Read Angguruk Yali YOHANES 6 Bible Online

YOHANES 6 - Angguruk Yali bible

YOHANES 6

¹Welatfareg Yesus ik Galilea ahum keyen ik fimag nindig atfag. Ik ino unuk eke Tiberias.

²Nindig atfagma ap anggolo arimanowen Yesusen ap ouk warukon hihir eneptukmu hibareg ombolim miyaloho mutug laruk latfag.

³Laruk latfagma Yesus otsi men punu fam lahibareg heriyeg latfag.

⁴Heriyeg latfag sambil ari Yahudi inap suburu roti sig elehon naruk sul Paskah horog teg latfag.

⁵Welatfareg Yesusen yer isarukmen ap anggolo miyaloho waharukmu yer isibareg Filipus fam kapal haruk lit, ”O kema suburu ayeg waroho wak lulteg ap aruma og usulmu nalusa?” ulug kapal hibag.

⁶Kapal hibag ane ari Yesus undaman ari timin pibareg Filipus wal hamin ulug kapal hibag.

⁷Kapal hibagma Filipus inowen Yesus fam, ”Nowe, uang inggila suwon teng-teng angge foroho lalareg hahen suburu onggo paloho wak lilaman oho kut-kut nelep angge famen wirim alep fug,” ibag.

⁸Ari ibagma Yesus ot Simon Petrus are Andreas inowen Yesus hiyag utuk lit,

⁹”Tuma malik misihen suburu roti fuwaben men ikan piren men foroho angge famen ap anggolo aruma werehen nangginoho tehe ha reg?” ibag.

¹⁰Ari ibagma Yesusen otsi unubam, ”Ap aruma fam hur amiyek ilihip,” ibag. It welatfag ambeg ari hoholangge anggolo weregma ap arimano hur atfag. Hur atfahon arimano ap eneg teng-teng angge 5.000 winahuk fug toho welatfag.

¹¹Hur atfagma Yesusen suburu itano wibareg seneg lit sembahyang ibareg ap arimano fibir eneptuk latfag. Suburu og isibareg ikan oho nin eke nila peruk latfahon og isaruk latfag.

¹²Nibareg enehum ouk atfagma Yesusen otsi fam ele uruk lit, ”Nenggesareg embeheson aruma hik isahup tohon palu roho embelihip,” ibag.

¹³Ibagma ap anggolo arimanowen roti fuwaben itano nibareg minggir atfahon Yesus otsiyen sum nisanggowen fam fani roho imbibag.

¹⁴Ap kinangmonen turuk eleg ane Yesusen tibag ane fahet ap anggolo arimanowen yet hibareg, ”At tu Allahn kinangma monde fuhu ibahon nabi ino At tu tem toho,” uruk latfag.

¹⁵Ap anggolo arimanowen Yesus ninine roho hondohokukteg ap suwonap tuhuk ulug pibag ane ari Yesus oluk atfareg punu eke fam Yesus amumu libag.

¹⁶O hup arik ohoma Yesus otsi ik ayegma libareg

¹⁷kou fam kibareg o Kapernaum lul ulug ik ahum ke laruk latfag. Larukmen o hik atfag angge famen Yesus it enembeg waharuk elegma

¹⁸siyelu humon watfareg ik haglabut waharuk latfag.

¹⁹E fam ik il watil larukmen tot yat toho kilometer fuwaben libareg yet harukmen Yesus ik ahum pali keyen kou horogma lamin ulug waharukmu yet hibag. Yet hibareg iren enekolen turuk latfag.

²⁰Enekolen turuk latfagma Yesusen te, ”An Honowe waharuk lahireg henekol ha fug,” ibag.

²¹Ari ibagma iren Onowe fam kou fam kik ma ul ulug turukmen kou ino it lul pibag ambeg itano ik ayegma welatfag.

²²Likiyamon ap anggolo ik fimag fil welatfag inap arimanowen yet harukmen kou winon elegma kou misig eneg welatisiyon ino fam Yesus kuk fugmen otsi eneg larusa ulug yet hibag.

²³Yet hibareg weregma kou piren hinahan o Tiberias filen watfareg Yesusen sembahyang ibareg suburu og isibag ambeg itano horogma watfag.

²⁴Horogma watfagma ap anggolo arimanowen yet harukmu Yesus otsi men eleg latfagma kou itano fam kibareg Yesus yami rul ulug o Kapernaum fil laruk latfag.

²⁵Ap arimano ik fimag libareg Yesus hiyag itfareg, ”Nonowe, nungge salim tuma waharikin?” ulug kapal hibag.

