Read Angguruk Yali KISAH RASUL-RASUL 26 Bible Online

KISAH RASUL-RASUL 26 - Angguruk Yali bible

KISAH RASUL-RASUL 26

¹Ari ulug hiyag isibagma Agripa inowen Paulus fam, ”Hat hinggarehen turuk lahen ane fahet in,” ibagma Paulus inowen henele ulug inggik kaya ribareg ele uruk lit,

²”Agripa nikni, Yahudi inaben un ane nubam lombog turuson fahet yoho hat holohotman fag toho iminon fahet nahiyeg toho welahi.

³Yahudi inap ikni umban turuk latfag ane men iren ketiya turuk ane men hat holuk teg lahenma anden hiyag hitminon haren fano roho holeg latmihinen heng haptuk lahi.

⁴Atam oho nori sehelimu o Yerusalem welatikikmu an kabinimuwen angge ak teberikikteg turuk latikik ane Yahudi inap obog tohowen niyarusa.

⁵Nunggul unuk Farisi wereg lit nenewene tam haharoho imbibahon fahet angginon ha rulug laruk latikikmu it obog toho yet niyarusa angge re inindi fano wenggel haruk lit hahen tem toho uruk ulug hiyag hetlep.

⁶Allah niniknisi unumbusagsi unubam sali ibahon hikir amag ulug nangno ruruk latikik ane fahet unggum nubam emberusama tuma unduhuk lahi.

⁷Allahn sali ibahon hikir amag ulug nonori nununggul unuk nisanggowen welaheyon arimano oho likiya hupmu Allah ubam fuki roho wenggel haruk lit nangno ruruk. Nikni Agripa, nangno ruruk lahiyon aru fahet Yahudi inaben alem nubam emberusa.

⁸Nungge fahet Allahn ap war atukon onolukap enebuhu urukon fahet si ane peruk lahep?

⁹Hiren peruk lahep hag toho anden oho ari peruk lit Yesus Nazaret ahun ino unuk nine roho elehap tuhuk peruk latikik.

¹⁰Ihi ane ari o Yerusalemen oho turuk latikik. Imam onowesi arimanowen ari turuk laruhun ulug hiyag nutusama wene holtuk inap anggolo ininggik hele waroho penjara fam kilap eneptuk lit pinggi war atukon fahet oho fano war amag peruk latikik.

¹¹Wene uruk ibamen unusuruk lit wene fahet sokowa fisiyek ulug enele ying eneptuk latikik. Nolok anggolo haruk lit o pumbuk wina ke larukon oho unusimin ulug mug eneplug laruk latikik.”

¹²”Ari turuk latikikmu imam onowesi ap suwon arimanowen o Damsyik lahunteg ari-ari turuk laruhun ulug hiyag nutuk lit komo naptusama o ino lamin ulug laruk latikik.

¹³Nikni Agripa, kema larukmen o unukoho pul famen asinandi humon poholman nubam wambik waharisi. Asinandi ino mo il hag toho fug, il ineyon an men nori ambiyeg larukukon arimano men nenebene yatuk latisi.

¹⁴Yatuk latisimu nit obog toho kinangma ying arik wamburuk lit anden hol harukmen Ibrani enele roho hiyag nutuk lit, ’Saulus, Saulus, nungge fahet An nuwatmin ulug mug naplug waharuk lahen?’ irisireg hiyag nutuk lit, ’Lag ulug wanggun ambiyang morog tohon fam tung hiyahupmu hahap altowen nirim ulug miyaloho hik isa fug teg laruhun,’ urukon holtikik.

¹⁵Hol harikikteg anden te, ’Nowe, Hat san uruk lahen?’ il larikim, ’An Yesus haren nuwatmin ulug mug naplug wahenon inowen uruk lahi.

¹⁶Ketiya in atug welamin. Hat an namingmingangge wereg lit ketiya yet neyehenon oho fobik Anden hat hubam unug hahukon oho ap hiyag isaruk laruhunen Anden unduhuk hubahaminen hiline inam ahi.

¹⁷Anden ap inibam o pumbuk kema-kema mon habuhukmu hele ying haptuk lit huwatukmu Anden windat haptuk laruhuk.

