Read Angguruk Yali YOHANES 4 Bible Online

YOHANES 4 - Angguruk Yali bible

YOHANES 4

¹Yohanesen ap tor angge ikma pilap eneptisi angge famen Yesusen ap anggolo ambeg waharukmu ikma pilap eneptuk urukmu Farisi inaben hol hibag.

²Yesus amuwen ap ikma pilap enepfag fug, otsiyen eneg pilap eneptuk latfag.

³Yesusen ap ikma pilap eneptuk ane Farisi inap hol hibag ane Yesus oluk atfagma o Yudea embeselug o Galilea suhuloho libag.

⁴O Yudea embeselug Samaria keyen laruk latfag.

⁵Libareg o pumbuk misig Samaria kinang fam werehon unuk Sikhar libag. Yusuf ikni Yakuben yabuk lin isibag ambeg o ino horogma welatfag.

⁶Libag ambeg ino Yakuben ik fabulfahon welatfag. Yesus kema larukmen mo anum pulmu atfagma Yakuben ik fabulfag ambeg ino saren kel tamin ulug iraham hur atfag.

⁷Hur atfareg weregman Yesus otsi suburu ayeg waroho wak lul ulug olma libagma Samaria hiyap eke ik hinang tamin ulug watfag. Watfareg ik hinanggibagma Yesusen hiyap ino fam, ”Ik oboken hinang nimin,” ulug heng tibag.

⁸

⁹Heng tibagma Samaria hiyap inowen, ”Hat Yahudi hahunen an Samaria nuhe fam ik hinang nimin ehenon nangginoho heng nabehen,” ibag. Samaria inap men Yahudi inap men mangno roho welahe fug ulug ari ibag.

¹⁰Ari ibagma Yesusen te, ”Allahn ap fanowap eneptuk ane men hat hubam ik hinang nimin ehekon ino men holuk teg lalenma haren ik At ubam heng telen. Heng telenma Aren ik eleruk ahik hinang hetlep,” ibag.

¹¹Yesusen ari ibagma hiyap inowen te, ”Nowe, ik hinangguruk angge Haren tohon elehen fo reg ambeg aru apma rehen ik eleruk ahik fanowon ari Haren nangginoho hinang num teg?” ibag.

¹²”Nunumba Yakuben ik hinangguruk ambeg habul nisibareg at inggareg men umalikisi men ambohom men ik aru naruk latfag angge famen Haren te An suwon, at toron peruk lahen?” ibag.

¹³Ibagma Yesusen hebeloho hiyap ino fam, ”Ap san ik haren ehenon aru narukmu nin fobik ik obok haruk laruhu.

¹⁴Ik Anden hinang isaruk lahiyon aru narukmu mondabi ik obok eleg aruhu. Ik Anden hinang isaruk lahiyon aru narukmu at ino undama ik eleruk ahik fanowon wilip aruhumu at ebe mondabi oluk welaruhu. Ik eleruk ari firig am fug angge mondabi wiliptuk laruhu,” ibag.

¹⁵Ibagma hiyap inowen te, ”Nowe, an ik obok haruk laruhuk fuhen tuma hinang ta waharuk ane nirimen ik Haren ehenon ino hinang nimin,” ibag.

¹⁶Ari ibagma Yesusen, ”Ik ino hinang nimin ehenma lamihinteg hahun hondoholug tuma watmihin,” ibag.

¹⁷Ibagma hiyap inowen, ”An nahun eleg,” ibagma Yesusen, ”Nahun eleg ehenon tem toho ehen.

¹⁸Ap fuwaben oho latikinteg ketiya oho lahenon ari hahun fug. Nahun eleg ehenon tem toho ehen,” ibag.

¹⁹Ari ibagma hiyap inowen, ”Nowe, Hat tem toho Allahn mon haptisiyon nabi welahenma ketiya an nindi anggar aha,” ibag.

²⁰Ari ibareg hiyap inowen, ”Nit niniknisi unumbusagsiyen tom aru famen sembahyang uruk latfag angge famen hiren te o Yerusalemen eneg sembahyang uk hag teg uruk lahep,” il larikim

²¹Yesusen, ”Nehe, tot welamuhupmu punu tu famen eneg o Yerusalemen eneg Ninikni fam sembahyang uhup fug. Ihi ane ari tem toho ehek peruk lamin.

²²Hit Samaria hinaben sembahyang uruk lit hinilen ha fuhon ubam sembahyang uruk lahep. Nit Yahudi ninap halug nonolukon ubam sembahyang uruk lahe. Allahn ap fanowap eneptuk ane ari Yahudi inap sehelimuwen ak teberisi.

²³Teko lahu ihiyon ino aruhu sambil ketiya horog toho welahe. Ninikni ubam sembahyang uruk inap inindi pikit tohon eneg Allah hime fanowon unubam werehonen eneg sembahyang uk teg. Ari roho uruk inap fahet eneg Allahn fano peruk.

²⁴Allah men hime fanowon men ebe misig hag toho wereg. Ap san ubam sembahyang imin peruk halug indi pikit tohon eneg Allah hime fanowon ubam werehonen eneg sembahyang uk teg,” ibag.

²⁵Yesusen ari ibagma hiyap inowen, ”Mesias unuk eke Kristus ino waruhu urukon an noluk. At waruhureg mun ane man ane obog toho Aren hiyag nisahu,” ibagma

²⁶Yesusen, ”At ino An, An hat hubam nele uruk lahiyon tu,” ibag.

²⁷Enele urukmu itano Yesus otsi arimano watfareg inindimuwen amu hiyap aru men nungge fahet enele uruk peruk latfag. Peruk latfag angge famen Yesus otsi itano misihen oho ”Nungge wenggel hehenteg hiyap aru men henele uruk lahep,” ulug umung hibag fug.

