Read Angguruk Yali YOHANES 5 Bible Online

YOHANES 5 - Angguruk Yali bible

YOHANES 5

¹Welatfareg Yahudi inaben Allah wel tul ulug o Yerusalem palu arik laruk latfag sambil ino Yesus oho o Yerusalem libag.

²Yerusalem elehet oko kilabehon fam sok humon unuk te ”Domba” welatfag. Sok ino iraham ik sene misig yenggeleg latfag. Ik ari Ibrani inap enele roho Betesda suwaleg latfag. Ik ino ayegma o fuwaben ungga eneg saloho wirigmu

³ap ouk warukon anggolo men inil siyahon men unuyug siyahon men inine elehon anggolo men o itano fam yinggig lit wereg latfag. It arimanowen ik il lebe rimisi ano ulug kilaboho lit welatfag.

⁴Hup misihim-misihim malaikat Allahn monde ferukmu ik ino il kilil-kalal isaruk latfagma ap atam hik toho wambibag ahun ino fano atuk latfag. Ouk ekeyon-ekeyon ubam wereg angge famen fano atug laruk latfag.

⁵O ino fam ap misig ouk waruk lit yinggigmen mo ilig am wirig am turukmen teng misig nubam hilag nanggoloben 38 atfagma welatfag.

⁶Ap aru indam angge ouk waruk lit wereg ulug Yesus undaman tam oluk atfareg ap ino fam, ”Nare, hat hundaman fano ale peruk lahen?” ulug kapal hibag.

⁷Kapal hibagma ap inowen Yesus fam ele uruk lit, ”Nowe, ik il ket lebe ririkim itano wambele angge famen ap let naptukon elehen ik horogma lalug wambimin peruk angge famen it winon tam wamburukon fano atug laruk,” ibag.

⁸Ibagma Yesusen ap ino fam, ”In amin, halit heniye hilalug lamihin,” ibag.

⁹Yesusen ari ibagma ap ino fano atfareg heniye hilibareg libag. Yesusen ari tibag sambil aru Yahudi inap wene uruk sul hari Sabat ino tibag.

¹⁰Wene uruk sambil welatfagma Yahudi inaben ap fano atfahon ino fam, ”Wene uruk sambil halit heniye wehenon haren tuk fug ane tehen,” ibag.

¹¹Ibagma ap inowen, ”An hihit nabehek ahun inowen heniye hilamihinteg lamihin ehekma laruk lahi,” ibag.

¹²Ari ibagma iren ap ino kapal haruk lit, ”Ap san halit heniyeyet hilalug lamihin ulug hiyag herehek?” ulug umung hibag.

¹³Umung hibagma fano atfag ahun inowen ebe hiyag isamin ulug turukmen Yesus ap anggolo arimano sehelimuwen longgo ibagma unuk napeleg ulug imbisibag.

¹⁴Tot welatfareg wene uruk ibam Yesus men ap ino men ambi atfareg itano Yesusen, ”Hat hihit habihiyon ariyen fano ahenma fobik mondabi siyahon hubam aruhu rohon siyag ane eke tuhun fug,” ibag.

¹⁵Yesusen ari ibagma ap ino wilip atfareg Yahudi inap unubam, ”An hihit nabehek ahun ino Yesus inowen hihit nabehek,” ulug hiyag isibag.

¹⁶Ari hiyag isibagma Yahudi inap arimanowen o wene uruk sambil tuk fug ane tehekma wabuhuk ulug mutug laruk latfag.

¹⁷Ari turuk latfag angge famen Yesusen hiyag isaruk lit, ”Nikniyen yabuk indam angge turukmen ketiya oho turuk. Ari fahet Anden oho turuk lahi,” ibag.

¹⁸Ari ibagma Yahudi inaben hol hibareg inindi inahan anggolo hibareg pinggi wabuhuk ulug wenggeltuk latfag. Atam oho wene uruk sambil saliyohap tehekteg fobik oho Allah An Nikni uruk lit Allah men ambi reg lahi ulug wirim tehekma wabuhuk pibag.

¹⁹Yesusen hiyag isaruk lit, ”Amloho amu yabuk wibuk fug tehen Ikniyen witukmu yet halug amlohowen oho wibuk hag teg ulug tem toho hiyag hisaruk lahi. Ikniyen turukon ari hag toho amlohowen oho tuk teg lit wereg.

²⁰Ikniyen amloho indi reg lit mun ane man ane inggarehen wituk ane amloho hiyag utuk lit yabuk suwon eke sebe roho hiyag uruhumu hiren henekolen yihi uruk lamuhup.

²¹Ikniyen ap warehon unduhuk felug onolukap eneptuk hag toho amlohowen oho inggareg indimuwen timin puhuwon arimano onolukap enebuhu.

²²Ikniyen unggum angginon amu kong tuk fug anggeyen unggum obog toho namlohowen kong tukag ulug hiyag itisi.