¹⁸It ap arimano inil hupnihon fenggen atuk lit hik teg ambeg embeselug suhuloho seleg tegma waharuk lit Iblis inggik kobog isalug Allah weregma wamuhuben mon haptuk lahi. Ap fano amuhubon fahet tug toho foroho lahiyon it ininggikmu umbuhuken iren inindimu tem toho nubam wenggel haruk lamuhupmu siyag ane iren turukon Anden nambolma umbusuhuk,’ ari ulug hiyag nitisi.

¹⁹Nikni Agripa, poholman nubam atisi ane ari misihim oho nirim ulug ele sobir isa fug anggeyen likiya hupmu nasukun fano roho holtuk lahi.

²⁰O Damsyiken ak teberikikteg o Yerusalem inap men Yudea kinangma werehon men Yahudi inap oho Allah unuk enepeleg inap oho wene hiyag isaruk lit siyag ane turuk lahebon embeselug Allah ubam hinindi wenggel haruk lit fano ane Allahn peruk ane hikir oho eneg turuk lamuhup ulug hiyag isaruk latikik.

²¹Hiyag isaruk latikik ane fahet Yahudi inaben Allah ibamen an sen naptusareg nuwabul ulug turuk latusa.

²²Ari turuk latusa angge famen Allahn let naptisimu ketiya noluk wereg lit ap suwon toron obog toho wene hiyag isaruk lahi. Wene uruk lahiyon ari un ane uruk lahi fug, atam wene hiyag isaruk latfag inap men Musa menen haharoho imbibahon hikit toho hiyag isaruk lahi.

²³Wene hiyag isaruk lahiyon ari Mesias ino aben wabuhupmu Allah ap warehon wereg ambehen At atam olukap tuhumu ap aruma werehon oho o pumbuk winon oho iral seleg fanowon unubam aruhu ulug Allah tam ari pibag ulug hiyag isaruk lahi,” ibag.

²⁴Paulusen ari-ari turuk latikik ulug obog toho hiyag isibagma Festus inowen ele ine roho uruk lit, ”Paulus, hat nenek turuk lit uruk lahen. Mun ane man ane noluk teg ulug alem yami ruruk lahenon ariyen nenek turuk lahen,” ibag.

²⁵Ari ibagma Paulusen te, ”Festus, hat fano hahun hiline nenek turuk lit uruk lahi fug. Anden uruk lahi ane fuki roho wenggel haruk lit pikir ane eneg uruk lahi.

²⁶Ap suwon Agripa aru oho alem anden uruk lahi ane fahet indi anggat tehen seleg toho uruk lahi. Hirahoman hirako turusa ane fahet uruk lahi fug, ap misig oho holtisi fuhon wereg eleg peruk lahi.

²⁷Nikni Agripa, Allah amingmingangge nabi atam welatfahonen hiyag isaruk latfag ane hindimu tem toho wenggel haruk lahen? Tem toho wenggel haruk lahen peruk lahi,” il larikim

²⁸Agripa inowen, ”Haren uruk lahen ane tot sebe roho elenma tem toho peruk lit wene holtuk ahun hag toho welale peruk lahi,” ibag.

²⁹Ari ibagma Paulusen, ”Anden Allah fam sembahyang uruk lit tot welamuhukteg ano amusun toho welamuhukteg ano we hat eneg fug, it obog toho tuma wereg lit nele holeheson oho inindi fano aruhumu an hag amuhuben Allah fam sembahyang uruk lahi. Hininggik eneg te an hag toho hele wat henebuhup fug peruk lahi,” ibag.

³⁰Paulusen ari ulug hiyag isibagma ap suwon Agripa men kinang seneg ahun Festus men hiyap Bernike men ap obog toho it men horiyeg latfahon arimano oho in atfareg

³¹wilip atuk lit it-it enele sahaltil laruk lit, ”Ap ari siyag ane tirisiyon hikit toho penjara kilaptuk lit pinggi ware fusuk hahon te alem eleg laha,” il laruk latfag.

³²Il laruk latfagma Agripa inowen Festus fam hiyag utuk lit, ”Inggarehen Kaisar ambeg lahuk elep fugmu hahen penjaran hele loloho wili fisila,” ibag.