latfag.

²⁶Suwahal uruk latfareg Yohanes ambeg watfareg, ”Nonowe, ap ik Yordan fumag fil hat men ambiyeg welatikibon ino At ino fahet haren hiyag nisarikinon inowen ap ikma pilap eneptukmu ap obog toho ambeg waharuk,” ulug hiyag itfag.

²⁷Hiyag itfagma Yohanesen te, ”Ap ekeyen nungge-nungge inggareg indiyen hila fug teg, we poholmonen og utukon eneg hila reg,” ibag.

²⁸”Anden At ino fahet harikik ane tam irikikon ari harikin ulug an nubam kapal neyehep. An Mesias ino fug. An At alukema laruk laruhun ulug monde nubaharisiyon inowen hiyag hisarikik ane ari hit honoluk.

²⁹Aben hiyap hilamin perukon ino hilaruk halug ap ino ngi atuk. Ap ino ot iraham werehon inowen hiyap hilihi urukmu hol halug noweyen fano helehek peruk. Ot inowen peruk hag toho anden oho fano peruk lit nahiyeg toho welahi.

³⁰At ino su aruhu, an tot aruhuk,” ibag.

³¹Pali filen waharukon mun angge man angge palimu wereg. Kinang filen waharukon kinangma angge men ambiyeg wereg lit kinangma ane uruk. Pohol filen waharukon inowen mun angge man angge palimu wereg lit

³²harisi ane men holtisi ane men hiyag isarukmu ap misihen oho we tem toho peruk eleg.

³³Ap misihen harisi ane hiyag isarukmu we tem toho perukon inowen Allah fahet oho we tem peruk.

³⁴Allahn hime fanowon ap og isarukon winako og isaruk eleg. Winako og isaruk eleg angge re ap sa Allahn monde ferukmu at inowen Allah wene hiyag isaruk.

³⁵Ikniyen amloho indi reg lit mun ane man ane obog toho inggikmu emberisi.

³⁶Ap san amloho fam wenggel haruk halug at ino Allah men mondabi oluk welaruhu. Ap san amloho ele holtuk elehon onoluk wereg ambeg yet hahu fug, at ino Allahn olok perukon ubam welaruhu.