Read Angguruk Yali KISAH RASUL-RASUL 25 Bible Online

KISAH RASUL-RASUL 25 - Angguruk Yali bible

KISAH RASUL-RASUL 25

¹Hun Festus ino Yudea kinang seneg laruhun ulug ap suwon lahapfagma o Kaisarea hup hinahanam welatfareg o inowen Yerusalem libag.

²Yerusalem libareg weregma imam onowesi men Yahudi inap iniknisi suwon men at ambeg watfareg Paulusen ari-ari turuk latisi ulug hiyag utuk latfag.

³Hiyag utuk lit, ”Haren nit ninindi nenehiyehap neneptuk lit Paulus Yerusalem wamag ulug wol tuhun,” ulug heng tibag. Heng tibag ane ari unundaman Paulus funggalma waharukmu kahaluhukteg wabuhuk peruk lit heng tibag.

⁴Heng tibagma Festus inowen, ”Paulus o Kaisarea penjara weregma an oho tuma we tot welaruhukteg suhuloho o Kaisarea lahuk peruk lahi,” ibag.

⁵”Hit hiniknisi aren tirisi ane onoluk inap arimano an men o Kaisarea lahukteg at iline siyag ane tirisiyon wereg halug fag toho hiyag nisahuben ambiyeg lahuk,” ibag.

⁶Ari ibareg hun Festus ino hup likinenam ano numenam ano o Yerusalem welatfareg suhuloho o Kaisarea watfag. Watfareg likiyamon, ”Nenele sahaltulteg unggum kong timinen Paulus hondohik lalihip,” ulug otsi hiyag isibag.

⁷Paulus it palu roho wereg ambeg hondoholug watfagma Yahudi inap Yerusalemen watfahon arimano at walinggoho in atfareg enele anggolo uruk lit siyag ane ari-ari tirisi ulug un ane anggolo ubam lombog turuk latfag angge famen aren alem tu tirisi ulug fag toho uk fug teg latfag.

⁸Ari uk fug teg latfagma Paulusen ninggareg fahet nele imin ulug in atfareg ele uruk lit, ”Anden Musa wene fahet oho Allah ibam fahet oho Kaisar ubam oho siyag ane tot tirikik fug angge famen hiren un ane nubam lombohap naptuk lahep,” ibag.

⁹Ari ibagma Festus inowen Yahudi inap inindi enehiyehap enepmin ulug Paulus kapal haruk lit, ”Unggum aru o Yerusalemen kong tuhuken fano lahuk peruk lahen?” ulug kapal hibag.

¹⁰Kapal hibagma Paulusen, ”An welahi ambeg tuma oho Kaisaren unggum kong turuk ambeg welahireg tuman oho unggum kong tuk teg. Anden Yahudi inap unubam siyag ane tor angge oho tirikik fuhon ari hat tem toho holuk teg.

¹¹Anden we tem toho siyag ane tirikik halug siyag ane tirikikon hikit toho nuwabuhupmu fano war aruhuk. Alem nubam emberukon si ane uruk lit un ane nubam lombog turuk halug ap misihen oho ap inindi enehiyehap enepmin ulug it aruma ininggikmu numbahuk fug teg. Haren Yerusalem lamisi peruk lahen halug an ketiya Kaisar ambeg lamin,” ibag.

¹²Ari ibagma Festus inowen otsi unggum kong turuk inap men enele sahalfareg, ”Kaisar ambeg lamin ehenma ambeg lahun,” ibag.

¹³Hup piren hinahan welatfagma ap suwon Agripa men uhe Bernike men itano Kaisarea hun Festus hi rul ulug watfag.

¹⁴It itano watfareg weregman Festus inowen Paulus ubam unggum imbibahon fahet hiyag isaruk lit, ”Feliks ino ibam laruk lit ap hele warehon eke embeselug larisiyon tuma wereg.

