Read Angguruk Yali KISAH RASUL-RASUL 22 Bible Online

KISAH RASUL-RASUL 22 - Angguruk Yali bible

KISAH RASUL-RASUL 22

¹”Nori, niknisi, hiren un ane an nubam lombog tirikipmu anden seleg toho hiyag hisaminon aru holeg lamok,” ibag.

²Ari ibagma ap anggolo arimanowen ap tuwen Ibrani inap enele roho hiyag nisaruk ulug hol hibareg enele eleg angge welatfagma Paulusen,

³”Nori, an Yahudi nahun welahi. Indag napfag ambeg o Tarsus Kilikia kinang fam werehon inowen indag napfagma o tuwen nebe su atikik. Nunumba Musa wene fahet hun Gamaliel inowen tintiloho milal naptuk latisimu hit welahebon Allah fahet henesukun fano roho turuk lahep hag toho anden oho Allah fahet nasukun fano roho turuk latikik.”

⁴”Anden oho Yesus wene holtuk inap mug eneplug laruk lit pinggi unusuruk latikik. Unusuruk lit ap men hiyap men sen eneplug ininggik hele waroho penjara kilap eneptuk latikik.

⁵Ari roho turuk latikik ane aru imam onowesi suwon men hiniknisi suwon palu roho wereg inap menen yet niyarusareg it obog toho onoluk teg lit wereg. Ari roho turuk lit o Damsyik lahukteg Yesus wene holtuk inap arimano sen eneptuk lit Yerusalem hondog eneplug waruhukteg penjara kilap enebuhuk ulug suwesingga it unubam heng eneptikik.

⁶Heng eneptikikteg o Damsyik horogma larukmen o unukoho mo anum pulmu weregman famen umbagpag humon poholman nubam wambik waharisimu

⁷kinangma ying atikikteg ele hol harukmen, ’Saulus, Saulus, nungge fahet An nuwatmin ulug mug naplug waharuk lahen?’ urukmu hol harikikteg,

⁸’Nowe, Hat san uruk lahen?’ irikikmu, ’An Yesus Nazaret nahun haren nuwatmin ulug mug naplug wahenon inowen uruk lahi,’ irisi.

⁹Irisimu ap an men welatuson arimanowen oho asinandi umbagpag turukon ino yet harusa angge famen At ele nubam irisi ane holtusa fug.

¹⁰Holtusa fugmu anden, ’Nowe, anden nungge turuk laruhuk,’ ulug kapal harikikmu Aren, ’In atmihinteg o Damsyik lamihinmu o inowen haren turuk laruhun ane aben hiyag humuhup,’ ulug hiyag nitisi.

¹¹Hiyag nutukmen asinandi inowen nil hubun atisimu nori ambiyeg waharukukon arimanowen ninggik sen naplug o Damsyik numbahik larusa.

¹²Larikikteg weregman o Damsyik ino ap misig unuk Ananias Musa wene hikit toho turuk lit fano ane turukmu Yahudi inap obog toho o Damsyik welatuson arimanowen at fahet fano peruk latusa ahun welatisi.

¹³At ino an niraham waharisireg ele uruk lit, ’Saulus nare, hil fenggen amin,’ irisimu nil fenggen atikikteg at yet harikik.

¹⁴At yet harikikmu aren ele nubam uruk lit, ’Nunumbusagsi Inikni Allah inowen Aren peruk ane holuk amag ulug mumal haptisireg At pikir ane turuk ahun ino yet hahunteg At ele ambilik fam wilip atukon holtuk laruhun ulug unduhuk hubaharisi.

¹⁵Haren yet haruk lit holtuk lahen ane aruma ap obog toho iniline fag toho hiyag isaruk laruhun.

¹⁶Nungge fahet ketiya hindi nonghong uruk lahen?’ irisireg, ’Nare, in amin, siyag ane turuk latikinon Aren puhunap hapmisiyen ikma pilap nabukag peruk lit Yesus unuk fam sembahyang uruk lamin,’ ulug hiyag nitisi.”

¹⁷”Yerusalem suhuloho watlug Allah ibam kirikikteg sembahyang uruk lit fulu roho yet harukmen At yet harikik.

¹⁸At yet harikikmu ele nubam uruk lit, ’An fahet haren hiyag isahunmu holuhup fuhen o Yerusalem aru embeselug folo-folo wilip aruhun,’ irisimu

¹⁹anden, ’Nowe, Hat hawene holtuk inap o sembahyang uruk ibam arimano eke fam eke fam laruk lit ininggik hele war enebeheg unuseheg penjara fam kilap eneptuk latikik ane fahet it onoluk.

²⁰Hat hamingmingangge Stefanus pinggi ware feserusa sambil ino an oho wereg lit fano ware feseruk peruk lit at watuk inap enesum anden foroho latikik,’ ari irikikmu

²¹Aren te, ’Allah unuk enepeleg inap enembeg lamihin ulug yatma mon haptuk lahi angge re lamihin,’ ulug nubam hiyag nitisi,” ulug hiyag isibag.

²²Ari ulug hiyag isibagma Paulusen tam ibag ane fahet ap anggolo arimanowen fano holfag angge famen atogma ibag ane fahet hol hibareg enele hum toho uruk lit, ”Ap aru hahon kinang tu fam welaruhu fuhen il hiraho fisiyek, oluk welaruhu rohon ware fisiyek,” uruk latfag.

²³Enele hum toho uruk lit enesum nonggoloho hik isibareg olohulong ha roho pohol fil hik isaruk latfag.

²⁴Ari turuk latfagma sehen seneg inap onowe inowen ap anggolo aruma enele nungge fahet uruk noluk atmisiyen, ”Paulus olma walug kilihipteg watuk lit alem haltihip,” ulug otsi unubam hiyag isibag.

²⁵Hiyag isibagma sehen seneg inaben Paulus wabul ulug hele waroho e fam pug tibibagma Paulusen sehen seneg ahun unduhuk latfahon ino fam ele uruk lit, ”Hiren alem fuki roho haluk fug anggeyen Roma ahun wabuk teg lahep?” ulug kapal hibag.

²⁶Kapal hibagma sehen seneg ahun ino Paulusen ibag ane hol hibareg owe ambeg libareg Paulusen ari ehek ulug hiyag utuk lit, ”Ap ino Roma ahun werehen at ubam nungge timihin,” ulug kapal hibag.

²⁷Kapal hibagma sehen seneg inap onowe ino Paulus ambeg libareg kapal haruk lit, ”Hat we tem Roma hahun welahen?” ibagma Paulusen, ”Yu-a, we tem haren ehen ari,” ibag.

²⁸Ari ibagma sehen seneg inap onowe inowen, ”An oho Roma nahun aruhuk ulug uang onggo anggolo Roma inap iniknisi og isarikik,” ibagma Paulusen, ”An oho nikni Roma ahunen indag napfagma Roma nahun welahi,” ibag.

²⁹Ari ibagma sehen seneg inap Paulus wabul ulug hele watfahon arimanowen oho ibag ane hol hibareg hele lole feselug enekolen folo-folo libag. It larukmu onowe ino oho Roma ahun famen hele wariyek ulug hiyag isihi pibareg akol hibag.

³⁰Sehen seneg inap onowe inowen Yahudi inaben Paulus fam turuk ane ari alem nungge fahet turuk ulug fuki roho noluk alep peruk latfag. Peruk latfareg nohibareg likiyamon imam onowesi suwon men Yahudi inap iniknisi suwon wol enepfareg palu enepfag. Palu roho weregma Paulus inggik hele loloho hondoholug it wereg ambeg watfag.