Read Angguruk Yali KISAH RASUL-RASUL 23 Bible Online

KISAH RASUL-RASUL 23 - Angguruk Yali bible

KISAH RASUL-RASUL 23

¹Watfareg Paulusen ap suwon palu roho welatfahon arimano yer isibareg ele uruk lit, ”Nori, Allah olohotma indam oho siyag ane tirikik fureg yoho oho nindimu siyag toho wenggel haruk lahi fug,” ulug hiyag isibag.

²Ari ulug hiyag isibagma imam onowe suwon unuk Ananias inowen ap Paulus iraham werehon unubam Paulus ambilik sahaloho ware fisiyek ulug hiyag isibagma ware fisibag.

³Ware fisibagma Paulusen ap suwon ino pet turuk lit, ”Har oho Allahn sahaloho huwaruhu. E ubahat undama fubut teg angge famen selma ka yanggowon lahaptukmu fano wereg peruk hag toho hat welahen. Hat tuma heriyeg lit Musa wene hikit toho unggum kong turuk lahi peruk lahen angge famen Musa wene ino sobir isaruk lit ambilik sahaloho ware fisiyek ehen,” ibag.

⁴Ari ibagma ap welatfahon arimanowen Paulus pet turuk lit, ”Imam onowe suwon Allah unduhuk ferisiyon ino fam nungge fahet pet turuk lahen?” il larikim Paulusen,

⁵”Nori, at ino imam onowe suwon wereg angge famen an napelehen ihi. ’Hiniknisi suwon unubam siyag ane uhup fug,’ ulug haharoho imbibahon ino an noluk,” ibag.

⁶Ari ibareg ap welatfahon arimano Saduki inap men Farisi inap mangno roho wereg ulug oluk atfareg aren ele hiyag isaruk lit, ”An oho Farisi nahun welahi, nikni Farisi ahunen indag nasuhen, ap war atukon Allahn onolukap enebuhu ane fahet an hondog naptug wahasama tuma unduhuk lahi,” ibag.

⁷Ari ibag ane ari hol hibareg it ap anggolo palu roho welatfahon arimano Saduki inap enemu Farisi inap enemu pul ke minggir atfareg suwahal uruk latfag.

⁸Suwahal uruk latfag ane ari Saduki inaben ap war atukon onolukap enebuhu fug, ap hime men malaikat men eleg peruk latfag angge famen Farisi inaben wereg peruk latfagma

⁹suwahal su atfag. Musa wene onoluk inap Farisi welatfahon arimano in atfareg enele ine roho uruk lit, ”Ap tuwen siyag ane tirisiyon misig oho haruk lahe fug. Malaikaren ano ap himeyen ano ubam hiyag itisi ane hiyag nisaruk,” uruk latfag.

¹⁰Enele ngik-ngog tibagma sehen seneg inap onowe ino ap aruman Paulus al senggeloho wabuk ohoreg pibareg otsi wol enepfareg Paulus it sehelimuwen hondoko walug olma kilihip ulug hiyag isibag.

¹¹Hubanggo nohorukmen Yesus at iraham watfareg ele uruk lit, ”Hindi se roho welamin. An nubahet o Yerusalemen hambong se roho hiyag isaruk lahen hag toho o Roma lahunteg oho hakol eleg toho hiyag isaruk laruhun,” ibag.

¹²O sakan tibagma Yahudi inap arimano hirahoma palu atfareg at ware fesuhuk ulug enele sahaltuk lit at pinggi ware fesuhukteg eneg suburu men ik men nahuk ulug sali watfag.

¹³Sali watfag inap arimano enebe teng misig nubam hilag lahabeg arimano welatfag.

¹⁴It arimano imam onowesi men Yahudi inap iniknisi men enembeg libareg enele uruk lit, ”Suburu men ik men na fug angge welamuhukteg Paulus ware fesuhukteg eneg suburu men ik men nahuk ulug sali warehe.

¹⁵Sali warehe angge re hit men ap suwon palu roho wereg lit enele uruk inap menen ambiyeg sehen seneg inap onowe ino hiyag utuk lit, ’Niren hun Paulus ino fuki roho kapal hahuken nenembeg hondoholug waruhun,’ ulug heng tik lalihip. Heng tik lalihipmu at hondoholug waharukmu niren wabuhuken kema kahaleg lit welamuhuk,” ulug hiyag isibag.

¹⁶Ari ulug hiyag isibagma Paulus ereken ondohowon amloho ino at abug ibag ane ari hol hibareg Paulus hele waroho weregma watfag. Watfareg Paulus weregma kimin ulug sok foroho ahun ino fam heng tibareg olma kibareg Paulus hiyag utuk lit, ”Nami, aben huwabuhuk ulug habug ehesa ane holihi,” ulug hiyag itfag.

