Read Angguruk Yali KISAH RASUL-RASUL 24 Bible Online

KISAH RASUL-RASUL 24 - Angguruk Yali bible

KISAH RASUL-RASUL 24

¹Ininggik fuwabenam welatfareg imam onowe suwon Ananias men Yahudi inap iniknisi suwon men unggum kong turuk ane oluk ahun unuk Tertulus men watfag. Paulus fahet alem imbibahon ap suwon kinang seneg ahun ino hiyag umul ulug watfag.

²It palu roho wereg ambeg Paulus hondoholug watfagma Tertulus inowen ele hiyag isaruk lit, ”Feliks nikni, hat fano hahun, haren fet nenesug lahenma aben nunubam siyag ane tuk fug angge fano welahe. Haren ki nenesug lit nit Yahudi ninap nunubam fano ane anggolo turuk lahen.

³Haren fano ane nit nunubam anggolo turuk lahenma likiya hupmu nenehiyeg anggolo haruk lahe.

⁴Hat sehet anggolo roho weregma nit nenele anggolo hat hubam ul fuhen hat hindi fanowon inowen niren tot ulon ariya hol hamihin ulug hubam heng haptuk lahi.

⁵Ap tu yowil amben siyahon hag toho werehon nit obog toho nonoluk. Yahudi inap o pumbuk kema-kema werehon aren eneg ninindi nonghong nisaruk. At tu Nazaret inap nit men hili roho welaheyon onowe tu.

⁶Allah ibam fanowon aren siyahap timin ulug turukmen niren senetukukteg ninikni numban ibag ane hikit toho unggum kong tul perukuk.

⁷Ari perukuk angge famen sehen seneg inap onowe Lisias ino waharisireg olok toho pet neneptuk lit nininggikmuwen taluk neneptisi.

⁸Taluk neneptisireg haren alem haluhuwen ambeg lahup ulug hiyag nisarisimu wahe. Hat hinggarehen at kapal hamihinteg niren ehe ane fahet tem toho ehesa ulug holuk atmisi,” ibag.

⁹Ari ulug hiyag itfagma Yahudi inaben oho aren tem toho ehek ulug enele ine roho uruk latfag.

¹⁰Ari uruk latfagma kinang seneg ahun inowen haren oho hele imihin ulug inggik kaya ribag. Inggik kaya ribagma Paulusen ele uruk lit, ”Nikni, mo-mo angge ilig am wirig am tirikim Yahudi inap fahet unggum kong turuk hahun hat welahenon an noluk. Ari noluk tehen iren alem an nubam embehesa ane fahet hat holohotman fag toho imin.

¹¹An sembahyang imin ulug o Yerusalem waharikikteg hup nisanggowenam eneg welatikikon hat holuk atmisiyen it kapal isamihin.

¹²Allah ibamen oho sembahyang uruk ibamen oho selma ap wereg keyen oho laruk lit ap misig men oho suwahal uk fug angge ngik-ngog tiyek ulug ap inindi kahal eneptikik fug.

¹³Un ane nubam lombog turukon aru alem tu fahet ehe ulug fag toho inamap tuk fug teg.

¹⁴Iren tam wene men hili roho welahe eheson ino holtuk lit nit niniknisi unumbusagsi Inikni Allahn ibag ane hikit toho turuk lahi. Turuk lahi ane fahet anden fag toho hat holohotman uruk lahi. Musa wene men Allah wene hiyag isaruk latfag inap arimanowen haharoho imbibahon men arimano fahet tem toho imbibag ulug wenggel haruk lahi.

¹⁵Ap siyag ane turukon fano ane turukon Allahn onolukap enebik oho waruhu ulug iren nangno ruruk hag toho anden oho nangno ruruk lahi.

¹⁶Alem ari fahet Allah olohotman oho ap kinangmon onolohotman oho nindimuwen siyag ane wenggeluk fug angge nasukun fano roho yami ruruk lahi.

¹⁷Nori wereg ke norukmen mo-mo angge larisimu iren hori og isahun ulug inindiyen emberuson arimano ininggikmu og isaruk lit Allah fahet hubu lahabuhuk ulug suhuloho o Yerusalem waharikik.

¹⁸Waharikikteg namu wereg lit ap unubam nele uk fug angge Allah ibamen ninggik nuyug puhun toho umatukmu Yahudi inap o Asia werehon arimanowen yet niyarusa.

¹⁹Ari turukmu yet niyarusa inap arimano hat hambeg walepteg aren ari turuk latisi ulug hiyag hirik walepma ari fano.

²⁰Ketiya ap tuma wahason aruman niniknisi suwon wereg ambeg hondoko numbahik larusama siyag ane tirikikon ari-ari tirisi ulug holtuson hiyag humusa.

²¹An iniknisi sehelimu unduhuk nubaharusama nele uruk lit, ’Ap war atukon onoluk amuhup irikik ane fahet tuma unduhuk nubahakep,’ ulug nele we tot ita irikikon fahet eneleyen werehap turuk ano?” ulug Paulusen hiyag itfag.

²²Ari ulug Paulusen hiyag itfagma Feliks ino Yesus wene fahet oluk teg lit unggum ari undaman fobikap tuhuk pibareg, ”Sehen seneg inap onowe Lisias ino tuma waruhumu eneg unggum ari kong tuhuk,” ibag.

²³Ari ibareg otsi sehen senehon onowe ino fam, ”Hiren Paulus fano roho foroho lit weregma oriyen let tik waharukon fahet yanggal enebuk fug,” ulug hiyag itfag.

²⁴Hup winako welatfareg Feliks men uhe Yahudi hiyap unuk Drusila ino men watfareg Yesus Kristus fam wenggel haruk ane hol haminen Paulus hondohik aliyek ibag.

²⁵Hondohik aliyek ibagma Paulus watfareg wene hiyag utuk lit pikir ane turukon men inggarehen indi imbik wamburukon men Allah fobik unggum kong tik waruhu ane men fahet hiyag utukmen Feliks ino akol hibareg ele uruk lit, ”We ita hiyag nesehenma lamihin. Nin hiyag nisamisi puhukteg halug fobik wol habuhuk,” ibag.

²⁶Feliks ino undaman Paulusen uang og nuruhu pibareg Paulus likiya hupmu wol tulug enele uruk latfag.

²⁷Mo piren libagma Feliks pilaptuk lit ubalmangge Perkius Festus lahapfagma hun Feliks inowen hele loloho wili fesele angge famen Yahudi inap inindi enehiyehap enepmin ulug Paulus penjara fam welamag ibag.