Read Angguruk Yali KISAH RASUL-RASUL 16 Bible Online

KISAH RASUL-RASUL 16 - Angguruk Yali bible

KISAH RASUL-RASUL 16

¹Laruk latfareg Paulus ino Derbe keyen Listra libag. Weregman o pumbuk ino fam wene holtuk ahun misig unuk Timotius isinga Yahudi hiyap Yesus fam indi wenggel harukon welatfagma ikni Yunani ahunen ondohowon welatfag.

²Wene holtuk inap Listra men Ikonium men welatfahon arimanowen Timotius fahet ubabut fano peruk latfagma

³Paulusen te an men ambiyeg lahuk pibag. Timotius ino ikni Yunani ahun ulug ap obog toho onoluk teg latfagma Yahudi inap o pumbuk ino welatfahon arimanowen at fahet inindi fano pukag ulug ambilahap paliyek ulug Paulusen hiyag isibag.

⁴Paulus men Silas men o pumbuk arimano obog toho eke la eke la turuk lit Yesus otsi men penatua men Yerusalem welatfahon arimanowen enele imbibahon ino hikit toho wene holtuk inaben turuk hag toho turuk lamuhup ulug hiyag isil laruk latfag.

⁵Hiyag isil laruk latfagma wene holtuk inap inindi wirik atuk lit Yesus ubam wenggel harukon anggolo atuk latfag.

⁶Paulus men Silas men larukmen Allah hime fanowon inowen Asia inap wene hiyag isa fug ulug hili palfagma o Frigia men Galatia men o itano keyen libag.

⁷O Misia libareg o Bitinia lul ulug turukmen Yesus ahime fanowon inowen lalihip fug ulug hili palfag.

⁸O Misia embeselug o Troas libag.

⁹Troas libareg Paulus hubanggo nohoruk lit nei og harukmen ap Makedonia ahun misig unduhukmu yet hibag. Yet hibagma ap inowen te, ”Nit Makedonia ninap let nenebuhunen ik paloho nindihig waruhun,” urukmu nei og hibag.

¹⁰Paulusen nei og hibagma o Makedonia wene hiyag isa lahup ulug Allahn hiyag nisaruk lit wol nenebehek peruk uwareg o Makedonia nindig amul ulug kou ke fam lul peruk lit yami ruruk latuk uwag.

¹¹Kou ino hiyaharuk uwareg o Troas embeselug ik ahum keyen Samotrake luwag. Noholug likiyamon Neapolis keyen tulug

¹²o Filipi luwag. O Filipi pumbuk humon ino Makedonia kinang famen Roma inap tam watfareg wit tibahon welatfag. O pumbuk ino fam pirenam hinahanam welatuk uwag.

¹³Yahudi inap wene uruk sambil elehet sok sel fil larukon ino famen wilip atuk uwareg Yahudi inap sembahyang uruk lit ik ayegma wereg ano ulug yami enebik lul peruk uwag. Peruk uwareg larukmen hiyap eneg enemu palu roho welatfagma hur atuk uwareg unubam nenele uruk latuk uwag.

¹⁴Wene hiyag isarukmen hiyap misig unuk Lidia ino it sehelimu wereg lit niren hiyag isarukon holtuk latfag. Lidia ino Tiatira hiyap wereg lit sum fanowon onggo paltug ap fam ayeg watuk latfag hiyap ino Allah unuk fahet akol toho welatfag. Paulusen wene hiyag isarukmu Allahn hiyap ino indi anggarap tibagma wene fano holtuk latfag.

¹⁵Fano holtuk latfagma at men at ibam werehon men obog toho ikma pilap eneptuk uwagma aren ele hiyag nisaruk lit, ”Hiren an fahet Ninikni Allah fam tem toho wenggel haruk peruk lahep halug an men ambiyeg welamuhuk,” ulug ele ine roho hondoko kilap nenepfag.

¹⁶Misihim sembahyang uruk ambeg lul ulug larukmen hiyap misig nei fulu roho waruk hiyap kema salkal uruk uwag. Hiyap ino iknisi ap suwon enemingmingangge roho wereg lit aren nei fulu roho warukon fahet onggo anggolo iknisi og isaruk latfag.

¹⁷Hiyap ino salkal uruk uwareg nit Paulus men nonombolim mug neneptug waharuk lit ele hi roho, ”Ap aruma Allah palimu werehon amingmingangge wereg lit wene ap fanowap eneptukon hiyag hisaruk inap itano waharuk,” ulug ele il waharuk latfag.

¹⁸Ele uruk latfag ane ari likiya hupmu uruk enehen Paulus ino hondo ha fug ane turuken hebeloho hiyap ino kim hibareg siyag angge undama werehon ino fam ele uruk lit, ”Yesus Kristus unuk fam hiyap aru ubam siyag angge welahenon wilip amin,” ibagma siyag angge ino hiyap ino famen wilip atfag.

¹⁹Siyag angge ino hiyap ino famen wilip atfagma ketiya onggo og nisa fug teg ulug hiyap ino iknisiyen yet hibareg Paulus men Silas men itano sen enepfareg ininggik lisoho pasar waruk keyen hondog eneplug ap suwon weregma libag.