¹⁷Amlohowen hiyag itfagma Paulusen hol hibareg sehen seneg ahun misig wol tibareg, ”Malik aru hondoholug honowe ambeg walug lalihipmu aren an nubam ehek ane hag toho honowe hiyag itmisi,” ibag.

¹⁸Ari ibagma sehen seneg ahun inowen malik ino owe ambeg hondoholug libareg, ”Malik aruwen ele hubam imisiyen Paulus hele waroho werehon inowen an wol nabehekteg hondoholug lag ehekma hondoholug wahi,” ibag.

¹⁹Ari ibagma sehen seneg ahun onowe inowen malik ino inggik seneko amumu hondoholug libareg, ”Namloho, haren an hiyag nitmin pehen ane in,” ibag.

²⁰Ari ibagma malik inowen, ”Nikni, Yahudi inap enele sahaltusareg ap suwon palu roho wereg ambehen Paulus ino fuki roho kapal hahuken o sono at hondoholug waruhun ulug heng habusa.

²¹Ari ulug heng habusa angge famen haren it enele holuk fug. Ap teng misig nubam hilag lahabeg arimanowen nami wabul ulug kema kahaleg lit welamuhup. It arimanowen suburu men ik men na fug angge hinik wereg lit Paulus wabuhukteg eneg nahuk ulug sali watusareg aren hondoholug waruhu ano eleg ano ulug hele holeg lit wereg,” ibag.

²²Ari ulug hiyag itfagma sehen seneg inap onowe inowen malik ino fam hibam lamihinteg at ambeg yonggo lahi ulug ap winon hiyag isa fug ulug komo ribagma ibam libag.

²³Malik ino libagma sehen seneg inap onowe inowen otsi piren wol enepfareg hiyag isaruk lit, ”Fit seneg inap teng sabiren men wam kudan ha eneplug laruk inap teng piren nubam hilag lahabeg men sehen seneg inap teng sabiren men yoho hubanggo o Kaisarea lalusan palu enebiyek.

²⁴Wam keledai piren hinahan Paulus walug laluson fahet ilili felihipmu it obog toho arimanowen Paulus fano welaruhuwen hondoholug nonowe suwon kinang seneg ahun Feliks ambeg hondoko imbisik lalusa,” ibag.

²⁵Ari ibareg suwesingga eke haharoho emberuk lit,

²⁶”An Klaudius Lisias inowen hat nowe suwon fano hahun Feliks hi haptuk lahi.

²⁷Hun tu Yahudi inaben senetusareg wabul ulug turukmen Roma ahun wereg urukmu holtikikteg Yahudi inap ininggikmu angge notsi menen taluk eneptukuk.

²⁸Taluk eneptukukteg nungge fahet turuk ulug alem yami ruhuk ulug Yahudi inap iniknisi suwon palu roho wereg ambeg hondoholug larikik.

²⁹Hondoholug larikikteg kapal isarukmen we Yahudi inap inikni umban haharoho imbibag ane siyahap tuhu ulug alem ubam emberuson eneg hiyaharikik. Alem suwon ubam embelug penjara fam kila fusuk hahon oho ware fusuk hahon oho eleg latisi.

³⁰Eleg latisi angge famen Yahudi inap winonen at ware fesuhuken kema kahaluhuk ulug enele sahaltusa ane fahet an hiyag nirik waharusa. Hiyag nirik waharusama at ino notsiyen hondoko hat hambeg imbik lalihip ulug mon eneptuk lahi. Alem walug waharusa inap unubam anden unggum ari kong tuk fug tehen at ambeg walug lahup ulug hiyag isarikik,” ulug suwesingga haharoho imbibag.

³¹Suwesingga haharoho imbibagma onoweyen otsi hiyag isibahon hikit toho sehen seneg inap arimanowen Paulus hubanggo hondoholug o Antipatris libag.

³²Sakan tibagma likiyamon sehen seneg inap winon suhuloho inibam Yerusalem watfagma wam kudan ha eneplug laruk inap eneg Paulus hondoholug o Kaisarea libag.

³³O ino libareg ap arimanowen suwesingga ino onowe suwon Feliks ino og utuk lit Paulus hondog hirik wahe ulug og itfag.

³⁴Ap suwon Feliks inowen suwesingga kim hibareg Paulus kapal haruk lit, ”Hat hibam pumbuk kema hahun,” ulug kapal hibag. Kapal hibagma Paulusen, ”An Kilikia nahun,” ibagma hol hibareg,

³⁵”Unggum hubam emberusa inap tuma wamuhupmu alem yami ruhuk,” ibareg Herodes ibam foroho latihip ulug otsi hiyag isibag.