Read Angguruk Yali KISAH RASUL-RASUL 11 Bible Online

KISAH RASUL-RASUL 11 - Angguruk Yali bible

KISAH RASUL-RASUL 11

¹Allah unuk enepeleg inap ketiya wene holtuk urukmu Yesus otsi winon men wene holtuk inap o Yudea werehon arimanowen hol hibag.

²Hol hibareg Petrus ino o Yerusalem lahik watfagma atam Yahudi inap welatfag angge famen wene holfag inap arimanowen Petrus men suwahal ibag.

³Suwahal uruk lit, ”Hat Yahudi hahun ambilahap palehon welahen angge famen it enembilahap paleg eleg inap inibam larikinteg suburu it men ambiyeg narikip,” ulug pet tibag.

⁴Pet tibagma Petrus inowen mun ane man ane eke hag eke hag turukmu yet harikik ulug hiyag isaruk lit,

⁵”An o Yope sembahyang uruk lit weregma fulu ane nubam atisimu yet harukmen sum hag angge ahale ulunggun waroho poholman nalukema wambik waharukmu yet harikik.

⁶Pilabik waharisimu kim harukmen sum ino fam inggik uyug wereg angge men farema werehon il wirik angge men kinang ke hag til laruk angge men suwe pohol ke larukon men yunggaregma kim harukmen pohol filen

⁷ele nubam uruk lit, ’Petrus, in atmihinteg wereg angge aruma isag talug namihin,’ urukmu hol harikik.

⁸Ari urukmu hol harikikteg anden te, ’A, Nowe, fug, usa angge aruma Allah fahet umbuk fug teg angge re indam oho nambilik fam narikik fug, yoho oho namin fug,’ irikik.

⁹Ari irikikmu inggik pireneg angge nin eke ele uruk lit, ’Allahn fanowap tehek angge aruma haren usayap timihin fug,’ irisi.

¹⁰Tirisi ane aru inggik hinahanam tirisireg mondabi poholman lisoho hilarisi.

¹¹Hilarisimu weregman ap hinahan o Kaisarean an nambeg mon eneptusama waharusareg an welatikik ibam sokolma unduhuk latusa.

¹²It unduhukmu Allah hime fanowon inowen an hiyag nutuk lit, ’Hindi anggin am fug angge it men ambiyeg lahun,’ irisimu nonori falfaliken aruma werehon men ambiyeg larukuk.

¹³Nit larukukteg ap ino ibam kurukmen at inowen nit nunubam hiyag nisaruk lit, ’Malaikat an nibam kik waharisireg nubam ele uruk lit o Yope hun Simon unuk eke Petrus werehon hondohik lalusa ulug hotsi mon enepmihinmu

¹⁴at inowen wene hiyag hisahuwon ari fam hat hinggareg men ap hat min werehon fanowap henebuhu ulug malaikaren an nubam irisi,’ ulug hiyag nisarisi.

¹⁵Kornelius inowen ari hiyag nisarisimu anden wene hiyag isarukmen Allah hime fanowon ino atam nit nunubam wambik waharisi hag toho it unubam oho wambik waharisi.

¹⁶Wambik waharisimu Nonoweyen tam irisi ane aru, ’Yohanesen ap ik fam eneg pilap eneptuk latisi angge famen Anden hit hunubam Allah hime fanowon pilap hisa waruhuk,’ irisi ane aru wenggel haruk lit noluk toho welatikik.

¹⁷Nori, niren Nonowe Yesus Kristus fam wenggel haruk ane ak turukuk sambil ino Allah hime fanowon og nisarisi hag toho it ap arimano oho og isarisi angge famen anden nangginoho Allah fam og isa fug ulug alele wele?” ulug Petrusen hiyag isibag.

¹⁸Hiyag isibagma hol harukmen inindi fano atfagma Allah wel turuk lit, ”Allah unuk enepeleg inap oho mondabi onoluk welamag ulug Allahn inindi fanowap eneptukmu siyag ane turukon embeseruk,” uruk latfag.

¹⁹Stefanus ware fisibagma Yesus umalikisi winon unusuruk latfagma it arimano anggolo ap seheli ke wilip-walap ibag. O Fenisia men Siprus men Antiokhia men yatma libag angge famen o Yahudi inap welatfahon eneg wene hiyag isaruk latfag.

²⁰Wilip atfahon arimano Siprus inap men Kirene inap men o pumbuk Antiokhia libareg Yesus Nonowe we tem toho wereg ulug Yahudi inap eneg hiyag usul fug ulug Yunani inap oho hiyag isaruk latfag.

²¹Allah inggik ineyonen it ler eneptukmu ap anggolo wene hiyag isarukmu holtukon arimanowen Nonowe Yesus fam inindi wenggel haruk latfag.

²²Antiokhia inap inindi wenggel harukmu o Yerusalem wene holtuk inaben hol hibareg Barnabas it pen isa lamihin ulug o Antiokhia monde fibag.

²³Monde fibagma Barnabas libareg kim isarukmen Allahn it indi enesug lit unubam tibag ane yet hibareg ahiyeg hibag. Ahiyeg haruk lit Ninikni Allah wene hininggik ine roho ki reg lamuhup ulug komo enepfag.

²⁴Barnabas ino Allah hime fanowon ubam weregma ubabut fano ane turuk lit Allah fahet tem toho peruk latfagma Allah wene fahet ap anggolo atuk latfag.

²⁵Welatfareg Barnabas ino Saulus yami rimin ulug o Tarsus libareg

²⁶Saulus hiyahibareg suhuloho o Antiokhia hondoholug watfag. Hondoholug watfareg o Antiokhia wene holtuk inap men weregma mo ilig atfareg wirig atfag. O ino wereg lit ap anggolo wene hiyag isaruk latfag. Wene holtuk inap fahet ununggul unuk ”Kristen” uruk ane ari atam-tam o Antiokhia inaben Kristen suwalfag.

²⁷Welatfagma ap fulu ane turuk inap nabi o Yerusalemen Antiokhia watfag.

²⁸Watfag inap itano misig unuk Agabus ino Allah hime fanowon ubam weregma fulu ane turuk lit kinangma tuma suburu obok humon lahaku ulug hiyag isibag. Hiyag isibag ane ari Klaudius ap suwon Kaisar lahapfag li suburu obok ino lahibag.

²⁹Suburu obok ino lahibagma wene holtuk latfag inaben nonori Yudea werehon fahet niren ler isahuk ulug enele sahale fibareg ininggikmu su roho werehonen su roho emberukmu ininggikmu tot werehonen tor angge emberuk latfag.

³⁰Palu roho imbibareg penatua Yudea werehon ininggikmu og isa lalihip ulug Saulus men Barnabas men mon enepfag.