²⁸Umung hibag fugmu hiyap ino kubag ik hinanggurukon ino embeselug ibam libareg ap welatfahon arimano unubam hiyag isaruk lit,

²⁹”Ap misihen anden tirikik ane fag toho ehek ahun ino yet halihiben maniyek. At ino Kristus ap obog toho fanowap enebuhuwon ano,” ibagma

³⁰it arimano o pumbuk inowen wilip atfareg Yesus ambeg watfag.

³¹It ari turukmu itano Yesus otsiyen, ”Nonowe, Hat suburu amin,” ibagma

³²Aren, ”Anden suburu hiren haruk lahep fuhon foroho lahi,” ibag.

³³Ari ibagma otsiyen it-it umung-umung atuk lit, ”Ap ekeyen nungge og erehekma nenggek,” ibag.

³⁴Ibagma Yesusen otsi unubam, ”An mon naptisi ahun inowen yabuk wituk laruhun ulug hiyag nitisimu yabuk wiri fuhukon ari naruk angge hag toho wereg,” ibag.

³⁵”Hiren te pikalem uhan lahumu suburu wirik aruhu uruk lahep fug? Ari uruk lahep angge famen Anden tot hiyag hisamin: Yabuk o walinggoho werehon yet hemek, suburu wirik atisimu ebe yahaluk teg.

³⁶Suburu yahaltuk ahun ubam ngi ahunen onggo og utuk. Suburu yahaloho palu ruruk ahun ino mondabi oluk welaruhu. Ei yatuk ahun men ebe yahaltuk ahun men enebe mangno roho wereg lit enehiyeg haruk lamuhup.

³⁷Ap enele indit toho uruk ane fahet tem toho uruk peruk lamek: Ap misihen ei yatukmu ap ekeyen ebe yahal taruk ulug indit toho uruk.

³⁸Anden te hiren ei yatikip fug angge famen ebe yahalik lalihip ulug mon heneptuk lahi. Ap winonen sat toho yag tarusa angge famen hiren ebe yahal taruk lahep,” ulug otsi hiyag isibag.

³⁹Samaria inap anggolo o inowen watfag inap arimanowen Yesus fahet tem peruk latfag. Hiyap tuwen anden tirikik ane Yesusen fag toho ehek ulug ibag ane fahet tem toho peruk lit Yesus fam wenggel haruk latfag.

⁴⁰Samaria inap arimano Yesus ambeg watfareg, ”Hat nit men ambiyeg welamuhuk,” ulug heng tibagma Yesus it men weregman hup pirenam atfag.

⁴¹Yesus it men wereg lit wene hiyag isarukon holtuk latfareg ap anggolowen At ubam wenggel haruk latfag.

⁴²Wenggel haruk latfag inap arimanowen hiyap ino fam enele uruk lit, ”Haren tam hiyag nisarikinon ino holtukukteg tem toho perukuk angge famen ketiya At inggarehen hiyag nisarukmu holehereg ap kinangmon obog toho fanowap enebuhuwon tu ulug tem toho wenggel haruk lahe,” ibag.

⁴³Yesus hup pirenam o Sikhar welatfareg Galilea fil laruk latfag.

⁴⁴Yesusen otsi hiyag isaruk lit, ”Ap misig ibam ngi reg ambeg ino Allahn monde ferukmu wene hiyag isarukon ele holtuk eleg,” ibareg o Galilea lul ibag.

⁴⁵O Galilea kibagma Galilea inap arimanowen fano waha pibag. It arimano o Yerusalem suburu roti sig elehon narukon fahet libahon arimanowen Aren o Yerusalemen fano ane turukmu yet harukuk angge re At ino fano waha pibag.

⁴⁶Yesus o Kana tam ik anggur ahaluwe lalfag ambeg ino suhuloho watfag. Watfareg weregma o Kapernaum ap suwon ibam foroho latfag ahun ino amloho ouk waruk latfag.

⁴⁷Ouk waruk latfagma Yesus Yudea embeselug Galilea waha urukon hol hibareg ambeg watfag. Watfareg, ”Namloho ouk waruk lit war am hag teg lit werehen haren hihit nitmihin,” ulug heng tibag.

⁴⁸Ari ulug heng tibagma Yesusen ubam ele uruk lit, ”Poholmonen turuk ane hinilen yet haruk lahep fug halug hinindi anggar aruhu fug,” ibag.

⁴⁹Ari ibagma ap suwon ibam foroho latfag ahun inowen, ”Nowe, namloho war am hag tehen lul,” ibag.

⁵⁰Ibagma Yesusen, ”Hamloho ari fano atmisiyen we hibam lamihin,” ibag. Yesusen ibag ane fahet ap inowen indimu tem ehek ulug wenggel hibareg libag.

⁵¹Ap ino kema larukmen amingmingangge salkal ibareg, ”Malik ino fano aha,” ulug hiyag itfag.

⁵²Hiyag itfagma ap inowen amingmingangge kapal isaruk lit, ”Mo kiya weregma fano aha?” ulug kapal isibagma iren onowe fam hiyag utuk lit, ”O sono mo anum pulmu weregma ubam inahan werehon eleg atisi,” ulug hiyag itfag.

⁵³Hiyag itfagma ikni ino indimuwen ita liyim Yesusen malik fano atmisi irisiyon fam fano atisi pibag. Ari pibareg at men uhe malik menen Yesus fam wenggel haruk latfag.

⁵⁴O Yudea embeselug o Galilea libareg Yesusen poholmonen turuk ane aru inggik pirenehon tibag.