Read Angguruk Yali KISAH RASUL-RASUL 10 Bible Online

KISAH RASUL-RASUL 10 - Angguruk Yali bible

KISAH RASUL-RASUL 10

¹O Kaisarea ap misig unuk te Kornelius welatfag. At ino sehen seneg inap ununggul unuk Italia onowe roho welatfag.

²Ap ino men ori ibam werehon men inindi fano wenggel haruk lit Allah fahet enekol toho welatfag. Enengge elehon aren og isaruk lit Allah fam sembahyang uruk lit welatfag.

³Misihim sambil mo haya rurukmu olma wereg lit nei waruk hag toho yet harukmen malaikat Allahn monde fibagma ambeg kibareg ubam ele uruk lit, ”Kornelius, nare,” ibag.

⁴Nare ibagma malaikat yet hibareg akol haruk lit, ”Nowe, hat nungge fahet tuma wahen?” ibag. Ibagma malaikat inowen, ”Hat sembahyang urukmu Allahn hol hiyarisireg ap enengge elehon haren og isarukmu Allahn pilap hiyaruk lit oluk atisi.

⁵Ketiya humalikisi eke o Yope lalihip ulug mon enepmihinmu ap misig Simon unuk eke Petrus hondohik lalusa.

⁶At ino Simon wam sapi ahap wituk ahun ari ibam ik ayegma werehon ari men wereg,” ulug hiyag itfag.

⁷Hiyag itfareg malaikat ino libagma Kornelius ino amingmingangge piren men sehen seneg ahun Allah fahet akol toho werehon misig at min werehon men wol enepfag.

⁸Wol enepfareg, ”Malaikat wahareg wene ari ehek,” ulug hiyag isibareg o Yope lalihip ulug mon enepfag.

⁹Mon enepfagma it hinahan itano o Yope horogma libareg kema larukmen hun Petrus ino unukoho mo anum pulmu watfagma sembahyang imin ulug hinawi lahibag.

¹⁰Sembahyang imin ulug hinawi lahibareg weregma suburu oriyen osoko tug teberuk latfag. Tug teberukmu Petrus inowen fulu roho yet harukmen

¹¹pohol fo regman sum hag angge ahale ulunggun waroho kinangma wambik waharukmu yet hibag.

¹²Kim harukmen sum ino fam inggik uyug wereg angge men kinang ke hag til laruk angge men suwe pohol ke larukon men yunggaregma kim hibag.

¹³Kim hibareg weregman, ”Petrus, in atmihinteg wereg angge aruma isag talug namihin,” urukmu hol hibag.

¹⁴Hol hibareg Petrusen, ”A, Nowe, usa angge aruma Allah fahet umbuk fug teg angge re indam oho narikik fureg ketiya oho namin fug,” ibag.

¹⁵Ari ibareg hol harukmen inggik pireneg angge ele nin eke uruk lit, ”Allahn fanowap tehek angge aruma haren usayap timihin fug,” ibag.

¹⁶Tibag ane aru inggik hinahanam pilabik watfareg mondabi poholman lisoho hilibag.

¹⁷Mondabi lahibagma Petrus inowen fulu roho hihi ane ari nungge fahet Allahn hiyag nerehek ulug indi anggin atfagma wenggel haruk latfag. Wenggel haruk lit weregma Kornelius otsi mon enepfahon itano Simon ibam tu ulug hiyag isibagma sokolma unduhuk latfag.

¹⁸Sokolma unduhuk lit, ”Simon unuk eke Petrus ino o aru wereg ano,” ulug ap o ino welatfahon unubam kapal isibag.

¹⁹Kapal isibagma Petrus ino sum yet hibahon fahet indi anggin toho wenggel haruk lit weregman Allah hime fanowon inowen ubam hiyag utuk lit, ”Petrus, ap hinahan wahasareg hat yami haptuken

²⁰in atlug wambimihinteg it men ambiyeg lahuben hindi se roho welamin, Anden it mon eneptikikmu wahasa,” ulug hiyag itfag.

²¹Hiyag itfagma Petrus wambibareg, ”Nori, hiren an yami naptuk lahebon ino an tu welahi. Nungge hiyag numul ulug wahep?” ibag.

²²Ari ibagma it hinahan watfahon itanowen Petrus fam hiyag utuk lit, ”Sehen seneg inap onowe Kornelius ino indi fano wenggel haruk lit Allah fam akol toho werehon Yahudi inap obog tohowen at fano wereg peruk ahun inowen mon neneptisi. Simon Petrus ino hondohik lahupmu aren wene hiyag hutukon holuhun ulug malaikaren hiyag itisi ane roho niren hondog habul ulug wahe,” ibag.

²³Ari ibagma, ”Nori, yoho an men o aru nohulen kik maniyek,” ibag. Nohibareg likiya re Petrus it men ambiyeg larukmen Yope inap Yesus wene holtukon winon oho ambiyeg libag.

²⁴Libareg kema noholug likiyamon o Kaisarea libag. Larukmen Kornelius ino ori men owesi otsi men wol enepfareg palu roho wereg lit yer enesug latfag.

²⁵Yer enesug lit weregman Petrus o horogma waharukmu Kornelius inowen yet hibareg olohotma libareg aluke fil hur atlug hi ribag.

²⁶Hi rurukmu Petrusen Kornelius unduhuk feruk lit, ”In amin, an oho ap kinangmon welahi,” ibag.

