Read Angguruk Yali KISAH RASUL-RASUL 12 Bible Online

KISAH RASUL-RASUL 12 - Angguruk Yali bible

KISAH RASUL-RASUL 12

¹Welatfagma ap suwon Herodes inowen[3] wene holtuk inap sen enebuhukteg unusuhuk peruk latfag.

²Ari peruk latfareg Yohanes owe Yakobus ino karog fam kong toho ware fisibag.

³Ware fisibag ane fahet Yahudi inaben fano ulug enehiyeg harukmu yer isibareg Petrus eke senetfag. Petrus senetfag sul ari o Paskah suburu roti sig elehon naruk sul ino senetfag.

⁴Petrus senetfareg penjara kilaptuk lit sehen seneg inap nisanggo fumahen unubam hit uhan heheg sok wal taneg kahaleg lamuhup ulug hiyag isibag. Wam Paskah nahup sambil likiyamon ap anggolo iniline ware fesuhuk ulug penjara kilapfag.

⁵Petrus ino penjara weregma wene holtuk inap arimanowen likiya hupmu at fahet sembahyang uruk latfag.

⁶Herodesen sono ap anggolo iniline Petrus wabuhuk peruk lit weregma Petrus ino fahet sehen seneg inap piren itano misihon fumag fil misihon fumag fil weregma hele ineyon piren fam pug tegma pulmu nohoruk latfag. Sehen seneg inap winon selma wereg lit sokolma kahaleg latfag.

⁷Kahaleg lit weregman malaikat Ninikni Allahn monde fibahon ino Petrus wereg ambeg kibareg asinandi umbagpag turuk latfag. Umbagpag turuk lit malaikat inowen Petrus umbantumu kik haruk lit elel hibareg, ”Folo-folo in amin,” ibagma in atukmen hele inggik wareg latfahon ino loloho wambibag.

⁸Loloho wambibagma malaikat inowen, ”Sum wan timihinteg huyug sepatu kilabin,” ibagma sum wan tibareg sepatu kilapfag. Kilapfagma, ”Sum sun fahet wan turuk asum wan timihinmu an min ambiyeg lulen ma,” ibag.

⁹Ibagma malaikat ombolim wilip atug laruk lit Petrus inowen te, ”We tem malaikat wahareg lol nabehek,” undaman puk fug angge nei waruk lahi ano peruk lit malaikat ombolim libag.

¹⁰Ombolim laruk lit sehen seneg inap sok tamon fam kahaleg latfahon pisan isalug fobikon kahaleg latfahon pisan isalug sok ineyon o pumbuk fil larukon iraham watfag. Iraham watfareg turukmen sok ino amu husoho libag. Husoho libagma wilip atug laruk lit ke handuhal teg ambeg libareg malaikat inowen Petrus embeselug libag.

¹¹Malaikat ino libagma Petrus indi anggar atfareg, ”Yahudi inaben nuwabuhuk peruk lit wereg angge famen Allahn malaikat monde fehekma Herodes inggikmu angge Ninikni Allahn lisoho og nabehekma ketiya tem toho noluk aha,” ibag.

¹²Ari ibareg wenggel haruk lit Yohanes unuk eke Markus isinga Maria ibam libag. O ino ap anggolo palu roho wereg lit sembahyang uruk latfag.

¹³O ino libareg sok kik hibagma san kik turuk ulug Maria amingmingangge hiyap unuk Rode inowen ha watfag.

¹⁴Ha watfareg Petrus ele urukmu hol hibareg sok husuk fug anggeyen embeselug ahiyeg toho o ele fil libareg, ”Petrus selma wereg,” ulug ap palu roho welatfahon unubam hiyag isibag.

¹⁵Hiyag isibagma iren te, ”Hat nenek turuk lit uruk lahen,” il larikim aren te, ”We tem toho,” il larikim iren te, ”Ahime wahayon fahet uruk lahen lit teg,” uruk latfag.

¹⁶Enele ari uruk lit weregman Petrus sok kik turuk eneg latfagma watfareg sok hut harukmen Petrus unduhuk latfagma enekol hibag.

¹⁷Enekol hibagma Petrusen henele ulug inggik kaya ribareg, ”Ninikni Allahn o penjara malaikat monde fehekma wilip nabehekma wahi,” ulug hiyag isibag. ”Hiyag hisihi ane ari Yakobus men nonori winon men hiyag isalihip,” ibareg wilip atlug o ekema libag.

¹⁸Likiyamon te sehen seneg inap arimanowen Petrus nangginoho wilip aha ulug yuk libareg enekolen turuk latfag.

¹⁹Enekolen turuk lit weregma Herodes inowen Petrus hondohik lalihip ulug amingmingangge mon enepfagma larukmen Petrus eleg latfag. Eleg latfagma sehen seneg inap arimano kapal isarukmen nenepeleg ibagma it arimano pinggi unusibag. Unusibareg Herodes ino o Yudea embeselug o Kaisarea libareg welatfag.

²⁰Herodes inowen Tirus inap men Sidon inap men fahet olok haruken it mangno roho ubam nenele ul ulug ambeg libag. Ambeg libareg hun Blastus Herodes anggengge foroho ahun ino ubam enele ibareg at men mangno atfareg Herodes fam, ”Nit o pumbuk piren aruma suburu elehen haren suburu og nisaruk lahenma fano welahe angge re nunubam holok ane peruk lahenon imbisin,” ulug heng tibag.

²¹Heng tibagma Herodesen nele hunubam uhuk ulug sali ibag. Sali ibag sambil ino hikir atfagma ap suwonen wan turuk asum wan tibareg aliliyangge lahapfareg ap suwon hur atuk ambeg lehoma hur arik lahibareg it unubam ele ibag.

²²Ele urukmu holeg latfag inap arimanowen, ”Ari ap ele uruk eleg, we Allah ele uruk,” uruk latfag.

²³Ari uruk latfagma Ninikni Allahn an wirim naptuk ulug olok hibareg malaikat monde fibagma wambik watfareg watukmu ilaliyen undamangge naruk lit war atfag.

²⁴Welatfagma Allah wene su atfagma ap anggolowen wene fano ulug holtuk latfag.

²⁵Barnabas men Saulus men itano iren walug libag angge arimano og isibareg Yerusalemen suhuloho waharuk lit Yohanes unuk eke Markus ino hondoholug watfag.