²⁰Ap suwon wereg ambeg hondog eneplug libareg enele hiyag isaruk lit, ”Ap ariyan nit Filipi ninap ninindi siyahap neneptuk. It Yahudi inap werehon aruman

²¹iren hiyag nisarukon ari nit Roma ninaben hol ha fug teg lahe, iren uruk ane hikit toho niren tehe ha fug teg,” ulug hiyag isibag.

²²Hiyag isibagma ap anggolo arimanowen oho ninirim urukmu ap suwon o pumbuk ino fam welatfahon arimanowen enesum tararag toho hik isalihipteg unusilihip ulug sehen seneg inap arimano hiyag isibag.

²³Hiyag isibagma anggolo unusibareg it itano penjara fam kilap enepfareg penjara foroho ahun ino fam, ”Hine roho fer enesug laruhun,” ulug hiyag itfag.

²⁴Ari ulug hiyag itfagma penjara foroho ahun inowen it piren hili pik pulmuwon fam kilap enepfareg e suwon fo rehon fam unuyug kila fisil-laruk lit pug tibisibag.

²⁵Pug tibisibareg weregman hup humanoho Paulus men Silas men itanowen Allah fam sembahyang ibareg Allah sini yunggultuk latfagma ap winon o ino hele waroho welatfahon arimanowen hol isibag.

²⁶Hol isibareg weregman o mek humon misig turuk lit hibareg pila fahet helep uwag witfahon arimano yuk turuk lit sok arimano amu husoho libagma unuyug hele pug teg latfahon arimano oho amu loloho libag.

²⁷Penjara foroho latfag ahun ino o mek ino fahet lagmag in atfareg yet harukmen sok arimano obog toho husig latfagma ap hele wareg werehon arimano wilip ahasa ulug akolen karog wibareg inggareg wat tamin ulug turuk latfag.

²⁸Ari turuk latfagma Paulusen ele hi roho uruk lit, ”Nare, nit obog toho tuma fano welahereg karog fam hinggareg wat ta fug,” ibag.

²⁹Ari ibagma penjara foroho ahun inowen iral og nirik maniyek ulug heng enepfareg o ino fam kibareg uwag elek turuk lit Paulus men Silas men enelukema elenggen fam hur atfag.

³⁰Hur atfareg Paulus men Silas men selma hondog eneplug wilip atfareg kapal isaruk lit, ”Niknisi, Allahn fanowap nabuhuwen anden nungge ane turuk laruhuk,” ulug kapal isibagma

³¹iren hebeloho at hiyag utuk lit, ”Nonowe Yesus Kristus fam hindi wenggel haruk laruhunmu hat men hori hibam werehon arimano men fano amuhup,” ibag.

³²Ari ibareg at men otsi ibam werehon obog toho arimano Allah wene hiyag isaruk latfag.

³³Hiyag isaruk latfagma penjara foroho latfag ahun inowen hubanggo itano ibam hondog eneplug libareg it piren unusibag ke arimano ik umag enepfag. Ik umag enepfagma at uhe umalikisi ibam werehon men ikma pilap neneplihip ulug heng enepfagma ikma pilap enepfag.

³⁴Ikma pilap enepfagma it piren hondog eneplug ibam libareg suburu isag isibareg wereg lit at men otsi ibam werehon arimanowen nit Allah umalikisi ahe ulug enehiyeg anggolo haruk latfag.

³⁵Likiyamon te ap suwon o pumbuk welatfahon arimano enemingmingangge mon eneptuk lit, ”Ap penjara foroho ahun ino ambeg lalihipteg ap piren sono hele waroho kilap eneptukukon wilip enepmisiyen hiyag irik lalihip,” ulug mon enepfag.

³⁶Mon enepfag inap libareg penjara foroho ahun hiyag itfagma at inowen Paulus fam ele uruk lit, ”Niniknisi ap suwon arimanowen wilip amag ehesama nori, we fano lalihip,” ulug hiyag isibag.

³⁷Hiyag isibagma Paulusen ap arimano fam, ”Nir oho Roma ninap welahe angge famen alem elegman kapal nisa fug anggeyen ap anggolo onolohotman nunusurusareg penjara fam kilap neneptusa angge famen ketiya nungge fahet hirako hag toho lalihip ehesa? Nit hirako hag toho wilip amul fug, it ininggareg wamusareg wilip nenebusa,” ibag.

³⁸Ari ibagma enemingmingangge mon enepfahon arimano Paulusen ibag ane iniknisi hiyag isa watfagma hol harukmen Paulus men Silas men Roma inap ibahon holfareg it enekol hibag.

³⁹Enekol hibareg it ap suwon arimano Paulus men Silas men enembeg libareg enele fano roho uruk lit penjara famen hondog eneplug wilip enepfareg, ”Nori, o aru embeselug wilip atihip,” ibag.

⁴⁰Ari ulug hiyag isibagma it piren penjara famen wilip atfareg hiyap Lidia ino ibam libag. Libareg onori wene holtuk inap inindi yuwahap enepfareg it piren itano laruk latfag.