Read Angguruk Yali KISAH RASUL-RASUL 15 Bible Online

KISAH RASUL-RASUL 15 - Angguruk Yali bible

KISAH RASUL-RASUL 15

¹Welatfagma wene holtuk inap winon o Yudean o Antiokhia libareg it Antiokhia inap wene holtukon arimano hiyag isaruk lit, ”Musan haharoho imbibahon hikit toho ambilahap pal henebuhup fug halug Allahn fanowap henebuhu fug,” ulug hiyag isibag.

²Hiyag isibagma Paulus men Barnabas men enele ine roho uruk lit, ”Hiren uruk lahebon ari si ane uruk lahep,” ulug suwahal uruk latfag. Suwahal uruk latfareg hili roho wereg lit, ”Paulus men Barnabas men wene holtuk inap winon men o Yerusalem Yesus otsi men penatua men alem ari fahet henele uhuben lalihip,” ulug mon enepfag.

³Onori wene holtukon arimanowen o pumbuk inowen hondoko wilip enepfagma Fenisia keyen Samaria keyen laruk lit o pumbuk winon Allah unuk enepeleg angge famen fano holtusa ulug hiyag isil laruk latfagma onoriyen hol hibareg it wene enepeleg inap oho holtusa ulug enehiyeg anggolo haruk latfag.

⁴O Yerusalem libagma Yesus otsi wene holtuk inap men penatua men welatfahon arimanowen it libahon itano hondoko kilap enepfagma iren hiyag isaruk lit, ”Allahn nit let neneptukmu niren Allah unuk enepeleg inap hiyag isarukukmu holtusa,” ulug hiyag isibag.

⁵Hiyag isibagma Farisi inap famen wene holfag inap arimano in atfareg enele uruk lit, ”Yahudi inap fuhon famen enemu inap werehon arimano oho ambilahap pal enebuhupmu Musan haharoho imbibahon arimano obog toho iren oho turuk lamuhuben hiyag isaruk lamuhup,” ibag.

⁶Ari ibagma Yesus otsi men penatua men arimano palu atfareg alem ari fahet enele sahaltuk latfag.

⁷Enele sahaltuk lit suwahal ibareg Petrus ino it sehelimu in atfareg ele uruk lit, ”Nori, Allah unuk enepeleg inap an nele famen wene holuhupteg tem toho pukag ulug indam welatukuk li hit sehelimuwen Allahn an mumal naptisiyon ari hit honoluk.

⁸Allah ap inindimu wenggeltuk ane oluk ahun inowen ahime fanowon nit og nisarisi hag toho ir oho og isaruk lit numalikisi amag ulug perisi ane nit nonoluk atisi.

⁹Iren inindimu we tem wenggel harusama inindi fanowap eneptisireg it enemu nit nenemu puk fug angge ambi roho welamag perisi.

¹⁰Allahn ambi roho welamag perisi angge famen hiren Allah wal haruk lit anggin angge nikni numban oho niren oho ha rurukuk fuhon hiren nungge fahet it unumaloma umbul peruk lahep?

¹¹It arimano Nonowe Yesus Kristus inowen indi enesug lit wereg ane ari famen fano atuk hag toho nir oho indi nenesug ane ariyen eneg fano amuhuk peruk lahe,” ulug hiyag isibag.

¹²Ari ulug hiyag isibagma it ap welatfahon arimano obog toho enele eleg angge welatfagma Paulus men Barnabas menen, ”Allahn nit let neneptukmu Allah unuk enepeleg inap unubam fano ane ari-ari turukuk,” ulug hiyag isaruk latfag.

¹³Obog toho hiyag isibagma Yakobus it sehelimu in atfareg ele uruk lit, ”Nori, nele iminon holeg lamok:

¹⁴Allah unuk enepeleg inap indi enesug lit An nunuk eneg uruk lamuhup ulug atam mumal eneptisi ane Simonen fahe hiyag nesehek.

¹⁵Ehek ane ari atam wene hiyag isaruk latfag inap arimanowen haharoho imbibahon hikit toho hiyag nesehek,

¹⁶’An suhuloho waruhukteg Daud ibam o sabo tandum atisiyon ino wiroho kera fuhuk, ubamangge miyaloho lin-lan irisiyon andog toho keron wiruhuk.

¹⁷Ap obog toho werehonen Ninikni Allah yami ruhup. Allah unuk enepeleg inap Allahn Anden tohon amuhup ulug wol eneptisiyon arimanowen oho At yami ruruk lamuhup.

¹⁸Atam Allahn ari ibagma ketiya teko lahu ulug fag toho hiyag nitisi.’ ulug haharoho imbibag.

¹⁹Ari roho imbibagma ap Allah unuk enepeleg angge famen siyag ane embeselug At ubam inindi wenggel harukon unubam anggin ane umbuhuk fug peruk lahi.

