Read Angguruk Yali KISAH RASUL-RASUL 27 Bible Online

KISAH RASUL-RASUL 27 - Angguruk Yali bible

KISAH RASUL-RASUL 27

¹Hit Italia lahup ibagma Paulus men ap winon ininggik hele waroho wereg latfahon arimano men haren hondog eneplug lahun ulug sehen seneg ahun onowe misig Kaisar amingmingangge unuk Yulius ino hiyag itfag.

²Hiyag itfagma kou misig Adramitiumen watfahon ino o pumbuk obog toho Asia kinang fam wirihon arimano fene eke kil eke kil lamin ulug turuk latfahon ino fam kuruk uwareg luwag. Hun Aristarkhus Makedonia ahun ibam Tesalonika watfahon ino men ambiyeg luwag.

³Noholug likiyamon o Sidon kuruk uwag. Yuliusen Paulus indi hibareg, ”Hat sehet teg lahen angge og humusan hori pen isa lamihin,” ulug hiyag itfag.

⁴O ino embeselug ik ahum keyen larukmen homhomo neneluke fil waharuken Siprus kinang inowen mapmu regma aluke ke laruk latuk uwag.

⁵Siprus kinang ino ik ahum pali keyen tulug Kilikia aluke keyen tulug Pamfilia aluke keyen laruk lit o pumbuk Mira Likia kinang werehon fam kuruk uwag.

⁶O inowen sehen seneg inap onowe nit hondog nenepfag ahun inowen kou eke o Aleksandrian watfareg Italia lamin ulug turukmu hiyahibag. Hiyahibareg nit kou ino fam hondoko kilap nenepfag.

⁷Kilap nenepfagma ik ahum keyen larukmen homhomo kou unggul filen waharuk lit ambol fil mon isa laruken folo-folo la fug tehen hup piren hinahan kou fam nohil laruk latuk uwareg o Knidus horogma luwag. Homhomowen unusuk hag ane turuken Kreta kinang aluke keyen lahuk ulug Salmone ambiyang pisan isalug laruk latuk uwag.

⁸Nunusuk hag ane turuken Kreta kinang aluke ke orog-orog laruk lit kou winon imbik laruk ambeg unuk te ”Inditmu Fanoma,” o pumbuk Lasea horogma luwag.

⁹Ari til larukmen amusun atfagma Yahudi inap hiyang welatfahon sali obog atfagma siyelu waharuk li horog atfareg ik ahum keyen laruk ane la fug teg latfag. La fug teg latfagma Paulusen hiyag isaruk lit,

¹⁰”Nori, niren lul pehe angge famen siyeluwen kou ino halog turuk lit sum angge anggolo kilaptuson linggik-longgo uruk lit nenebe war amuhuk tohon pok amulteg welamul peruk lit yet haruk lahi,” ibag.

¹¹Paulusen ari ulug hiyag isibag angge famen sehen seneg inap onowe inowen kou waruk ahun men ngi ahun men enele holtuk lit Paulusen hiyag isibag ane apmaya fisibag.

¹²Inditmu kou kuruk ambeg ino sun li waharukmu amusun toho welam fug tehen ap kou fam welatfahon winon anggolo arimanowen, ”Sun waharuk halug o Feniks lahukteg welamuhuken wal hul,” eneg uruk latfag. O Feniks ino Kreta angginang fam weregma kou kuruk ambeg inditmu ino ik ambut fil men mo wamburuk fil men eneg seleg teg latfag.

¹³Weregman ik ambut filen homhomo waharuk latfagma iren te ketiya o Feniks la hag teg peruk lit helep simbuk angginon hag angge kou seneg latmisi ulug ik ahummu pilapfahon ino lisoho kou fam kilapfareg ik ayeg hop-hop laruk latfag.

¹⁴Tot larukmen siyelu humon Kreta kinang filen waharuk lit fu ruruk latfag. Siyelu ino yali filen ine roho waharuk latfag.

¹⁵Siyelu inowen kou ino ha rulug laruk latfagma hebeloho kou unggul siyelu waharuk fil ino haluk fug teg latfagma haltuk ane embeseruk uwareg weregman siyelu inowen kou sungguk toho ha neneplug libag.

¹⁶Ha neneplug larukmen ik anggen toron misig unuk Kauda ino alukema ha roho nunumbahik libagma lisag anggolo roho kou toron lisuruk uwareg kou suwon elma kumbi fam ililoho kilabik waharuk uwag.

¹⁷Kou toron ino kilabik watfagma kou ino iken halog tuhu rohon ulug hele kumbi ineyon fam kalkal tibag. Kalkal tibareg siyeluwen Sirtis inditmu nunumbahik lamisi ulug sum kou fam ililig latfahon arimano fam siyelu kuhu rohon ulug loloho kou elma kilapfagman kou ino mase ruruk latfag.

¹⁸Noholug likiyamon siyelu ino ambi ane eneg turuk lit nunusuk hag ane turuken sum angge kou elma kilapfag angge arimano ik ahummu hik isibagma linggik-longgo ibag.

¹⁹Noholug o hinahaneg angge kou witukon angginen kou famen ininggareg ininggiken hik isibag.

²⁰Hik isibareg weregman unukoho mo wam fug angge hubanggo suhal hutuk tuk fug angge hinan hililip tegma siyelu fu rurukmu obog toho war amuhuk pibag.