²⁶Kapal hibagma Yesusen, ”Hit hinindi anggar amag ulug Anden eneg ane tirikikon ino fam wenggel ha fug angge we suburu nenehum ouk toho nengge ulug yami nabil waharuk lahep. Ari fahet tem toho hunubam uruk lahi,” ibag.

²⁷”Suburu filik turukon ari fahet yabuk wituk lamuhup fug. Suburu narukmu mondabi honoluk welamuhubon ari fahet yabuk wituk lamuhup. Suburu fanowon ari At ap atik ibahon inowen og hisahu. Ninikni Allah inowen namloho ulug At ubam eneg ane teberisi,” ibag.

²⁸Ari ibagma iren te, ”Allahn fano peruk iyabuk wituk lamuhuken nanggintul,” ulug kapal hibag.

²⁹Kapal hibagma Yesusen te, ”Allahn fano peruk iyabuk aru: Aren monde ferisiyon ino ubam hinindi wenggel haruk lamek,” ibag.

³⁰Ari ibagma iren te, ”Eneg ane Haren timihinon yet hulteg ninindimuwen tem toho pulen nungge ane fam wal hamihin? Yabuk nunggeyon timihin?

³¹Nit niniknisi nunumbusagsi suburu eleg angge farema wereg lit suburu manna nibag ane fahet haharoho werehon te Allahn poholman suburu og isibag ulug hahareg lit wereg,” ibag.

³²Ari ibagma Yesusen, ”Hahareg lit wereg ehebon ari fahet Anden tot hiyag hisamin: Hun Musa inowen suburu poholmon og hisibag fug. An Nikniyen suburu poholmon we tem toho fanowon ketiya og hisaruk.

³³Ap kinangmon onoluk welamag ulug suburu Allahn tohon Aren poholman pilabik waharuk,” ibag.

³⁴Ari ibagma iren te, ”Nonowe, suburu ehenon ari likiya hupmu og nisaruk laruhun,” ibag.

³⁵Ari ibagma Yesusen, ”Suburu mondabi oluk werehon ino An tu welahi. Ap sa An nambeg waharukon mondabi suburu obok hahu fug, san An nubam indi wenggel harukon mondabi ik obok hahu fug,” ibag.

³⁶”Hit hinilen An yet niyaruk lahep angge famen nubam wenggel haruk lahep fug ulug hit hunubam fahe hiyag hisihi.

³⁷An Nikniyen og nutukon obog toho An nambeg waharuk. Ap sa An nambeg waharukon miyaloho hik isahuk fug.

³⁸An poholman wambik waharikikon An namu nindiyen yabuk wiruhuk ulug wambik waharikik fug. Nikni An mon naptisiyon inowen yabuk hiyag nuruhuwon wiruhuk ulug wambik waharikik.

³⁹Mon naptisiyon inowen yabuk hiyag nitisiyon aru re: Obog toho Aren og nitisiyon arimano foroho lit misig oho longgo rubuk fug angge weregma fobik aruhu sambil ino onolukap enebuhun ulug hiyag nitisi,” ibag.

⁴⁰”Ap san amloho yet halug ubam indi wenggel haruk halug at ino mondabi oluk welaruhuwen fobik aruhu sambil ino olukap tuhuk. Aru Nikni undama perisiyon fam hiyag hisaruk lahi,” ibag.

⁴¹Yesusen ari ibagma Yahudi inaben Yesus pet turuk lit, ”Suburu poholman wambik watfahon ino An ehek,” ulug abug uruk latfag.

⁴²”Yesus Yusuf amloho ikni isinga niren isaruk laheyon At aru fug? Nangginoho ap tuwen poholman wambik waharikik uk hag teg?” uruk latfag.

⁴³Ari uruk latfagma Yesusen, ”An pet naptuk lit nabug uk fug.

⁴⁴Ap san An nambeg watnin perukon ino Nikni mon naptisiyon inowen hondoholug waharuk halug eneg An nambeg wam hag teg. Ap ino fobik waruhu sambil Anden olukap tuhuk.

⁴⁵Atam haharoho imbibag ane ari ap obog toho Allah inggarehen hiyag isahu ulug ap nabi arimanowen haharoho imbibag. Ap sa Allah inggarehen hiyag isarukon holtuk halug nambeg waharuk.

⁴⁶Ap kinangmonen Nikni ebe haruson eke wereg eleg. We Allah wereg ambehen waharisiyon inowen eneg Ikni ebe harisi.

⁴⁷An nubam indi wenggel harukon at ino mondabi oluk welaruhu. Ari we tem toho hiyag hisaruk lahi.

