Read Angguruk Yali KISAH RASUL-RASUL 17 Bible Online

KISAH RASUL-RASUL 17 - Angguruk Yali bible

KISAH RASUL-RASUL 17

¹Paulus men Silas men Amfipolis keyen Apolonia keyen tulug o Tesalonika libag. O ino Yahudi inaben wene uruk ibam eke wirig latfag.

²Paulus inowen winama oho turuk latfag hag toho o ino oho wene uruk ibam kibareg wene atam haharoho imbibahon fahet hiyag isaruk latfag. Yahudi inap sembahyang uruk sambil hari Sabat hinahan fam wene hiyag isaruk latfag.

³Hiyag isaruk lit, ”Mesias waruhu ibahon ino Allahn pibag ane roho aben ele ying turuk lit wabuhupmu ap war atukon wereg ambehen olukap tuhu,” ulug hiyag isaruk lit, ”Anden hit hunubam Yesus ino fahet hiyag hisaruk lahiyon ino Mesias watfag,” ulug hiyag isaruk latfag.

⁴Ari ulug hiyag isaruk latfagma ap winon arimano oho inindi anggar atfagma Paulus men Silas men mangno atuk latfareg Yunani inap Allah fahet enekol toho welatfahon oho hiyap suwon Yunani hiyap onowesi welatfahon oho anggolo mangno atuk latfag.

⁵Anggolo mangno atuk latfagma Yahudi inap inindi onolok atfareg siyag ane turuk lit inahan ane turuk latfag inap men ambingga roho iniyabuk wit ta fug angge wereg inap men ngik-ngog turuk latihip ulug Yahudi inaben mingming enepfag. Mingming enepfagma mangno atuk lit ngik-ngog hum toho uruk latfag. Paulus men Silas men itano ap suwon enele uruk ambeg hondog eneplug lul ulug Yason ibam ngik-ngog toho waling isa libag.

⁶Libareg kim isarukmen it piren eleg latfagma Yason men wene holtuk latfag inap winon men sen enepfareg ininggik kililim-kililim lir eneplug ap suwon weregma og eneptug libag. Og eneptug libareg enele hi roho uruk lit, ”Kinang atogman atogma siyahap turuk inap tuma waharusama

⁷hun Yason aruwen ibam hondoko kilap eneptisi. It arimanowen Kaisar ele apmayap turuk. Ap suwon te Kaisar fug, ap winon unuk Yesus ino ap suwon wereg ulug ap itan hiyag isaruk,” uruk latfag.

⁸Ari ibagma ap anggolo arimano men onowesi suwon menen hol hibareg inindimu onolok hibareg

⁹Yason men wene holtuk inap itano unubam te, ”Uang anggolo og nisalihipteg eneg hinibam lalihip,” ulug ap suwonen heng enepfagma og isibagma hinibam lalihip ulug wilip enepfag.

¹⁰Wilip enepfag sambil ino hubanggo onori Paulus men Silas men unubam lalihip ibagma it itano o Berea libag. O Berea ino wereg lit Yahudi inaben sembahyang uruk ibam libag.

¹¹Yahudi inap o Tesalonika welatfahon arimano inindi onolok teg latfag angge famen Berea welatfahon arimano inindi fano reg lit enesukun fano roho Allah wene holtuk latfag. Wene holtuk lit Paulusen hiyag nisaruk awene aru tem toho hiyag nisaruk ano ulug likiya hupmu wene atam haharoho imbibahon fam yami ruruk latfag.

¹²Yami ruruk lit ap anggolo arimano Yesus fam tem toho wenggel harikim Yunani inap onowesi roho welatfahon arimanowen oho hiyabet abet it enebe anggolowen wenggel haruk latfag.

¹³Paulusen o Berea inap Allah wene hiyag isaruk urukon o Tesalonika Yahudi inap welatfahon arimanowen hol hibareg onoluk atfagma mug eneplug libareg Berea inap inindi kahal eneptuk lit onolokap eneptuk latfag.

¹⁴Onolokap eneptuk latfagma onoriyen Paulus lamihin ulug ik ayegma monde fik libagma Silas men Timotius men o Berea ino pok atfag.

¹⁵Hun Paulus ino oriyen hondoholug o Atena imbisik libareg suhuloho waharukmu Silas men Timotius men folo-folo nombolim wamag ulug hiyag isibag.

¹⁶O Atena ino libareg Silas men Timotius men nangno enesug lit o pumbuk ino usangge anggolo weregma kim hibareg indi anggin atfag.

¹⁷Indi anggin atfareg Yahudi inap men Allah fahet enekol toho welatfahon arimano men wene uruk ibamen enele sahalik kuruk latfareg o sili ke welatfahon arimano likiya hupmu hiyag isaruk latfag.

