Read Angguruk Yali KISAH RASUL-RASUL 2 Bible Online

KISAH RASUL-RASUL 2 - Angguruk Yali bible

KISAH RASUL-RASUL 2

¹Yahudi inaben roti sig elehon naruk latfag sali hup teng piren 50 welatfag sul ino[1] horog atfagma Yesus ubam wenggel haruk latfahon arimano misigmu palu roho wereg latfag.

²Palu roho weregman pohol filen siyelu aplohok humon hag toho watfareg o it welatfag ambeg ino fu ruruk latfag.

³Fu rurukmu ap arimano ununggul wal taneg indok ambulpul hag angge weregma mililang turuk latfag.

⁴Allah hime fanowon indok ambulpul hahon ino unubam atfagma hime fanowon inowen onolukap enepfag hag toho enele amu-amuwon fam wal taneg hiyag isaruk latfag.

⁵Ari tibag sambil ino Yahudi inap Allah fam wenggel haruk inap yali fil welatfahon hubula fil welatfahon indit-indit werehon o Yerusalem tam watfareg yug toho welatfag.

⁶Siyelu aplohok humon ino hol hibareg ap anggolo palu arik watfareg hol harukmen Yesus otsi arimanowen hiyag nisarukon nit nenele wal taneg wereg angge famen holtuk laheyon arimano nangginoho uruk ulug inindi su atfag.

⁷Yuk lagmag ibareg yihi uruk lit, ”It obog toho enele uruk inap aruma Galilea inap eneg fug ano?

⁸Nit nenele wal taneg uruk lahe angge famen nangginoho iren nit nenele roho urukmu holtuk lahe? Nit ninibam wal taneg welaheyon te:

⁹Partia ninap, Media ninap, Elam ninap, Mesopotamia ninap, Yudea ninap, Kapadokia ninap, Pontus ninap, Asia ninap,

¹⁰Frigia ninap, Pamfilia ninap, Mesir ninap, Kirene horogma Libia ninap, Roman waharukuk ninap,

¹¹Yahudi ninap yuhon men, Yahudi ninap amuhuk ulug waharukuk ninap men, Kreta ninap, Arab ninap wereg lit nenele wal taneg uruk ninap welahe angge famen alem suwon Allahn turuk latisi ane hiyag nisarukmu holtuk lahe,” uruk latfag.

¹²It obog toho arimano enekolen yuk lagmag ibareg it-it enele sahaltuk lit, ”Nungge ane unubam ahama uruk?” ari urukmu

¹³it winonen te, ”Ik anggur ahaluwe olokon nenggesareg nenek turuk lit uruk,” ulug abilir eneptuk latfag.

¹⁴Abilir eneptuk latfagma Petrus ino otsi nanggoloben itano men in atfareg ele hi roho uruk lit, ”Yahudi hinap nori, Yerusalem hinap nori, anden hiyag hisaminon aru hit obog tohowen holeg lamok.

¹⁵Hiren uruk lahebon ari hag toho ap aruma nenek turuk lit uruk eleg. Ketiya mo ket lahik waharukmu likiya welahe.

¹⁶Iren uruk ane aru re wene hiyag isaruk latfag ahun Yoel inowen Allahn hiyag utukmu haharoho imbibahon hikit toho uruk.

¹⁷Hahatfag ane aru re: ’Mo lahik waharukon mondabi kobog uhu sambil nahime fanowon ap obog toho unubam pilabik waruhuk ulug Allahn ketiya hiyag nitisi. Hunumalikisi ap umaliket hilani umaliket nei fulu roho wahup. Ap kabiniyonen fobik aruhu ane yet hahupteg onoluk aruhu. Ap sabalon nei famen onoluk aruhu.

¹⁸Namingmingangge abet hiyabet ari sambil eneg nahime fanowon unubam pilabik waruhukmu it nabi hag toho wereg lit nawene hiyag isaruk lamuhup.

¹⁹Poholma leman enehangge tuhukmu kinangma tuma oho siyengge umbuhuk. Indok hubu muhul mondotuk laruhureg indok ambulpul wilip aruhumu ap enemep inam aruhu.

²⁰Allah aliliyangge roho waruhuwon horog tegma tuhu ane mo il hik aruhu, pikalem hulu atuk lit il mep hag aruhu.

²¹Ap sa Allah unuk uruk lit Nikni urukon eneg war am fug angge mondabi oluk welaruhu,’ ulug Yoelen haharoho imbibag.

²²Hit Israel hinap nori, anden iminon tu holeg lamek: Yesus Nazaret ahun fano ane eneg turuk laruhu ulug Allahn ineyap tirisireg At hiyag utukmu hit sehelimuwen turuk latisi ane ari hit honoluk.

²³Allahn ware fesuhup pibag ane hikit toho hiren senetikipmu Allah unuk enepeleg inaben e fam teloho ware feserusa.

