Read Angguruk Yali YOHANES 7 Bible Online

YOHANES 7 - Angguruk Yali bible

YOHANES 7

¹Yahudi inaben Yesus wabuhuk peruk latfagma o Yudea eneg mondabi welaruhuk fug ulug Galilea walingguruk latfag.

²Walingguruk latfagma Yahudi inaben o sabo inggilangge fam wituk sambil ino sali horog teg latfagma

³Yesus oriyen ubam enele uruk lit, ”Hat hotsiyen Haren turuk ane yet hahuben tuman o Yudea lamihin,” ulug hiyag utuk lit,

⁴”Ap misihen turuk lahi ane inam alep peruk halug hirahoman tuk fug teg. Haren turuk lahen ane ari ap obohen onoluk amag ulug hinggareg hebe unug isahun,” ibag.

⁵Enele ari roho ibahon Yesus ori ininggarehen ubam wenggel ha fug anggeyen ibag.

⁶Ibagma Yesusen hebeloho hiyag isaruk lit, ”Anden tuhuk sambil uwan lahi, hiren eneg henesehet toho likiya hupmu turuk lahep.

⁷Ap kinangmon ininggarehen siyag ane turukon fahet fag toho hiyag isaruk lahimu iren An nubahet eneg ninirim peruk lit hit fahet ninirim peruk eleg.

⁸Seni esetuk ambeg hit henemu lalihip, An tuhuk ane uwan tehen An la fug teg lahi,” ibag.

⁹Yesusen ari ulug ori fam hiyag isibareg o Galilea welatfag.

¹⁰Yesus ori arimano o Yudea seni esetuk ambeg libagma Ar oho inam toho la fug angge hirag-hirag onombolim libag.

¹¹Yahudi inap arimanowen seni esetuk ambehen At ino kema wereg ulug yami ruruk latfag.

¹²At fahet enele anggolo roho eke hag eke hag uruk lit it winonen At fano ahun urukmu it winonen At siyag ahun, Aren ap inindi ninap eneptuk uruk latfag.

¹³Yahudi inap onowesi arimano fahet enekolen misihen oho ambong se roho ele seleg toho uk fug teg latfag.

¹⁴Yahudi inaben o sabo inggila fam witfareg nohorukmen hup hinahanam atfagma Yesus Allah ibam kibareg wene hiyag isaruk latfag.

¹⁵Hiyag isarukmu hibareg Yahudi inaben, ”Ap suwonen milaltusa fug angge famen hun tu oluk teg lit nangginoho hiyag nisaruk?” uruk latfag.

¹⁶Uruk latfagma Yesusen, ”Anden hiyag hisaruk lahi ane aru ninggareg nindimu wenggel halug hiyag hisaruk lahi fug. An mon naptisiyon inowen hiyag nitisimu uruk lahi,” ibag.

¹⁷”Allah wene uruk lahi ano, An ninggareg nindimuwen wenggel halug uruk lahi ano, mon naptisiyon inowen peruk ane hikit toho turuk ahun ino eneg indi anggar aruhu.

¹⁸Ap san inggareg indimu wenggel haruk ane hiyag isaruk ahun ino ap winonen yet niyalug wel nabukag ulug hiyag isaruk. Ap san monde ferisiyon ino eneg wel turuk lamag peruk ahun inowen ele si uk fug angge tem toho hiyag isaruk.

¹⁹Ari roho tuk fug ulug Musan haharoho hit fam imbibag fug? Imbibag angge famen hit obog tohowen apmayap tebeseruk lit nungge fahet An nuwabuhuk peruk lahep?” ibag.

²⁰Ibag ane fahet ap anggolo arimanowen kapal haruk lit, ”Siyag angge hindimu werehen uruk hag toho ehenon ari ap san huwaruhu ane fahet ehen?” ibag.

²¹Ari ibagma Yesusen, ”Anden alem we misig tirikik ane fahet hiren yihi uruk lahep.

²²Hiren te enembilahap paltuk ane ari Musan imbibag uruk lahep angge famen aren imbibag fug, hit hiniknisi unumbusagsiyen imbibag. Enembilahap paltuk ane ari wene uruk sambilen oho paluk teg uruk lahep.

²³Musa awene apmayap tul fug ulug wene uruk sambilen enembilahap paltuk lahep anggeyen Anden wene uruk sambil ap ouk warukon fanowap tirikikon fahet pet naptuk lahep?

²⁴Nori, hiren unggum kong turuk lit sel fil werehon yet halug kong turuk lamuhup fug, fano pikit toho eneg kong turuk lamuhup,” ibag.

²⁵Welatfagma Yerusalem inap arimano winonen te, ”Wabuhuk uruson ino hun tu fahet uruk ano?” ulug umung-umung atuk lit,

²⁶”Yet hemek, At inowen fag toho hiyag isarukmu iren hebeloho At ubam tot uruk eleg. Nit niniknisi arimanowen At Kristus ap obog toho fanowap enebik waruhu urukon ino ulug onoluk teg ano?

²⁷Ap tu ibam yugmu nit nonoluk teg lahe. Kristus waruhu uruson ino waharuk halug At ibam yugmu ap misihen oho oluk teg lam fug teg,” ari ulug enele sahaltuk latfag.

