Read Angguruk Yali KISAH RASUL-RASUL 14 Bible Online

KISAH RASUL-RASUL 14 - Angguruk Yali bible

KISAH RASUL-RASUL 14

¹Paulus men Barnabas men o Ikonium libareg Yahudi inaben wene uruk ibam kibareg wene enele ine roho hiyag isarukmu Yahudi inap men Yunani inap anggolo men tem toho hiyag nisaruk ulug inindi wenggel haruk latfag.

²Yahudi inap winon enele si hiyag nisaruk pibahon arimanowen Paulus men Barnabas menen uruk ane ari siyag ulug Allah unuk enepeleg inap inindi kahal eneptuk latfag.

³Kahal eneptuk latfag angge famen Paulus men Barnabas men Ninikni Allahn nit fet nenesug ulug wene enembong se roho hiyag isaruk lit we tot amusun toho o ino welatfag. ”Allah ap kinangma werehon indi enesug lit wereg,” ulug hiyag isarukmu Allahn enele ineyap tibag. Poholmonen turuk ane iren turuk lamuhup ulug inine og isibag.

⁴Ap o pumbuk ino welatfag inap arimano pul ke minggitfareg fumag Yahudi inap inibil atfagma fumag Yesus otsi inibil atfag.

⁵Inibil atfagma Allah unuk enepeleg inap men Yahudi inap men it onowesi men arimano palu ribareg ngik-ngog toho per eneptuk lit helep fam unusul ulug turukmen

⁶Paulus men Barnabas men itano onoluk atfagma o inowen hirag-hirag wilip atuk lit o Likaonia libareg Likaonia kinang ino fam o pumbuk Listra men Derbe men libag.

⁷Libareg o pumbuk itano fam ap welatfahon wene hiyag isaruk latfag.

⁸O Listra ino ap misig siyahon isingan uyug siyag angge indag tibagma in am fug angge heriyeg lit eneg welatfag.

⁹Paulusen wene hiyag isarukmu ap inowen hol hibareg an nuyug fanowap napmisi pibag ane Paulusen at yet hibareg oluk atfag.

¹⁰Oluk atfagma Paulusen ele ine roho ap ino fam, ”Huyug ine roho in amin,” ibagma ap ino in atfareg la reg latfag.

¹¹La reg latfagma Paulusen nangginoho tehek ulug ap arimanowen yet hibareg Likaonia inap enele roho hi roho uruk lit, ”Poholma wereg angge ap ahasareg kinangma wambik waharuk lit turuk,” uruk latfag.

¹²Uruk latfareg Barnabas fahet, ”Zeus tu,” il laruk lit Paulus fahet at ele anggolo uruk ulug, ”Hermes tu,” uruk lit poholmon ununuk hag toho ulug suwal enepfag.

¹³Suwal enepfagma Zeus alem seneg ahun usa ahun ino usa ibam o pumbuk ino sel fil anggenma wiroho weregma wereg latfag ahun inowen hol hibareg wam sapi yuhambukon eneg wibareg owil-owil angge lahap enepfareg Zeus isag utuk lit hubu lahabul ulug ap anggolo men elehet ohowon sok iraham waharuk latfag.

¹⁴Barnabas men Paulus menen waharuk urukon hol hibareg enesum wan teg latfahon tararag toho hik isibareg ap anggolo sehelimu hik toho kibareg enele hi roho uruk lit,

¹⁵”Nori, hiren nungge ane turuk lahep? Hit men nit men ap kinangmon welahe. Hiren siyag ane turuk lahebon aru umbusuhupteg Allah oluk werehon ino pohol kinang ik mun angge man angge wal tibahon ino fam hinindi wenggel hahuben niren hiyag husuk oho waharukuk.

¹⁶Atam welatukuk li Ninikni Allah inowen ap obog tohowen usa ane wal taneg turuk lamag ulug embeserisi angge famen

¹⁷kinang seiyap tukag ulug osit poholman pilabik waharuk lit hiraho latisi fug. Ninikni inowen eneg suburu og nisaruk lit ninindi nenehiyehap neneptuk latisi,” ulug hiyag isibag.

¹⁸Ari ulug hiyag isibag angge famen Paulus ele sobir isaruk lit enele abi roho uruk lit isag husul ibag angge famen Paulusen ari imbisiyek ibagma imbisibag.

¹⁹Weregman Yahudi inap o Antiokhia men o Ikonium men welatfahon arimano mug eneplug o Listra libareg Listra inap inindi kahal eneptuk lit nit ninibil amiyek ulug hiyag isaruk latfag. Hiyag isibareg Paulus helep fam ware fisibareg pinggi ware fesehe ulug lisoho elehet sel fil hik isa libag.

²⁰Hik isa libagma ori walinggoho unduhuk lit weregma Paulus in atfareg nin suhuloho o ino kibareg noholug likiyamon Barnabas men ambiyeg o Derbe libag.

²¹O Derbe libareg Paulus men Barnabas men ap arimano wene hiyag isarukmu wene holtuk inap ap anggolo atuk latfag. Anggolo atuk latfagma nin suhuloho o Listra keyen tulug Ikonium keyen tulug o Antiokhia Pisidia kinang fam watfag.

²²O Antiokhia ino watfareg wene holtuk inap hinindi wirik toho welamuhup ulug komo eneptuk lit inindi yuwahap enepfag. Inindi seyap eneptuk lit ap kinangmonen anggolo nunusuruk lamuhubon ari famen Allah wereg ambeg ngi amuhuk ulug hiyag isibag.

²³Wene holtuk inap wereg ambeg penatua wal taneg in enebil laruk lit, ”Nonowe Yesus fam wenggel haruk lahepma Aren hit fet henesug laruhu,” ulug suburu na fug angge wereg lit it fahet sembahyang ibag.

²⁴Sembahyang ibareg wilip atug waharuk lit Pisidia keyen tulug Pamfilia watfag.

²⁵Pamfilia watfareg o pumbuk Perga ap wene hiyag isalug o Atalia ik laut ayegma watfareg

²⁶ik ahum keyen o Antiokhia watfag. O Antiokhia ino wene hiyag isil lahup ulug ak turuk lit Allah indiyen fet henesug laruhu ulug sembahyang unubahet ibag ambeg ino ap anggolo hiyag isarukuk ulug suhuloho watfag.

²⁷Watfareg wene holtuk inap palu enepfareg hiyag isaruk lit Allahn let neneptukmu turukuk ane re Allah unuk enepeleg inap fahet Allahn sok hur isarisimu ir oho ubam tem toho wenggel haruk ulug hiyag isaruk latfag.

²⁸Hiyag isaruk latfareg o ino wene holtuk inap men ambiyeg weregman amusun toho welatfag.