²⁴War arik oho lit sat haruk lit lisag anggolo wambirisiyon Allahn puhun turuk lit war atuk ambeg ino mondabi welam fug tehen olukap tirisi.

²⁵Hun Daud inowen At fahet haharoho imbibag ane tu, ’Nikni ninggik pikit fil werehen likiya hupmu yet haruk lit yuk lagmag uruk lahi fug.

²⁶An Nikniyen fet nasugmu nindi yuwag toho wereg lit nambilik famen Nikni wel turuk lit nahiyeg toho welahi.

²⁷Haren mumal tarikinon ino kinangman filik tuhu rohon nahime ap war atuk ambeg numbahakun fug.

²⁸Noluk welaruhuken Haren kebunggalem fanowon hiyag nitikinmu an Hat halukema weregma nahiyehap naptuk laruhun.’

²⁹Nori, ninikni Daud ino fahet anden hit hunubam fag toho hiyag hisamin. At war atfagma owikmu kilapfag ambeg ino ketiya niren oho haruk lahe.

³⁰Daud ino wene hiyag isaruk latfag ahun weregma Allahn ubam sali uruk lit, ’Hat humalikisiyen ondohowonen enderuhuwon misig hubalma heriyeg laruhu,’ ulug hiyag itfag.

³¹Ari ulug hiyag itfagma Dauren ibag ane aru, ’Nebe kinangman filik tuhuk tohon ap war atukon wereg ambeg welamag ulug numbahakun fug,’ ibag ane aru ubalmangge Mesias ino Allahn olukap tuhu ane oluk atfagma ibag.

³²Yesus aru Allahn olukap turukmu nit obog tohowen harukuk.

³³Olukap tirisimu Allah inggik pikironen At lehoma unduhuk feruk lit Allah hime fanowon sali ibahon ino ubam emberisimu Aren pilabik wahama hinisanggo fam holehepteg hinilen yet haruk lahep aru.

³⁴Hun Daud ino poholma lahibag fug. Inggarehen ibag ane aru: ’Nikni Allahn an Nikni fam ele uruk lit,

³⁵Hat men seli roho werehon huyug ahongge umbuhuken ninggik pikit fil hur arik ma.’

³⁶Allahn amloho Yesus hiren e fam teloho ware feserikibon ino Honowe Mesias amag ulug palimu unduhuk ferisiyon fahet hit Israel hinap obog toho honoluk amag,” ibag.

³⁷Petrusen ibag ane ari iren hol hibareg inindi anggin anggolo hibareg Petrus men Yesus otsi winon men kapal isaruk lit, ”Nori, niren nanggintuk lamuhuk,” ulug kapal isibag.

³⁸Kapal isibagma Petrusen te, ”Siyag ane turuk lahebon embeselihipmu niren Yesus unuk fam ikma pilap henebulmu Allahn oho siyag ane turuk lahebon ambolma embeseruk lit Allah hime fanowon og hisahu.

³⁹Allahn sali ibahon hit men hunumalikisi men ap yatma werehon obog toho men Allah indiyen wol eneptukon fahet eneg sali palfag,” ibag.

⁴⁰Ele winon anggolo hiyag isibareg komo eneptuk lit, ”Siyag ane turuk inap sehelimu welahepma Allahn fanowap henebuhuwen henembol yig isalug maniyek,” ulug hiyag isibag.

⁴¹Petrusen wene hiyag isarukmu holfahon arimano ikma pilap neneplihip ulug watfahon arimano enebe teng-teng angge 3.000 watfagma ikma pilap eneptuk latfag.

⁴²Pilap eneptuk latfagma Yesus otsiyen wene hiyag isarukmu likiya hupmu holtuk lit inindi misig atfagma sembahyang uruk lit suburu kuroho naruk lit palu atuk latfag.

⁴³Yesus otsi arimanowen poholman turuk ane anggolo turukmu yer isibareg aben tuk fug teg ane turuk ulug ap obog tohowen yihi uruk latfag.

⁴⁴Ap obog toho Yesus fam inindi wenggel haruk latfahon arimano inindi misig atfagma haren tohon anden tohon ulug alem haluk fug anggeyen we niren tohon eneg wereg peruk latfag.

⁴⁵Ininggikmu enenggengge werehon arimanowen ap winon fam ayeg waroho wibareg wibag angge arimano ap ininggikmu elehon og isa rehon eneg fibir eneptuk latfag.

⁴⁶Likiya hupmu inindi misig wereg lit Allah wene fahet o wene uruk ibam palu ruruk latfag, inibam wal taneg suburu kuroho nul ulug palu ruruk lit inindi fano roho enehiyeg toho wereg lit

⁴⁷Allah wel turuk latfag. It unubabut fano ane turuk ulug ap obog tohowen enehiyeg toho yer isaruk latfag. Enehiyeg toho yer isaruk latfagma Ninikni Allahn likiya hupmu ap wene holtukon anggolo amag ulug ap winon oho hondog eneptuk latfag.