²⁰We wam usa ambohom ulug narukon men pabi ane turukon men wam mep wilip aruhu ulug ambiyang helmako watukmu narukon men mep wilip atukon narukon men ari obog toho turuk lamuhup fug ulug suwesingga it unubahet umbuhuk peruk lahi.

²¹Indam oho Musan haharoho imbibag ane o pumbuk obog tohowen uruk latfagma ketiya oho wene uruk ibamen likiya hupmu uruk,” ulug hiyag isibag.

²²Yakobusen ari ulug hiyag isibagma Yesus otsi men penatua men wene holtuk inap obog toho arimanowen Paulus men Barnabas men ambiyeg o Antiokhia lalusan ap eke yami enebul ulug enele sahalfareg Yudas unuk eke Barsabas men Silas men hiyag enepfareg mon enepfag. It piren hiyag enepfahon itano fahet onoriyen unubabut fano peruk latfag.

²³It piren mon eneptuk lit suwesingga haharoho ininggikmu imbibahon ele re tu, ”Nit Yesus otsi men penatua men hit honori o Yerusalem welaheyon arimanowen hit o Antiokhia Siria Kilikia Allah unuk henepeleg angge famen Aren mumal heneptisiyon fahet nonori ulug suwesingga aru fam hi heneptuk lahe.

²⁴Nonori winon nit nenepelegma hit henembeg waharusareg enele hiyag hisaruk lit hinindi nonghong hisaruk lit angginap heneptusa ane niren holtukuk.

²⁵Ari fahet niren holtukukteg nit nenebe mangno roho wereg lit nenele sahaltukukteg ap piren Barnabas men Paulus men lalihip ulug yami eneptukukteg mon enebik waharuk lahe.

²⁶Barnabas men Paulus men ariyan Nonowe Yesus Kristus unuk fahet fano nunusukag ulug enembong se roho werehen niren it piren fahet ninindi isaruk lahe.

²⁷Nori, ap piren niren mon eneptuk laheyon ariya Yudas men Silas men hit henembeg wamuhupteg suwesingga emberuk laheyon tu fam hiyag hisaruk lit enembilik fam oho sebe roho hiyag hisahup.

²⁸Alem angginon hunubam umbuhuk fug ulug Allah hime fanowon nit nunubam wereg lit let neneptukmu nenele sahalehereg suwesingga tu fam emberuk lahe.

²⁹We wam usa ambohom ulug narukon men mep wilip atukon narukon men wam mep wilip aruhu ulug ambiyang helmako watukmu narukon men pabi ane turukon men ari obog toho turuk lamuhup fug. Siyag ane eheyon ari turuk lamuhup fugmu hit fano welamuhup. Nori, we ita hiyag hesehe.”

³⁰Fano lalihip ulug hi enepfagma it mon enepfahon itano o Antiokhia libareg Yudas men Silas menen wene holtuk inap palu enepfareg suwesingga ino og isibag.

³¹Og isibagma kim hibareg fano ane komo neneptusa ulug enehiyeg hibag.

³²Yudas men Silas men nei waruk lit fulu roho turuk inap nabi hag toho ap arimano komo eneptuk lit inindi yuwahap enebil noruk latfag.

³³It piren itano wene hiyag isaruk lit o Antiokhia welatfagma onoriyen hinindi fano roho mon henebik waharusa inap enembeg nin lalihip ulug hi eneptuk lit hiyag isibag.

³⁴Lalihip ibag angge famen Silas inowen an hit men ambiyeg welamuhuk ibareg pok atfag.

³⁵Paulus men Barnabas men itano o Antiokhia tot welatfareg it men ap winon men ambiyeg wene hiyag isaruk latfag.

³⁶Welatfareg Paulusen Barnabas ubam ele uruk lit, ”Niren nonori atam wene hiyag isaruk latukukon arimano nangginoho wereg ulug o pumbuk wal taneg pen isa lahuk,” ibag.

³⁷Ari ibagma Barnabas inowen nenere Yohanes unuk eke Markus urukon ino oho ambiyeg lulen hondohik lul ibagma

³⁸Paulusen ele haro roho uruk lit, ”Hun ari nit men ambiyeg laruk ane nirim irisireg o Pamfilia pok atisi ahun ino hondohik lul fug,” ibag.

³⁹Ari ibagma Barnabas men Paulus men suwahal onolok toho ibareg enemu-enemu atfareg Barnabas inowen Markus hondoholug kou fam ik ahum keyen Siprus nindig atfag.

⁴⁰Paulus inowen oho Silas hondog talug lamin ibagma onoriyen te Ninikni Allah inggik ineyon inowen fet henesug laruhu ulug unubam sembahyang ibagma

⁴¹wilip atfareg o Siria keyen Kilikia laruk lit wene holtuk inap welatfahon inindi yuwahap enebil laruk latfag.