²¹Indam angge suburu na fug angge hinik wereg lit war amuhuk pibagma Paulus it sehelimu in atfareg ele uruk lit, ”Nori, anden o Kreta pok amul irikik ane hit holtepman hahen nit nenebe fano wereg lit nenenggengge aruma oho hik isila fug.

²²Ketiya siyag toho welahe angge famen hinindi yuwag toho welamek ulug komo henepmin. Nit aruma welaheyon misig oho war aruhu fug, we kou amu eneg siyag aruhu.

²³An Allah amingmingangge roho wereg lit Nikni ngi reg lahiyon ino ubam sembahyang urukmu Aren hubanggo malaikat misig monde fehekma niraham unduhuk lit

²⁴ele nubam uruk lit, ’Paulus nare, Kaisar ambeg lahunen hat hakol toho welam fug. Allahn hat indi hasug lit weregma ap hat nim kou elma welahebon aruma misig oho war amuhup fug,’ ehek.

²⁵Nori, ari fahet hinindi yuwag toho welamek. An hiyag nerehek ane ari ulug hiyag hisihiyon ari obog toho teko lahuwen Allah fam nindi wenggel haruk lahi.

²⁶Kou tuwen nit ha neneplug ik anggen misig fam nunumbahik lahu,” ulug hiyag isibag.

²⁷Ik Adria ahum ke mase ril larukmen hup nunggul hiriken atfag. Hup humanoho atfagma kou waruk inap arimanowen ketiya kinang ilahe horog toho welahe pibag.

²⁸Ari pibareg hele wirimangge ino ik ahummu pilapfagma tung tibagma kim harukmen ik ahum yat teg lit wirimangge ino hili likin fumahen 20 fam atfag. Nin tot libareg wirimangge ino pilaptukmen hili nuwal fumahen fam atfag.

²⁹Nin larukmen helep fam tung turuk lit kou aru arap tuhu rohon ulug helep simbuk angginon hahon uhan itano hele kumbi ililoho kou olombik filen ik ahummu pilapfareg wereg lit folo-folo sakan tukag peruk latfag.

³⁰Ari peruk lit welatfareg kou waruk inap arimanowen kou embeselug hirag-hirag lul peruk lit enele si ane uruk lit helep simbuk eke kou unggul filen pilabul ibareg kou toron ino pilabul ulug turuk latfag.

³¹Ari turukmu Paulusen yer isibareg sehen seneg inap onowe men otsi men hiyag isaruk lit, ”Kou waruk inap aruma kou embeselug lalusa halug hit obog toho honoluk welam fug teg,” ibagma

³²sehen seneg inap arimanowen kumbi kou toron ilili fibahon ino kong tibisibagma kou ino iken hilalug libag.

³³Sakan tik ohoma Paulusen suburu nalihip ulug hiyag isaruk lit, ”Nori, siyelu eleg atmisi ulug nangno ruruk lit weregman eneg hup nunggul hirikenam suburu hinik welatikip.

³⁴Fano honoluk welamuhuben hit suburu tam nalihip. Hit aruma welahebon obog toho honoruk hununggulmu wilibihon misig oho heneko wambimisi fug,” ulug hiyag isibag.

³⁵Ari ibareg suburu wibareg seneg lit it iniline Allah fam sembahyang ibareg kuroho og isibareg naruk latfag.

³⁶Kuroho naruk latfagma ap arimano oho inindi yuwag atfareg suburu naruk latfag.

³⁷Nit obog toho kou elma welatuk uwahon arimano nenebe teng-teng angge 276 welatuk uwag.

³⁸It obog toho suburu nibareg enehummu atfagma kou se amag ulug roti anggen sum fam fani roho kilapfahon arimano ik ahum ke hik isibag.

³⁹Sakan tibagma huhelma indit teg ambeg ik ayegma tonggo reg ambeg fanoma yet hibag. Yet hibag ambeg ino enepeleg teg latfag angge famen indit teg ambeg ari kou imbik lul ulug enele ibag.

⁴⁰Helep simbuk ik ahummu pilaptuk angge ino kumbi kong toho helebet ik ahummu imbisibareg kou hebeltuk angge ino kani hul ulug hele lole fibareg sum homhomo fu ruruk lit kou walug laruk angge ino kou ik ilanma walug lawag ulug ilili fibag.

⁴¹Larukmu ik yinggi ik ahumen mapmu reg latfahon ino fam kik turuk lit kou ino unggul fil yinggi palimu fano weregma olombik fil ik haglabut waharuk lit halog tibag.

⁴²Halog tibagma sehen seneg inap arimanowen ap hele waroho fer enesug laheyon ik ahum keyen laruk lit longgo uk nowen unusul peruk latfag.

⁴³Peruk latfagma sehen seneg inap onowe inowen Paulus oluk welaruhu undaman peruk lit, ”Unusuk fug,” il laruk lit, ”Ap ik hurug onoluk toho larukon halug ik ahummu hik toho wambulusareg ilanma lalusa.

⁴⁴Ik hurug laruk ane enepelehon halug kou halog toho lin ehekon aruma walusareg seneko fobik onombolim lalusa,” ulug hiyag isibagma it obog toho misig oho iken unusibag fugmu ik ilanma libag.