²⁸Yesusen Allah ibamen ele hi roho hiyag isaruk lit, ”An niyaruk lahebon nibam yugmu oho honoluk teg lahep angge famen An namu nindiyen waharikik fug, tem toho uruk ahun ino hiren haruk lahep fuhon ariyen An mon naptisi.

²⁹Aren An mon naptisimu At wereg ambehen waharikikon inowen At fahet noluk teg lahi,” ibag.

³⁰Ari ibagma it arimanowen senebul pibag angge famen Allahn teko lahu ibahon sali hikir atuk elehen ap misihen oho senebuk fug teg latfag.

³¹It ap anggolo welatfahon arimano fimag filen Aren urukon tem toho uruk ulug wenggel haruk latfag. ”Kristus fobik waruhu uruson ino waruhu halug Aren ap fanowap eneptuk ane anggolo tuhu, At tuwen tor angge tirisi peruk lahep?” ulug it-it enele sahaltuk latfag.

³²Ap anggolo arimanowen enele sahaltukmu Farisi inaben hol isibareg Farisi inap men imam inap onowesi suwon arimano menen senerik lalihip ulug enemingmingangge mon enepfag.

³³Mon enepfagma Yesusen, ”We tot hit men ambiyeg welaruhukteg An mon naptisiyon ino ambeg lahuk,” ibag.

³⁴”An welaruhuk ambeg hit wam fug tehen An yami nabuhup angge famen hiyag nabuhup fug,” ibag.

³⁵Ibagma Yahudi inaben it-it enele sahaltuk lit, ”Hiyag nabuhup fug ehekon ari kema lahumu hahuk fuhon fahet ehek,” ibag. ”Yunani inap wereg ambeg enesehelimu linggik-longgo uruson enembeg lahukteg Yunani inap hiyag isahuk ulug uruk ano?” ibag.

³⁶”Yami nabil laruk lamuhup angge famen hiyag nabuhup fug ehekon ari men An wereg ambeg hit wam fug teg ehekon ari men nungge fahet ehek?” ulug it-it enele sahaltuk latfag.

³⁷O sabo e inggila fam wituk latfahon ino obog-obogma turuk lit su ane tul pibag sambil ino Yesus in atfareg ele hi roho hiyag isaruk lit, ”Ap sa ik obok harukon An nambeg ik hinanggik wamag.

³⁸Ap sa indam haharoho imbibahon ino hikit toho An nubam wenggel harukon ino famen ik eleruk mondabi oluk welaruhu ahik wilip aruhu,” ibag.

³⁹Ibag ane ari Allah hime fanowon ino ap At ubam inindi wenggel harukon arimano Allahn og isahu ulug hiyag isibag. Allahn Yesus unuk palimuwap tuk fugmu Allah hime fanowon ino ap unubam uwan wambik watfag fug.

⁴⁰Ap anggolo arimano winonen ibag ane hol hibareg, ”Wene hiyag isaruk ahun nabi waruhu uruk latuson ino tu tem toho waharisi,” uruk latfag.

⁴¹It winonen te, ”Mesias waruhu uruk latuson ino tu,” uruk latfag. It winonen te, ”A, Mesias waruhu uruson ino o Galilean wam fug teg.

⁴²Atam haharoho imbibahon te Mesias ino Dauren ondohowonen ondohowon o Betlehem Daud welatfag ambehen waruhu,” uruk latfag.

⁴³Uruk latfagma ap anggolo arimanowen At fahet it-it suwahal uruk latfag.

⁴⁴Ap arimano fumag filonen Yesus senebul ulug tibag angge famen ap eke ambong se roho At senetukon elehen imbisibag.

⁴⁵At senetukon eleg latfagma enemingmingangge itano suhuloho imam onowesi suwon men Farisi inap men enembeg libagma, ”Nungge fahet At walug wahep fug?” ibagma

⁴⁶iren te, ”At tuwen ele uruk hag toho ap kinangmon misihen oho uruk latfag fug,” ibag.

⁴⁷Ari ibagma Farisi inaben hebeloho it unubam te, ”Hir oho hinindi ninap henebehek?

⁴⁸Ap suwon men Farisi inap men arimano misihen oho At fahet tem toho uruk ulug ubam wenggel haruk?

⁴⁹We ap anggolo olma werehon Musa wene enepelehon arimanowen eneg At ubam wenggel haruk. It ap aruma war amag tohon,” ibag.

⁵⁰Ari ibagma it arimano misig unuk Nikodemus atam Yesus ambeg watfahon inowen it unubam ele uruk lit,

⁵¹”Musa wene fam ibahon hikit toho unggum kong turuk halug ap inowen turuk ane enepelegma kapal ha fug anggeyen unggum kong tuk teg?” ulug kapal isibag.

⁵²Kapal isibagma it arimanowen Nikodemus fam te, ”Har oho Galilea hahun wereg lit uruk lahen? O Galilea inowen ap wene hiyag isarukon nabi misig wilip atfag fugmu suwesingga haharoho imbibahon kim hahunmu ari holuk aruhu,” ulug ubam ibag.

⁵³Ari ibagma ap arimano inibam wal taneg libagma