²³Ap obog tohowen Ikni wel turuk hag toho amloho wel turuk lamuhup. Ap san amloho wel turuk eleg halug at inowen Ikni monde ferisiyon ino oho wel tuhu fug,” ibag.

²⁴”Ap san An nawene holtuk lit An mon naptisiyon ubam indi wenggel haruk halug at ino war atuk ambeg embeselug mondabi onoluk wereg ambeg weregma unggum angginon ubam aruhu fug ulug ari tem toho hiyag hisaruk lahi.

²⁵Ap war atuson arimanowen Allah amloho ele holuhup. Holuhubon arimano onoluk welamuhup. Ihi ane ari fobik teko lahuwon ketiya oho teko laruk, ari we tem toho hiyag hisaruk lahi.

²⁶Ikniyen ap onolukap eneptuk hag toho amlohowen oho ap onolukap enebukag ulug Ikniyen amloho ineyap tibag.

²⁷Amloho ap kinangmon atik ibahon ino wambik watfagma unggum kong tukag ulug Ikniyen ineyap tibag.

²⁸Ap war atusama sal eneptuson arimanowen At ele holuhupmu fano ane turuk latfahon arimano in enebuhumu mondabi onoluk welamuhup, siyag ane turuk latfahon arimano in enebuhureg unggum angginon unubam umbuhu. Ari tuhu ane teko laruk halug hiren yihi uk fug.”

²⁹

³⁰”An ninggareg nindiyen nungge-nungge tuk fug teg lahi. An Nikniyen hiyag nutukmu holtuk lahiyon hikit toho unggum kong turuk lahi. An namu nindiyen unggum kong turuk lahi fug, Nikni mon naptisiyon inowen hiyag nutukon hikit toho eneg kong turuk lahimu wirim toho teko laruk.

³¹An namuwen turuk lahiyon ari fahet fano ulug ninggarehen wel ta fug teg lahi.

³²Ap winonen Anden turuk lahi ane fahet fano ulug fag toho uruk isalug ari tem toho uruk.

³³Hiren Yohanes ambeg ap mon eneptikipmu aren An nubahet tem toho peruk ane fahet honolukap heneptisi.

³⁴Ap kinangmonen An fahet uruk ane Anden fano peruk lahi fug, hit mondabi fano amag ulug Anden ari hiyag hisaruk lahi.

³⁵Yohanes ino iral hunduhuk felug umbagpag turukon hag toho welatisimu hiren seleg ari fano ulug henehiyeg toho welatikip angge famen tot welatug embeserikip.

³⁶Yohanes inowen An niyarisi ane fahet irisiyon ari fano famen apma reg. Nikniyen yabuk wituk laruhun ulug wanggun ninggikmu emberisimu wituk lahi ane ari palimu reg. Wituk lahi ane ariyen Nikniyen An mon naptisi ane ari fag atisi.

³⁷Nikni An mon naptisiyon inowen An namloho tu ulug An fahet fag toho hiyag isaruk. An Nikniyen mon naptisi angge famen hiren An nubam wenggel haruk lahep fug ane ariyen Nikni ele holuk fug angge ebe hinilen ha fug angge awene hunundama emberuk lahep fug.

³⁸

³⁹Suwesingga indam haharoho imbibahon fam mondabi nonoluk welamuhuk ulug hiren yami ruruk lahep. Suwesingga haharoho imbibahon inowen An inamap naptuk.

⁴⁰Inamap naptuk angge famen mondabi nonoluk welamuhuk ulug nambeg waharuk lahep fug.”

⁴¹”Ap kinangmonen wel naptukon fahet fano peruk lahi fug.

⁴²Hiren Allah fahet hinindi reg lahep fuhon ari An noluk.

⁴³An waharikikon Nikni unuk famen waharikik angge famen hiren An fahet fano peruk lahep fug. Ap eke inggareg unuk famen waruhuwon ino fahet hiren fano peruk lamuhup.

⁴⁴Nonoriyen nit wel nenebukag ulug turuk lahep angge famen Allah we misig werehon inowen nit wel nenebuhu ulug yami ruruk lahep fug. Nangginoho Allah fam hinindi wenggel hehep ha reg?

⁴⁵Anden hit fahet iren siyag ane turuk ulug Nikni ambeg huruwe laruk puk fug. Hiren nunumba Musan fanowap nenebuhu peruk lahep angge famen ariyen huruwe laruk.

⁴⁶Musan An fahet haharoho imbibagma hiren Musan hahatfahon tem toho ulug wenggel helepma An fahet oho tem toho pelep.

⁴⁷Musan haharoho imbibahon fahet hinindimu wenggeltuk lahep fugmu Anden hiyag hisaruk lahiyon oho nangginoho honoluk am teg,” ulug Yesusen hiyag isibag.