¹⁸Hiyag isarukmen mun ane man ane alem onoluk inap itano ununggul unuk Epikuros men Stoa men itanowen Paulus men enele sahaltuk latfareg it-it enele uruk lit, ”Hun tu ele sibiling-sibiling ane uruken nungge ane hiyag nisamisi,” uruk latfagma it winon arimanowen, ”Pog ahun tu waharisireg umbusagsiyen wal tibag ane hiyag nisaruk lit teg,” uruk latfag. Paulusen Yesus wene men olukap tibag ane men hiyag isibag ane fahet ari uruk latfag.

¹⁹Ari uruk latfareg Paulus ino Areopagus silimu hondoholug libareg, ”Haren alem keron uruk lahenon tu nir oho nonoluk atmisiyen sebe roho hiyag nisimin,

²⁰nik ane inamap turuk lahenon nit hol hulen hiyag nisimin,” uruk latfag.

²¹O Atena welatfag inap men ap pohon men arimano wina ane tuk fug angge we alem keron eneg enehiyeg toho holtuk latfag inap welatfag.

²²Welatfagma Paulus ino Areopagus silimu ino in atfareg ele uruk lit, ”Atena hinap nori, hiniknisi unumbusagsiyen turuk latfag hag toho hiren oho nit fahet palimu wereg peruk lahebon ununuk fano leho ferukmu anden yet hisaruk lahi.

²³An hit hinibam aru walinggoho laruk lit yet harikikon hiren palimu wereg peruk lahebon arimano fahet inibam usa ibam witikibon harikik. O winon arimano ununuk weregma harikik angge famen we misig eneg te ’Unuk nenepelehon’ suwaloho hahare ferikibon harikik. Hiren unuk henepeleg angge famen leho feruk lahebon ino fahet anden ketiya hiyag hisamin.

²⁴Allahn kinangma werehon mun angge man angge wal tibahon ino pohol ha kinang ha seneg lit werehon ino ap kinangmonen usa ibam witukon fam At welam fug teg.

²⁵Aren mun angge man angge ap obog toho og isaruk lit sat kilap eneptuk lit fanowap eneptuk lit werehen Aren ninggikmu nungge-nungge eleg ulug ap kinangmon unubam og netep peruk eleg.

²⁶Ap misig wal tibareg at ino famen ap kinangma werehon obog toho wereg atfagma inibam hili wal taneg imbibareg noenam welamuhupteg eleg amuhup ulug Aren hili imbibag.

²⁷Nit ap kinangmon nunumbahalug yatma wereg eleg angge famen An yami nabuhupteg hiyag naptuk lit nubam inindi wenggel niyaruk lamuhup peruk.

²⁸Ninikni Allah ino famen eneg nit nenebe nonoluk fano wereg lit ninine werehen lebe ruruk lahe. Ari hag toho sini alem wiliptuk inap hit sehelimu werehonen enesini yunggultuk lit, ’Nit ap kinangmon welaheyon aruma poholma werehonen indag nenepfag,’ urusa.

²⁹Nit welaheyon aruma poholma werehonen indag nenepfagma ili ruruk angge men fano-fano angge men helep famen ininggik fano inaben laltusa angge arimano At poholma werehon ino men wirim tuk fug teg.

³⁰Allah unuk enepeleg toho wereg lit turuk latusa ane ari Aren ambolma emberisireg ketiya ap obog toho kema-kema werehonen siyag ane ari umbusuhup ulug hiyag isaruk.

³¹Ap obog toho kinangma werehon unubam unggum werehon misihim Anden pikit toho kong tuhuk ulug sali imbibag. Tuhu ane ari ap misihen unggum kong tuhu ulug At ino unduhuk fibag. Unduhuk ferik iyahon tu fahet ap obog tohowen onoluk amag ulug ap warehon wereg ambehen ketiya olukap tirisi,” ulug hiyag isibag.

³²Ari ulug hiyag isibagma ap welatfahon arimanowen ap war atukon onoluk atuk ane fahet hiyag isarukmu hol hibareg it winonen pulup turukmu it winonen te, ”Eke sambil oho ari hag toho eneg hiyag nisarukmu holuhuk,” uruk latfag.

³³Ari uruk latfagma Paulus ino it embeselug libagma

³⁴ap piren hinahan Paulus men mangno atfareg inindi fano roho wenggel haruk latfag. It wenggel haruk latfahon ununuk te misig Dionisius Areopagus sili palu atfag inap arimano onowe misig men hiyap unuk Damaris misig men ap winon eke it men ambiyeg welatfag.