¹⁵An Yerusalem larikikmu imam onowesi men Yahudi inap iniknisi menen alem siyag ane tirisiyon hiyag nutusareg pinggi ware fesuhun ulug heng naptusa.

¹⁶Heng naptusama anden hiyag isaruk lit, ’Ap winonen ap eke fam unggum ubam emberuk halug alem yami ruruk lit siyag ane turuk ahun ino kapal ha fug anggeyen nit Roma ninaben unggum kong tuk fug teg lahe. At siyag ane turuk ahun ino kapal harukmu inggareg fahet hebeloho uk fug angge weregma ap winon enehiyehap enebul ulug ware fisiyek uk fug teg lahe,’ irikik.

¹⁷Ari ulug hiyag isarikikmu it men ambiyeg tuma waharukukteg noholug likiyamon nenele sahaltul ulug at ino hondohik aliyek irikik.

¹⁸Ubam alem emberusa inap walinggoho wereg latuson arimanowen aren siyag ane tirisiyon fahet fag toho ulusa perikik angge famen ap misihen oho aren siyag ane tirisi ulug fag toho urusa fug.

¹⁹Fag toho urusa fug anggeyen we it enewene fahet eneg enele sahaltuk lit ap misig tam war atfahon unuk Yesus fahet Paulusen At tem toho oluk atfareg wereg ulug hiyag isarisi ane fahet suwahal urusa.

²⁰Suwahal uruk latusama alem ari nangginoho kong tuhuk ulug nindi nonghong uruken o Yerusalemen alem ari kong tuhuben lahun ulug kapal harikik.

²¹Kapal harikikmu Paulusen Kaisar ambeg lahuk irisireg Kaisaren alem kong tuhuwen nangno ruruk lit penjara welaruhuk irisi. Ari irisimu anden Kaisar ambeg monde fuhuk ulug penjara foroho lit welahi,” ibag.

²²Ari ibagma Agripa inowen Festus fam, ”Anden oho ap ino inggarehen ele urukmu hol hele peruk lahi,” il larikim Festus inowen, ”Sono at ele holuhun,” ibag.

²³Ari ibagma noholug likiyamon Agripa men uhe Bernike men lul ulug eneliliyangge ap suwonen lahaptuk angge lahapfareg enemingminganggeyen hondog eneplug unggum kong turuk ibam ino kurukmu sehen seneg inap onowesi men o pumbuk ino wereg inap iniknisi men obog toho kibagma Festus inowen Paulus hondohik aliyek ulug ap monde fibag.

²⁴Paulus hondoholug watfagma Festus inowen ele uruk lit, ”Agripa nikni men hit obog toho tuma kik wahebon men nori! Yahudi inap obog toho arimano Yerusalem werehon men tuma werehon menen hun tu fahet enele anggolo sahaltuk lit abug uruk ahun ino tu wereg, yet hemek. Yahudi inap an nambeg waharusareg ngik-ngog turuk lit hun aru abi roho welaruhu fuhen folo-folo il hiraho fisiyek uruk latusa.

²⁵Ari uruk latusa angge famen alem ubam embelug il hiraho fusuk ane eleg latisimu at inggarehen Kaisar ambeg lahuk irisimu anden Kaisar ambeg lahun ulug nele emberikik.

²⁶Nele emberikik angge famen aren siyag ane tirisiyon Kaisaren kim hahu ulug suwesingga haharoho umbukon alem eleg latisi. Eleg latisimu hit obog toho hinil fam, hat nikni Agripa oho halukema at ino hondoko imbik wahimu hiren kapal halihipmu aren siyag ane tirisiyon alem wereg halug suwesingga Kaisar fahet haharoho umbuhuk.

²⁷Ap eke siyag ane tirisi fuhon unggum ubam eleg angge famen hele waroho werehon saplangge Kaisar ambeg monde fuk fug teg peruk lahi,” ulug hiyag isibag.