²⁷Ibareg Kornelius men enele il-il olma kurukmen ap anggolo palu roho weregma yer isibag.

²⁸Yer isibareg Petrusen unubam ele uruk lit, ”An Yahudi nahun famen enemu inap men ambiyeg wereg lit inibam oho usa ulug la fug teg lahiyon ari hit honoluk. Lahi ha fug teg perukmen Allahn te, ’Enemu inap inibam usa uk fug, lamihin,’ ulug hiyag nitisimu wahi.

²⁹Hiren an hondog nabik larikipmu Allahn lamihin ulug hiyag nitisimu pok atnin perikik fug. Nungge ane hiyag numul ulug hondog nabik larikip, ketiya hiyag nemek,” ibag.

³⁰Ibagma Kornelius inowen, ”An nibam wereg lit mo haya ririkim ketiya tiya hag tegma sembahyang uruk latikik sambil inowen yoho ninggik uhaneg angge welahi. Sembahyang uruk lit yet harukmen ap eke sum yanggowon wan tohon an nalukema unduhuk latisi.

³¹Unduhuk lit ap inowen nubam ele uruk lit, ’Kornelius, haren sembahyang urukmu Allahn hol hiyarisireg ap enengge elehon haren og isarukmu Allahn pilap hiyarisi,’ irisi.

³²’Ketiya humalikisi eke o Yope lalihip ulug mon enepmihinmu ap misig unuk Simon unuk eke Petrus hondohik lalusa. At ino Simon wam sapi ahap wituk ahun ari ibam ik ayegma werehon ari min wereg,’ ulug hiyag nitisi.

³³Hiyag nitisimu anden notsi unubam at hondohik lalihip ulug mon eneptikikmu hondog habik larusama nirim puk fug anggeyen hat fano wahen. Allahn nit pilap nenesug lit weregma nit palu roho welaheyon aruma nunubam Ninikni Allahn hiyag hitisi ane ketiya hiyag nisimin,” ibag.

³⁴Ari ibagma Petrus inowen, ”Allahn te ap tu siyahon tu fanowon puk fug angge obog toho indi reg lit werehon yoho eneg noluk ahama we tem toho pihi.

³⁵Ap obog toho inibam enemu-enemu wereg angge famen Allah fahet enekol toho werehon fano ane turuk lit weregma Allahn indi enesug lit wereg,” ibag.

³⁶”Nonowe Yesus Kristus ino ap obog toho fahet Onowe roho wereg. ’Israel inap wereg ambeg lahunteg ap obog toho unubam An nunuk fam mangno roho welamuhuben hiyag isaruk laruhun,’ ulug Allahn Yesus Kristus monde ferisi.

³⁷Allahn Yesus monde ferisimu Yohanes inowen tam ap ikma pilap eneptuk latisimu Yesus inowen o Galilea famen ak teberisireg fobik o Yudea keyen til larisi ane hit honoluk teg lahep.

³⁸Anden uruk lahiyon aru Yesus Nazaret ahun ino fahet ihi. Allahn At ahime fanowon og utuk lit ineyap tirisi. Ineyap tirisimu o eke la o eke la turuk lit Allahn let turukmu fano ane turuk lit ap Iblis inggikmu welatuson obog toho hihit eneptuk latisi.

³⁹O Yudea men o Yerusalem men Aren mun ane man ane turukmu niren yet harukuk. Ari turuk latisi ahun ino aben e fam teloho ware feserusa.

⁴⁰Ware feserusama inggik pirenam welatisireg inggik hinahaneg angge Allahn olukap tirisimu At ebe nit niniline ebenam atisi.

⁴¹Ebenam atisi sambil ino ap obog tohowen harusa fug, we nit Allahn mumal neneptisiyon itanowen eneg harukukteg suburu men ik men ambiyeg At Allahn olukap tirisiyon men narukuk.

⁴²Ap olukon warehon unubam alem werehon Anden kong tuhuken ap obog toho unubam fag toho hiyag isa lahup ulug nit mon neneptisi.

⁴³At ino fahet atam Allah wene hahatfag inap nabi arimano obog tohowen haharoho imbibag. Ap san siyag ane turukon embeselug At ubam wenggel haruk halug Allahn siyag ane ari ambolma umbusuhu,” ulug Petrusen hiyag isibag.

⁴⁴Petrusen ari ulug hiyag isibagma ap palu roho welatfahon arimanowen Petrus ele hol harukmu itano Allah hime fanowon unubam wambik watfag.

⁴⁵Unubam wambik watfagma Yahudi inap wene holtukon Petrus min ambiyeg watfag inap arimanowen enemu inap aruma Allah unuk enepeleg angge famen Allah ahime fanowon unubam wambik waha ulug enekol haruk latfag.

⁴⁶Ap arimano enele nin atfagma Allah wel turukmu Yahudi inap arimanowen hol hibareg enekol hibag.

⁴⁷Enekol hibagma Petrusen, ”Nori, ir oho nit hag toho Allah hime fanowon unubam ahama ikma pilap enebuk fug ulug ap san alele og eneplep?” ibag.

⁴⁸Ari ibareg Yesus Kristus unuk uruk lit ap aruma ikma pilap enebiyek ibag. Ari ulug ikma pilap enepfagma ap arimanowen, ”Nit men welamuhukteg fobik hibam lahun,” ulug Petrus alele wibag.