⁴⁸Suburu mondabi oluk werehon An tu welahi.

⁴⁹Hit hiniknisi unumbusagsiyen farema wereg lit suburu manna naruk latfag angge famen war atuk latfag.

⁵⁰Suburu poholman wambik waharisiyon ino at tu: Ap san suburu aru naruk halug at ino war aruhu fug.

⁵¹Suburu olukon poholman waharisiyon ino An tu welahi. Ap san suburu aru naruk halug at ino mondabi oluk welaruhu. Ap kinangmon onoluk welamuhuben suburu Anden og isaruk lahiyon aru nunu og isaruk lahi,” ibag.

⁵²Ari ibagma Yahudi inaben it-it suwahal uruk lit, ”Ap tuwen inggareg unu nangginoho nit og nisarukmu naruk lahe,” ibag.

⁵³Ari ibagma Yesusen, ”At ap atik ibahon ino unu men amep men nahup fugmu hit hinindimu olukon welaruhu fug. Ari tem toho hunubam uruk lahi.

⁵⁴Ap san An nunu men An namep men naruk halug at ino mondabi oluk weregma fobik waruhu sambil Anden olukap tuhuk.

⁵⁵An nunu men namep men aru we tem toho naruk angge fanowon wereg.

⁵⁶Ap san An nunu men namep men naruk halug at ino An men welaruhumu An at men mangno roho welamuhuk.

⁵⁷Nikni oluk werehon inowen An mon naptisimu An oho At fam noluk welahi hag toho ap san An nunu naruk halug at ino oho An fam oluk welaruhu.

⁵⁸Suburu poholman wambik waharisiyon tuma wereg. Hinikni hunumban suburu naruk latfag angge famen war atfahon ino hag toho fug, ap san suburu werehon tu naruk halug mondabi oluk welaruhu,” ibag.

⁵⁹Yesusen hiyag isibag ane obog toho aru o Kapernaum wene uruk ibamen hiyag isibag.

⁶⁰Yesusen hiyag isibag ane ari obog toho holfareg otsi anggolo arimano it winonen te, ”Ele haro roho ehekon ari san holuk teg ane ehek?” uruk latfag.

⁶¹Yesus otsiyen ninirim ulug ngesekum tibag ane fahet Yesus undaman oluk atfagma ele unubam uruk lit, ”Hiyag hisihi ane fahet hinindi nin aha?

⁶²At ap atik ibahon ino atam welatfag ambeg suhuloho laharukmu yet hahup halug nanggintuk lamuhup?

⁶³Allah hime fanowon inowen onolukap enebuk teg, unu amuwen tuk fug teg. Anden nele hiyag hisaruk lahiyon ari fam Allah hime fanowon werehen honoluk welamuhup ane fahet hiyag hisaruk lahi.

⁶⁴Hit welahebon aruma winonen te tem toho uruk ulug hinindi wenggel haruk lahep fug,” ibag. Yesusen wene ak tibibag sambilen ap inindimu tem toho hiyag nisaruk peruk latfag fug inap arimano fahet indimu oluk atfag. Wabukag ulug huruwe lahuk peruk latfag ahun ino oho Yesus indimu oluk atfag.

⁶⁵Oluk atfagma Yesusen it unubam te, ”Hiren ari roho peruk lahepma fahe hiyag hisihi ane ari fahet ihi: Nikniyen hiyag hisaruk eleg halug ap misig oho An nambeg wam fug teg,” ibag.

⁶⁶Wene ari hiyag isibag sambil ino famen Yesus otsi anggolo arimano At min laruk ane inirim atfagma pok atfag.

⁶⁷Pok atfagma Yesusen otsi nisanggowen itano fam, ”Hir oho pok amul peruk lahep?” ulug kapal isibag.

⁶⁸Kapal isibagma Simon Petrus inowen hebeloho, ”Nonowe, ap sa ambeg nit laruk lamul? Wene Haren uruk lahenon ari famen mondabi nonoluk welamuhuk.

⁶⁹Hat Allahn palimuwap haptisiyon welahenon niren Hat fahet tem toho peruk lit nonoluk toho welahe,” ibag.

⁷⁰Ari ibagma Yesusen te, ”Anden hit nisanggowen welahebon aruma mumal heneptikik fug? Ari reg angge famen hit welahebon aruma misig eke siyahon Iblis amloho wereg,” ibag.

⁷¹Ibag ane ari Simon Iskariot amloho Yudas ino fahet ibag. At inowen Yesus wabukag ulug huruwe libag ahun ino it nisanggowen itano enesehelimu misig welatfag.